Ɛsidarasi 1 - Bibeli do fee

Sirusi í jɛsi a teese a ma kpasɛ̃i Ilaaɔ̃

¹ Si adɔ̃ sintei bomma ku jɛi Sirusi ilaalui Pɛɛsi, Aɔ̃ Lafɛ̃ɛ í dasi idɔ nŋu ku jɔ̀ ide iyi nŋu í tako í jɔ̀ walii Zeremi í fɔu ku ce. Na ŋɔi í ce í jɔ̀ Sirusi í dasi idɔ í fɔ ideɛ si bommaɛ fei nɔ í kɔ tia má í ni,

² Aɔ̃ Lafɛ̃ɛi lele í daam bommai ilɛ ŋau fei si awɔ amu Sirusi ilaalui Pɛɛsi, nɔ í cicam n teese n maa nŋu kpasɛ̃ ilui Zeruzalɛmu si ilɛi Zudaa.

³ Si inɔ nŋɛ, iŋɛ iyi ì jɛ inɛɛ ŋa fei, à waa kpe ŋɛ i nyi Zeruzalɛmu i koo i teese i ma kpasɛ̃i Aɔ̃ Lafɛ̃ɛi inɛi Izirɛli ŋau, nŋu iyi inɛ ŋa à waa tɔɔ Zeruzalɛmu bɛ. Nɔ Ilaaɔ̃ Lafɛ̃ɛ nŋɛ ku wɛɛ do iŋɛ.

⁴ Tengi bii inɛi Izirɛli ŋa à wa fei, inɛi tengi bɛ ŋai aa mu nŋa isɔ fũfũ do wura, do mii jiida mmuɛ ŋa má do mɛɛmu ŋa, nɔ do idɔɔbi nŋai aa na ŋa fia iyi á jɛ ti kpasɛ̃i Ilaaɔ̃ iyi í wa Zeruzalɛmu.

⁵ Ŋɔi inɛ ngboi kpasɛ̃ ŋa si dimii Zudaa do Bɛnzamɛɛ do woo wee ŋa do inɛi Levii ŋa, aŋa iyi Ilaaɔ̃ í da nŋa si idɔ a koo a teese a ma kpasɛ̃i nŋu Zeruzalɛmu fei à waa ce sɔɔlui ku nɛ.

⁶ Kpaasi nŋa ŋa à mu nŋa jĩnɛ ŋa iyi à ce do isɔ fũfũ do wura, do mii jiida mmuɛ ŋa má dimi ikã ikã, do mɛɛmu ŋa hee do fia iyi í jɛ ti kpasɛ̃i Ilaaɔ̃u bɛ.

⁷ Ilaalu Sirusi í tɔtɔɔ jĩnɛi kpasɛ̃i Ilaaɔ̃ iyi Nebukanɛsaa í tako í so hai Zeruzalɛmu í koo í jilɛ si ilei iwɛ̃i nŋu takaɛ í sindo nŋa.

⁸ Miteredaa woo singa fiai ilɛu nŋui í nya mii ŋau í na Sɛsibasaa amanlu si dimii Zudaa si bɛi Sirusi í na wooda.

⁹ Jiai mii ŋau wee. Jɛɛ iyi à ce do wura ara kuntaa (30) do jɛɛ iyi à ce do isɔ fũfũ dubu akã (1.000) do kasɛ ara kɔnfia do mɛɛsã (29)

¹⁰ do kɔɔfu ŋa iyi à ce do wura ara kuntaa (30) do kɔɔfu dimi ikã gɔ ŋa má iyi à ce do isɔ fũfũ má ara cĩɔ mɛɛ do mɛɛwa (410) do jĩnɛ mmuɛ ŋa má dubu akã (1.000).

¹¹ Jiai jĩnɛ ŋa iyi à ce do wura do isɔ fũfũ fei í dedei dubu miiu do cĩɔ mɛɛ (5.400). Sɛsibasaai í so fei ndɛɛ waati iyi í dede hai Babilɔni do kpaasiɛ ŋau à waa nɛ Zeruzalɛmu.