Ezekiɛli 9 - Bibeli do fee

Aɔ̃ Lafɛ̃ɛ í kpã Zeruzalɛmu iju

¹ Si anyiɛ ǹ gbɔ anu ku dɔ̃ nla gɔ í ni, i sɛkɛɛ wa iŋɛ iyi à so i koo i kpã iluu iju ŋau. Inɛ fei ku so jĩnɛ iyi á koo ceò asɔɔu wa.

² Ŋɔi ǹ yɛ amanɛ mɛɛfa wa naa hai do ikpa kpãai anu koofa iyi í wa ikpa awɔ njɛi kpãai inunu iyi wa cɔ ikpa iri kutau. Aŋa fei à waa mu jĩnɛi igũ iyi aa ceò nfei inɛ ŋa. Inɛ gɔ í wa si anini nŋa wa dasi jĩnɛi acɔ ku nɛ gbugbã gɔ nɔ mii ku kɔ gɔ wa sɔkɛ si kungbãɛ iyi wa dĩ. Ŋɔi à nɛ wa à naa à leekĩ kɔkɔi bi kuwee iyi à ce do isɔ nkpau.

³ Ŋɔi amboei Ilaaɔ̃ Lafɛ̃ɛi inɛi Izirɛli ŋau í dede hai si antaii serubɛ̃ɛ ŋau, í bɔ andɛ koofai kpasɛ̃u, nɔ í kpe inɛ iyi wa dasi jĩnɛi acɔ ku nɛ gbugbã nɔ wa dĩ kungbã iyi mii ku kɔ gɔ wa sɔkɛ siu.

⁴ Aɔ̃ Lafɛ̃ɛ í sɔ̃ɔ í ni, lɔ inɔ ilu Zeruzalɛmu, ce nyinda gɔ si ikpoi inɛ ŋa iyi à waa wahala nɔ à waa kakaa na laalɔ ŋa iyi inɛ ŋa à waa ceu.

⁵ Nɔ ǹ gbɔ í sɔ̃ amanɛ mɛɛfa í ni, i lɔ i tooɛ si inɔ iluu ŋa nɔ i kpa inɛ ŋau. I maà cɔ inɛ gɔ i ce araareɛ nɔ i maà jɔ̀ inɛ gɔ ku fita si ŋa.

⁶ I kpa ŋa i ce nfe nŋa mam mam ŋa, hai mɔkɔ ngbo ŋa, do awaasũ ŋa, do mudɛ̃ɛ ŋa, do ama keeke ŋa, do inaabo ŋa. Amma i maà kpa inɛ ŋa iyi à nɛ nyinda ŋau ŋa. Nɔ i sinti hai kpasɛ̃m ŋa. Ŋɔi à sinti ku kpa inɛ ngbo ŋa iyi à wa andɛ kpasɛ̃u.

⁷ Aɔ̃ Lafɛ̃ɛ í sɔ̃ ŋa í ni, i riisi kpasɛ̃u, nɔ iku ŋa a maa kɔ̃ si bantumau. Si anyiɛ i fita i bɔ si inɔ iluu i kpa inɛ ŋa.

⁸ Si bɛi inɛ ŋau à kpa inɛ ŋa à waa koo, ŋɔi ǹ sɛɛbata nɔ ǹ dɔ̃ anu ǹ ni, waiyooi Aɔ̃ Lafɛ̃ɛ aa ce nfei inɛi Izirɛli ŋa iyi à gbe ŋau fei si idɔɔkɔ̃ nlaɛi?

⁹ Ŋɔi Aɔ̃ Lafɛ̃ɛ í ni, dulum dii inɛi Izirɛli ŋa do inɛi Zudaa ŋau í la hee í caa. Ilɛu í kɔ̃ do njɛ ku nikã nɔ iluu í kɔ̃ do laalɔ. Nɔ à fɔ à waa ni, Aɔ̃ Lafɛ̃ɛ í fũsi ilɛu awɔ nɔ kù waa yɛ nkãma.

¹⁰ Na nŋu, amu mɔ n kaa n ce araare nŋa, n kaa n jɔ̀ inɛ gɔ ku fita si. Daa iyi à ce, si iri nŋai á cuku si.

¹¹ Ŋɔi inɛ iyi wa dasi jĩnɛi acɔ ku nɛ gbugbã iyi í dĩ kungbã si bii mii ku kɔ wa sɔkɛ siu, í naa í sɔ̃ Ilaaɔ̃ í ni, ǹ ce mii iyi ì dasim ku ceu.