Ɛsidarasi 3 - Bibeli do fee

Zozue do Zorobabɛli à teese à ma bi kuwee

¹ Waati iyi cukpa mɛɛjesiai adɔ̃u í to, inɛi Izirɛli ŋa iyi à wa si ilu nŋa ŋau à ce anu akã à tɔtɔɔ Zeruzalɛmu.

² Nɔ Zozue woo wee amai Yosadakiu, nŋu do woo wee kpaasiɛ ŋa do Zorobabɛli amai Seatiɛli do nyaanzeɛ ŋa à teese à ma bi kuweei Aɔ̃ Lafɛ̃ɛi inɛi Izirɛli ŋa. À ma bi kuweeui ku ba a yɔkɔ a cea Ilaaɔ̃ kuwee iyi à ya jo si ina fei sãa sãa si bɛi Moizi inɛi Ilaaɔ̃u í kɔɔ si woodaɛ.

³ Baa do iyi à waa ce njoi inɛi ilɛ ŋau à teese à ma bi kuweeu si icu nwoɛ, nɔ à waa cea Ilaaɔ̃ kuwee ŋa iyi à ya jo si ina fei sãa sãa, à ya ceaa kuwee daakɔ do alɛ.

⁴ Si anyiɛ à ce jingaui Kusu ŋau si bɛi à kɔɔ, nɔ ajɔ fei à ya maa ce kuwee iyi à ya jo si ina fei sãa sãa jia bɛi à sɔ̃ ŋa à ni a ce ajɔ akã feiu.

⁵ Hai waati bɛɛbɛ à ya maa ce kuweei ajɔ fei do ti ajɔ sintei cukpa titɔ̃ fei do ti jingau ŋa iyi à ni à ya cea Ilaaɔ̃. Kuwee ŋau bɛ à ya jooi si ina fei sãa sãa. Nɔ inɛ gɔ ŋa mɔ à ya maa cea Ilaaɔ̃ kuwee do idɔɔbi nŋa.

⁶ Hai ajɔ sintei cukpa mɛɛjesiau à sinti ku cea Ilaaɔ̃ kuwee ŋa iyi à ya jo si ina fei sãa sãa. Waati bɛɛbɛ a kù nyɔ baa icui kpasɛ̃i Ilaaɔ̃u titã.

⁷ Nɔ à so woo gbe kuta ŋa do woo gbe jĩi ŋa à na ŋa fia. Si anyiɛ nɔ à na inɛi Sidɔ̃ɔ ŋa do inɛi Tii ŋa mii ku jɛ ŋa do atɛ̃ do ikpo ku ba inɛ nŋu ŋau mɔ a koo a dɛ nŋa jĩi ndii sɛɛdi ŋa wa hai ilɛi Libãa a dasi akɔi inyi a naaò wa hee ilui Zopee. À cooi do woodai Sirusi ilaalui Pɛɛsiu.

Icui kpasɛ̃i Ilaaɔ̃ ku nyɔ

⁸ Si adɔ̃ minjisia iyi à baa Zeruzalɛmu ilu bii kpasɛ̃i Ilaaɔ̃ í wau si cukpa minjisiai adɔ̃u, Zorobabɛli amai Seatiɛli do Zozue amai Yosadaki, aŋa do kpaasi woo wee ŋau do inɛi Levii ŋa do inɛ ŋa iyi aŋaò ŋa à baau fei à lɔ si icɛ. Nɔ à cica inɛi Levii ŋa iyi à nɛ adɔ̃ kɔnfia walakɔ kɔnfia do ku lesi fei a maa cɔ yaase bɛi à waa ce icɛi kpasɛ̃i Ilaaɔ̃u ku ma.

⁹ Zozue do amaɛ ŋa do ifɔɛ ŋa, do Kadimiɛli do amaɛ ŋa iyi à jɛ tɔkui Hodavia ŋa à na ara nŋa à maa cɔ inɛ ŋa iyi à waa ce icɛi kpasɛ̃i Ilaaɔ̃u. Nɔ tɔkui Henadadi ŋa mɔ à sobi ŋa. Aŋa fei inɛi Levii ŋai.

¹⁰ Waati iyi woo ce icɛ ŋau à nyɔ icui kpasɛ̃i Ilaaɔ̃u, ŋɔi à kpe woo wee ŋau do inɛi Levii ŋa iyi à jɛ tɔkui Asafu a naa a maa saabu Ilaaɔ̃. Ŋɔi woo wee ŋau à dasi ibɔi kuwee nŋa ŋa à waa fãa kãakãakĩ ŋa nɔ inɛi Levii ŋau mɔ à waa cã sɛmbali ŋa à waa saabuò Ilaaɔ̃ si bɛi Davidi ilaalui Izirɛli í na wooda wo.

¹¹ Ŋɔi inɛ bubu ŋa à waa kɔ̃ iri, nɔ bubu ŋa mɔ à waa jɛ à waa ni, ka saabu Ilaaɔ̃ domi í jɛ jiida, nɔ araarei inɛi Izirɛli ŋa iyi í nɛu á maa wɛɛi hee do ajɔ fei. Nɔ inɛ ŋau fei à wasi ku dɔ̃ anu hee lele à waa saabu Ilaaɔ̃ do inɔ didɔ̃ si na iyi í jɔ̀ à nyɔ icui kpasɛ̃ɛ.

¹² Inɛ nkpɔ nkpɔ wa dɔ̃ anu do inɔ didɔ̃, amma woo wee nkpɔ nkpɔ do inɛi Levii nkpɔ ŋa do inɛ ngboi kpasɛ̃ gɔ ŋa iyi à jɛ mɔkɔ ngbo ŋa iyi à yɛ kpasɛ̃i Ilaaɔ̃u tako, à waa kpata hee lele waati iyi à waa nyɔ icu titɔ̃i kpasɛ̃i Ilaaɔ̃u si waju nŋa.

¹³ Na ŋɔi í jɔ̀ inɛ ŋa a kù yɔkɔ a kù mà inɛ ŋa iyi à waa dɔ̃ anu do inɔ didɔ̃ do inɛ ŋa iyi à waa kpata do inɔ kufɔ, domi inɛ fei wa dɔ̃ anui hee lele, nɔ à waa gbɔ ibaɛ hee jĩijĩ.