Ezekiɛli 8 - Bibeli do fee

À waa tɔɔ iwɛ̃ si kpasɛ̃i Ilaaɔ̃

¹ Si anyii kumu nwa, si adɔ̃ mɛɛfasia si cukpa mɛɛfasiaɛ si ajɔ miiusia, ǹ wa n bubai inɔ kpasɛ̃m nɔ inɛ ngboi Zudaa ŋa à waa buba si wajum. Si waati nŋui gbugbãi Aɔ̃ Lafɛ̃ɛ í naa sim.

² Ŋɔi ǹ cɔ ilu nɔ ǹ yɛ ngɔgɔ í jɔ amanɛ. Hai gbankiliɛ ku bɔ ikpa ilɛ í yɛi bɛi ina. Do ikpa leleɛ wa má inya, nɔ inya kumáɛu í yɛi bɛi isɔ iyi wa daana.

³ Ŋɔi í yɔ ngɔgɔ wa bɛi awɔ í mu ntoi irim. Ŋɔi si kuyɛ iyi Ilaaɔ̃ í jɔ̀ ǹ ceu, hundeɛ í bɔɔm hee Zeruzalɛmu si anu koofai inɔ kpasɛ̃ɛu do ikpa awɔ njɛi kpãai inunu tengi bii à jilɛ iwɛ̃ gɔ iyi í dede idɔɔkɔ̃ɛu.

⁴ Ŋɔi amboei Ilaaɔ̃ Lafɛ̃ɛi inɛi Izirɛli ŋau í wa tengi bɛ bɛi ǹ tako ǹ yɔɔ si lɔɔmau.

⁵ Nɔ í sɔ̃m í ni n wu iju n cɔ ikpa awɔ njɛi kpãai inunu. Ŋɔi ǹ cɔ ikpa awɔ njɛi kpãai inunu nɔ ǹ ba wee iwɛ̃ iyi í dede idɔɔkɔ̃ɛu í wa do ikpa awɔ njɛi kpãai inunu bi ku ce kuwee si anu koofau.

⁶ Ŋɔi Aɔ̃ Lafɛ̃ɛ í sɔ̃m í ni, awɔ amanɛ, ì waa yɛ laalɔ ŋa iyi inɛi Izirɛli ŋau à waa ce iyi í jɔ̀ n kaa n wa inɔ kpasɛ̃m? Amma aa yɛ laalɔ mmuɛ gɔ ŋa iyi à waa ce má.

⁷ Ŋɔi í gbãm í bɔɔm si anu koofai bantumai kpasɛ̃u, nɔ ǹ yɛ idĩu í nɛ iwo.

⁸ Nɔ í ni, lu idĩu, ŋɔi ǹ lu idĩu nɔ í ce afe.

⁹ Ŋɔi í sɔ̃m í ni n lɔ n cɔ laalɔ ŋa iyi inɛ ŋau à waa ce si inɔ bɛ.

¹⁰ Ŋɔi ǹ lɔ, nɔ ǹ ba wee si idĩu bii fei mii ŋa iyi à jɔ njo ŋa do iyi à jɔ mɛɛmu laalɔ gɔ ŋai à ce iyi à jɛ bɛi iwɛ̃i inɛi Izirɛli ŋau.

¹¹ Nɔ ǹ yɛ inɛ ngbo kitaò fɛɛwai inɛi Izirɛli ŋau à waa leekĩ si wajui mii ŋa iyi à jɔ ŋau. Yaazania amai Safãa í wa inɔ nŋa. Aŋa fei à waa mu mii ku jo tuae nɔ cua í dede lele.

¹² Ŋɔi í ni, ì waa yɛ mii iyi inɛ ngboi Izirɛli ŋau à waa ce si asii? Inɛ baa yooma nŋa fei í wai si wajui mii iyi í jɔ iwɛ̃ɛ. Nɔ à ya fɔi a maa ni, Aɔ̃ Lafɛ̃ɛ kù waa yɛ wa. Í fũsi ilɛu awɔi.

¹³ Nɔ í ni má, aa yɛ laalɔ nla nla mmu gɔ ŋa iyi à waa ce má.

¹⁴ Ŋɔi í bɔɔm si anu koofai kpasɛ̃i Aɔ̃ Lafɛ̃ɛu do ikpa awɔ njɛi kpãai inunu. Inaabo gɔ ŋa à wa bɛ à waa kpataa ikui iwɛ̃ Tamuuzi.

¹⁵ Ŋɔi í beem í ni, ì yɛ mii ŋau í sĩa? Aa nyi i yɛ laalɔ mmu gɔ ŋa má iyi à re bɛɛbɛ.

¹⁶ Ŋɔi í gbãm í bɔɔm si inɔ bantumai kpasɛ̃i Aɔ̃ Lafɛ̃ɛu. Hai anu koofai kpasɛ̃i Aɔ̃ Lafɛ̃ɛu, si afei bi ku lɔu do bi kuweeu, amanɛ kɔnfia do miiui í wa bɛ iyi à toa kpasɛ̃i Aɔ̃ Lafɛ̃ɛu anyi à waa cɔ ikpa nunui daakɔ nɔ à sɛɛbata à waa tɔɔ inunu.

¹⁷ Ŋɔi í ni, awɔ amanɛ, ì yɛ mii ŋa iyi inɛ ŋau à waa ce? Mii ŋau bɛ kù to inɛi Zudaa ŋau. À ce laalɔ à waa kɔ̃ɔsi má si ilɛu. À waa taa inɛ ŋa gbugbã à waa dedeò idɔɔkɔ̃m. À so akpa à waa naaò wa si imɔm.

¹⁸ Amu mɔ an naa si ŋai do idɔɔkɔ̃ nla nla, nɔ n kaa n cɔ ŋa n ce araare nŋa. N kaa n jɔ̀ inɛ gɔ ku fita si. Waati iyi aa maa dɔ̃ sim anu, n kaa n gbɔ nŋa.