Ɛsidarasi 4 - Bibeli do fee

Icɛi kpasɛ̃i Ilaaɔ̃u í leekĩ

¹ Mbɛɛi inɛi Zudaa ŋa do ti Bɛnzamɛɛ ŋa à gbɔ iyi inɛ ŋa iyi à baau à waa maa Ilaaɔ̃ Lafɛ̃ɛ nŋa kpasɛ̃.

² Ŋɔi à bɔ bi Zorobabɛli do bi inɛ ngboi kpasɛ̃ ŋau à sɔ̃ ŋa à ni, à waa bi ka ba ŋɛ kpasɛ̃i Ilaaɔ̃u ku ma, domi awa mɔ Ilaaɔ̃ akãu bɛi à waa tɔɔ bɛi iŋɛ mɔ nɔ à ya ka ceaa kuwee hai waati iyi Asaradɔ̃ɔ ilaalui Asiri í baaò wa wa ihɛ̃.

³ Amma Zorobabɛli do Zozue do inɛ ngboi kpasɛ̃ ŋa iyi à gbe ŋau à jɛ nŋa à ni, a kù bi i ba wa kpasɛ̃i Aɔ̃ Lafɛ̃ɛ nwa ku ma ŋa. Awa akãi aa ka coo, domi kpasɛ̃i Aɔ̃ Lafɛ̃ɛi inɛi Izirɛli ŋai á jɛ. Sirusi ilaalui Pɛɛsiu takaɛ nŋui í jilɔɔ bɛɛbɛ.

⁴ Ŋɔi inɛi ilɛ bɛ ŋau à waa fɔ inɔi inɛi Zudaa ŋau nɔ à jɔ̀ njo wa mu ŋa ku ba a maà ma kpasɛ̃i Ilaaɔ̃u má.

⁵ Hai si waati iyi Sirusi ilaalui Pɛɛsi í wa si bomma hee ku koo si ilaalu Dariusi, à ya maa na inɛ ŋa iyi à jɛ woo kɔi ilaaluu fiai ku ba a ganji icɛ iyi Zuifu ŋau à jilɛ.

À waa cea Zuifu ŋa kɔɔmɔtɔ bi ilaalu Aatakusɛɛsi

⁶ Si waati iyi Asuerusi í jɛ bomma kù kpɛ mɔm, ŋɔi inɛ ŋau à ceaa tia wa. Si tia nŋau à waa má inɛi Zudaa ŋa do inɛi Zeruzalɛmu ŋa ide.

⁷ Si anyii nŋu si waati iyi Aatakusɛɛsi í na í jɛ ilaalui Pɛɛsi, Biselamu do Miteredaa do Tabɛli do kpaasi nŋa ŋa iyi à gbe à ceaa tia wa. À kɔ tiaui do feei Arameɛ̃ɛ do si yaasei kukɔ nŋa.

⁸ Rehumu iyi wa jɛ inɛ ngboi bubui ilɛu do Simekai woo kɔ tiaɛu, à kɔa ilaaluu idei inɛi Zeruzalɛmu ŋa.

^9-11 Tia iyi à kɔ à sambaa ilaalu Aatakusɛɛsiu wee. À ni, amui Rehumu inɛ ngboi bubui ilɛu do Simekai woo kɔ tiam do kpaasi nwa ŋa iyi à gbe si ilɛi Dini do Aafasataki do Taapɛli do Afarasi do Erɛki do Babilɔni do Suze do Deha do Elami. À kɔɔɛ tiau ihɛ̃ wai, awa woo ce icɛɛ ŋa do inɛ ŋa iyi à gbe iyi Asinapaa ilaalu nla ilu bɛɛrɛ í gbã a koo a buba ilui Samari do si bubui ilɛu iyi í wa ikpa nunui alɛi ido iyi à ya kpe Efaratau.

¹² Awɔ ilaalu, í sĩa i mà iyi Zuifu ŋa iyi à nɛ hai bi tɛɛu à naa Zeruzalɛmu bi tu wa ihɛ̃, à teese à waa ma ilui inɛ laalɔ hai gbɔ ide ŋau. À teese icuu tã nɔ à lɔsi bindiu ku ma.

¹³ Í sĩa i mà iyi bii à teese à ma iluu do bindiɛ, inɛ ŋau a kaa na a jɛ fiai adɔ̃ ku sã má, do fiai lɛmpoo do fia iyi inɛ í ya sã ku bɛi ku lɔ, nɔ fia iyi ì ya ba á kaye.

¹⁴ Nɔ awa iyi hai bi tɛɛi à waa ba mii ku jɛ, kaa sĩa nwa si bii inɛ ŋa à dondaɛ. Na ŋɔi í jɔ̀ à waa sambaɛ laabaau ŋau ihɛ̃ wa,

¹⁵ nɔ à waa sɔ̃ɛi i wusɛ tiai ide ŋa iyi í ce si bommau i cɔ, aa yɔɔ iyi ntɔ ntɔ inɛi ilu ŋau bɛ inɛ laalɔ ŋai. Waati kãma fei à ya maa cea ilaaluu do ilu ilɛ ŋau laalɔi nɔ hai tako à kɔ̀si ide nŋa. Na nŋu bɛ mɔi í jɔ̀ à kpa iluu.

¹⁶ Awɔ ilaalu à waa sɔ̃ɛi, bii inɛ ŋau à teese à ma iluu do bindiɛ i kaa nɛ cingaa ikpa ihɛ̃ má ikpa idoi Efaratau.

Ide iyi ilaaluu í jɛ nŋa

¹⁷ Ide iyi ilaaluu í jɛ nŋa wee. Í ni, awɔ Rehumu inɛ ngboi ilui ikpa bɛ ŋa do Simekai woo kɔ tiaɛ do kpaasiɛ ŋa iyi à wa ilui Samari do bubui ilɛu iyi í wa ikpa nunui alɛi idoi Efaratau, ǹ ce iŋɛ fei fɔɔ.

¹⁸ Tia iyi ì sambaam wa ŋau, à cioɛ dee dee ǹ gbɔ,

¹⁹ nɔ ǹ na wooda ǹ ni a wusɛ tia ŋau, nɔ bɛɛbɛ mɔi iyi à wusɛɛ à ba wee ntɔ ntɔ hai tako Zeruzalɛmu í jɛ ilu gɔ iyi inɛɛ ŋa a ci ya sũa ilaalu ŋa iri ilɛ, nɔ à ya bi a dedeò ija.

²⁰ Ntɔi, tako wo Zeruzalɛmu í nɛ ilaalu ŋa iyi à nɛ gbugbã, aŋai à jɛ inɛ ngboi ilɛ ŋa iyi à wa ikpa nunui alɛi idou fei. Nɔ aŋai à ya sãa fiai adɔ̃ do fiai lɛmpoo do fia iyi inɛ í ya sã ku bɛi ku lɔ.

²¹ Na nŋu, nsɛi i sɔ̃ Zuifu ŋau a jɔ̀ icɛ nŋa iyi à waa ceu ku ba a maà ma iluu, í gbe hee bii ǹ na ŋa wooda má.

²² Maà ce atafii si ideu bɛ ku ba laalɔu ku maà na ku kɔ̃ɔsi si ilaalu ŋau má.

²³ Waati iyi à cio tiai ilaalu Aatakusɛɛsiu si wajui Rehumu do woo kɔ tiaɛu do kpaasi ŋa iyi à gbeu, ŋɔi gbakã à dede do saasa à bɔ Zeruzalɛmu bi Zuifu ŋau, nɔ à leekĩ icɛ nŋau do gbugbã.

À nyi à lɔsi icɛi kpasɛ̃i Ilaaɔ̃ ku ma má

²⁴ Na kucei mbɛɛi Zuifu ŋau iyi í sinti si waatii Sirusi, icɛi kpasɛ̃i Ilaaɔ̃u ku maɛ í leekĩ hee í koo í toò adɔ̃ minjisiai bomma ku jɛi ilaalu Dariusi si ilɛi Pɛɛsi.