Ɛsidarasi 10 - Bibeli do fee

Zuifu ŋa à lele inaabo isɛ mmu ŋau

¹ Waati iyi Ɛsidarasi í gulɛ wa kpataò si wajui kpasɛ̃u wa tɔɔ Ilaaɔ̃ ku kpa idei dulum du ŋau, inɛi Izirɛli ŋa aŋa nkpɔ nkpɔi à tɔtɔɔ à kaakoɛ bɛ, hai inɛmɔkɔ ŋa do inaabo ŋa do ama keeke ŋa, aŋa fei à wasi ku kpata hee lele.

² Ŋɔi Sekania amai Yeɛli iyi wa jɛ dimii Elamu í sɔ̃ Ɛsidarasi í ni, à ce dulum bi Aɔ̃ Lafɛ̃ɛ nwa si bɛi à so abo ŋa si inɔi isɛ mmu ŋa iyi à wa si ilɛu ihɛ̃. Amma do nŋu fei kpãa ku cɔ í gbe nwa má.

³ Í sĩa ka dĩ akabuu do Ilaaɔ̃ nɔ ka lele inaabo isɛ mmu ŋau do ama nŋa ŋa fei si bɛi ì bi, awɔ do inɛ ŋa iyi à waa jirima woodai Aɔ̃ Lafɛ̃ɛ nwa fei. Í sĩa ka jirima woodai Ilaaɔ̃.

⁴ Dede, domi awɔi aa ce wũai ideu. À tã sɔɔlu ka too fitiɛ. Na nŋu, maà sika si mii iyi aa ce.

⁵ Ŋɔi Ɛsidarasi í dede nɔ í ni inɛ ngboi woo wee ŋau do inɛ ngboi inɛi Levii ŋau do ti inɛi Izirɛli ŋau fei a gbasi do irii Ilaaɔ̃ a jirima ide iyi Sekania í fɔu. Nɔ aŋa fei à gbasi.

⁶ Ŋɔi Ɛsidarasi í fita hai si bantumai kpasɛ̃i Aɔ̃ Lafɛ̃ɛu, nɔ í bɔ idei Yohanaa amai Eliasibu í koo í buba bɛ. Nɔ í kɔ̀ ku jɛ hee má jɛ ku mɔ domi inɔɛ í fɔ do dulum nla nla iyi inɛ ŋau à ce.

⁷ Ŋɔi à dabii à fɔ si ilɛi Zudaa do si ilui Zeruzalɛmu à ni inɛ ŋa iyi à baa hai bii à tako à waa jɛ aruu a tɔtɔɔ wa Zeruzalɛmu.

⁸ Nɔ inɛ ngbo ŋau do inɛ nla ŋau à ni inɛ iyi kù to Zeruzalɛmu si ajɔ mɛɛtasiau aa gba mii ndɛɛ ŋa nɔ a nya lafɛ̃ɛ hai si inɔ nŋa.

⁹ Ŋɔi inɛi Zudaa ŋa do inɛi Bɛnzamɛɛ ŋa fei à tɔtɔɔ Zeruzalɛmu bɛ si ajɔ mɛɛtasiau si ajɔ kɔnfiai cukpa mɛɛsãsiau. À tɔtɔɔ si bantumai kpasɛ̃i Ilaaɔ̃u nɔ aŋa fei à waa yaya na ideu do si bɛi ijĩ í nyi wa wɔ má.

¹⁰ Nɔ Ɛsidarasi woo weeu í dede í sɔ̃ ŋa í ni, iŋɛ inɛi Izirɛli ŋa, ì ce kurara ŋa si bɛi ì so abo isɛ mmu ŋau ŋa. Na ŋɔi í jɔ̀ dulum du wa í la wa kɔ̃ɔsi.

¹¹ Nsɛi í sĩa i ce tuubai dulum du ŋɛ ŋa bi Aɔ̃ Lafɛ̃ɛi bala nŋɛ ŋa nɔ i jirima idɔɔbiɛ ŋa. I fɛɛfɛ ara nŋɛ do inɛi ilɛ ihɛ̃ ŋau do abo isɛ mmu nŋɛ ŋau.

¹² Ŋɔi inɛ ŋa iyi à tɔtɔɔ bɛ fei à waa dɔ̃ anu hee lele à waa ni, ì nɛ ntɔ. Í sĩa ka ce mii iyi ì sɔ̃ wa.

¹³ Amma do nŋu fei à kpɔ nɔ ijĩ wa wɔ nɔ a kaa ka yɔkɔ ka maa leekĩ bantuma ihɛ̃ hee mɔm kù jɛ baa mii ndii ajɔ akã walakɔ ajɔ minji, domi si inɔ nwa inɛ nkpɔ nkpɔi í ce dulum si ideu bɛ.

¹⁴ Na nŋu, í sĩa inɛ ngbo nwa ŋau a gbe Zeruzalɛmu ihɛ̃ a wũa ideu. Nɔ inɛi Izirɛli ŋa iyi à so abo isɛ mmu fei a to wa ihɛ̃ si ajɔ iyi à jilɛ nŋa, aŋa do inɛ ngboi kpasɛ̃ nŋa ŋau do woo ce kiiti nŋa ŋau hee idɔɔkɔ̃ nlai Ilaaɔ̃ koo sũò.

¹⁵ Zonatãa amai Asaɛli, do Yazia amai Tikiva, aŋa akãi a kù jɛsi ideu, aŋa do Mesulamu do Sabetai inɛi Leviiu.

¹⁶ Inɛi Izirɛli mbɔ ŋa iyi à baa hai bii à waa jɛ aru wou inɛ nŋu ŋau à jɛsi. À cica Ɛsidarasi woo weeu do inɛ ngboi kpasɛ̃ ŋa aŋa fei do iri nŋa. Inɛ ŋau à tɔtɔɔ si ajɔ sintei cukpa mɛɛwasiau ku ba a teese ideu.

¹⁷ Nɔ si ajɔ sintei cukpa sinteu à ce wũai inɛmɔkɔ ŋa iyi à so abo si isɛ mmu ŋau fei à kpa iriɛ.

Irii Zuifu ŋa iyi à ce kurarau

¹⁸ Si inɔi woo wee ŋau, inɛ ŋa iyi à so abo si inɔi inaabo isɛ mmu ŋau wee. Tɔkui Zozue do ifɔɛ ŋa, aŋa iyi à jɛ amai Yosadaki ŋau wee. Maseya do Eliezɛɛ do Yaribu do Gedalia.

¹⁹ Inɛ nŋu ŋau à tã sɔɔlu a lele abo nŋa ŋa nɔ a cea Ilaaɔ̃ kuwee do angudã kombo ku ba Ilaaɔ̃ ku kpa idei kurara nŋa.

²⁰ Tɔkui Imɛɛ ŋa mɔ wee. Hanani do Zebadia.

²¹ Tɔkui Harimu ŋa mɔ wee. Maseya do Eli do Semaeya do Yeɛli do Oziasi.

²² Tɔkui Pasuu ŋa mɔ wee. Elioenai do Maseya do Isimaɛli do Netaneɛli do Zozabadi do Eleasaa.

²³ Si inɔi inɛi Levii ŋaui Zozabadi do Simɛi do Kelaya nŋu iyi à ya kpe Kelita má do Petahia do Zudaa do Eliezɛɛ à wa.

²⁴ Si inɔi woo kɔ iri ŋau mɔi Eliasibu í wa. Si inɔi woo degbe koofa ŋau mɔi Salumu í wa do Telɛmu do Uri.

²⁵ Si inɔi inɛi Izirɛli ŋa iyi à gbeu bɛi tɔkui Pareosi ŋa à wa. Aŋa wee. Ramia do Izia do Malikia do Miamɛɛ do Eleazaa do Malikia do Benaya.

²⁶ Tɔkui Elamu ŋa wee. Matania do Zakari do Yeɛli do Abudi do Yeremɔti do Eli.

²⁷ Tɔkui Zaatu ŋa mɔ wee. Elioenai do Eliasibu do Matania do Yeremɔti do Zabadi do Aziza.

²⁸ Tɔkui Bebai ŋa mɔ wee. Yohanaa do Hanania do Zabai do Atilai.

²⁹ Tɔkui Bani ŋa mɔ wee. Mesulamu do Maluku do Adaya do Yasubu do Seali do Yeremɔti.

³⁰ Tɔkui Pahati-Moabu ŋa wee. Adina do Kelali do Benaya do Maseya do Matania do Besaleɛli do Binui do Manasee.

³¹ Tɔkui Harimu ŋa mɔ wee. Eliezɛɛ do Isia do Malikia do Semaeya do Simeɔ̃

³² do Bɛnzamɛɛ do Maluku do Semaria.

³³ Tɔkui Hasumu ŋa wee. Matenai do Matata do Zabadi do Elifelɛti do Yeremai do Manasee do Simei.

³⁴ Tɔkui Bani ŋa wee. Madai do Amuramu do Uɛli

³⁵ do Benaya do Bedia do Keluhu

³⁶ do Vania do Meremɔti do Eliasibu

³⁷ do Matania do Matenai do Yasai

³⁸ do Bani do Binui do Simei

³⁹ do Selemia do Natãa do Adaya

⁴⁰ do Makinabai do Sakai do Sarai

⁴¹ do Azareɛli do Selemia do Semaria

⁴² do Salumu do Amaria do Zozɛfu.

⁴³ Tɔkui Nebo ŋa wee. Yeɛli do Matitia do Zabadi do Zebina do Yadai do Zoɛli do Benaya.

⁴⁴ Inɛ bɛ ŋau bɛ fei à so abo isɛ mmu ŋa, nɔ abo nŋa ŋau nkpɔ nkpɔ í bí ama.