Ezekiɛli 7 - Bibeli do fee

Aɔ̃ Lafɛ̃ɛ wa fɔ idei nfe ku ce iyi wa naa

¹ Aɔ̃ Lafɛ̃ɛ í bam ide ku fɔ í ni,

² awɔ amanɛ, sotĩ i gbɔ ide iyi ǹ wa n fɔ si gãmɛi ilɛi inɛi Izirɛli ŋa. Ǹ ni í tã mbɛ. Ilɛu á ce nfei si gonta mɛɛu fei.

³ Nsɛi, nfe ku ce nŋɛi í to wa bɛ. An jɔ̀ idɔɔkɔ̃m ku naa si ŋɛ. An kiiti ŋɛi si isɛɛnɛ nŋɛ nɔ n sã laalɔ nŋɛ ŋa iyi ì ce ŋa.

⁴ N kaa n cɔ ŋɛ n ce araare nŋɛ, nɔ inɛ kãma kaa fita si. Isɛɛnɛ laalɔ nŋɛ iyi ì ceu ŋa, an jɔ̀ ku baa ku cuku si iri nŋɛi. An jɔ̀ fei ndɛɛ ku fita gbugbãai, nɔ aa mà ŋa iyi amui ǹ jɛ Aɔ̃ Lafɛ̃ɛ.

⁵ Aɔ̃ Lafɛ̃ɛ í ni, laalɔ gɔ wa naa iyi a kù yɛ dimiɛ titã.

⁶ Nfe ku ce wa naa. Nfe ku ce wa naa. Bi tu ŋɛi wa naa, nɔ wee í to wa tã.

⁷ Iŋɛ inɛi ilɛi Izirɛli ŋau, awaatiu wa to wa. Ajɔi kiitiu í maai wa. Ajɔi zigiidai á jɛ. A kaa gbɔ anu ku dɔ̃i inɔ didɔ̃ si iri kuta ŋau má.

⁸ Nsɛi ǹ tã sɔɔlu idɔɔkɔ̃m nɔu ku naa si ŋɛ. An jɔ̀ idɔɔkɔ̃m nɔu ku ce icɛɛ si ŋɛi hee kɔɔ. An kiiti ŋɛi si isɛɛnɛ nŋɛ nɔ n sã nŋɛ kuce laalɔ nŋɛ.

⁹ N kaa n cɔ ŋɛ n ce araare nŋɛ, nɔ inɛ kãma kaa fita si. An sã nŋɛi bɛi isɛɛnɛ nŋɛ í to. An jɔ̀ kuce laalɔ nŋɛ ŋau a fita gbugbãai nɔ aa mà ŋa iyi amui ǹ jɛ Aɔ̃ Lafɛ̃ɛ iyi wa kpã ŋɛ iju.

¹⁰ Ajɔi kiitiu wee í to wa. Nfe ku ce í maai wa. Gbugbã ku taa inɛ í wa bii fei, nɔ faau í ba gbugbã wa kɔ̃ɔsi.

¹¹ Gbugbã ku taa njɛu í yɛi bɛi golo iyi aa so a cãò inɛ. Nkãma kaa gbe nŋɛ. Hai amani nŋɛ do akpɔ nŋɛ hee do kula nŋɛ.

¹² Waatiu í to. Ajɔi kiitiu í maai wa. Woo ra ŋa a kaa nɛ inɔ didɔ̃, nɔ bɛɛbɛi woo ta ŋa a kaa nɛ inɔ kufɔ, domi idɔɔkɔ̃m á naai si zamaau fei.

¹³ Woo ta iwo kaa ba ku gba iwo iyi í tau má baa bii í wɛɛ si hunde. Ntɔ ntɔ kuyɛi nfe ku cei zamaau iyi à fɔ, kaa gbe iyi kù ce. Inɛ baa yooma nŋa fei wa jɛ kuwɛɛɛi si dulum. Ŋɔi í jɔ̀ inɛ kãma kaa ba ku fita si.

¹⁴ Baa bii sɔɔlu í jĩa nɔ à fã kãakãakĩi, inɛ kãma kaa fita ku bɔ igũ, domi idɔɔkɔ̃m í wa si zamaau fei.

Inɛ kãma kaa fita si ijuukpãu

¹⁵ Si anyii iluu igũi á maa ce. Nɔ si inɔ iluu mɔ patapoo do arii á wa si. Inɛ iyi í wa iko á kui si igũ. Inɛ iyi í wa inɔ ilu, ari do bɔ̃ɔi á kpaa.

¹⁶ Inɛ ŋa iyi à ba à fita si aa sai a nɛ iri kuta ŋa a koo a maa dɔ̃ anu bɛi ankasiidi nɔ a maa kakaa na irii dulum du ŋa ŋa.

¹⁷ Awɔ nŋa ŋa do ilugũ nŋa ŋa aa kua gbugbãi.

¹⁸ Saakii aa bii bɛi acɔ, nɔ a maa yaya do njo. Anyɔi á bii waju nŋa nɔ aa gbogoo iri nŋa ŋai na inɔ kufɔ.

¹⁹ Aa nyɔ isɔ fũfũ nŋa ŋa si kpãa ŋa. Wura nŋa ŋa aa baa a jɛ mii riisi. Wura nŋa do isɔ fũfũ nŋa ŋau a kaa yɔkɔ a nya ŋa si ajɔi idɔɔkɔ̃i Aɔ̃ Lafɛ̃ɛu. A kaa ba mii iyi aa jɛ a yo, nɔ binɛi mii ŋa iyi à nɛ kaa to ŋa, domi isɔ fũfũ do wura nŋa ŋaui à jɛ icui dulum du ŋa ŋau.

²⁰ Faau nŋa í wai si jĩnɛ kusĩa nŋa ŋa iyi à ce, nɔ à daa iwɛ̃ nŋa ŋa si, aŋa iyi à jɛ mii laalɔ nla nla ŋau. Na ŋɔi í jɔ̀ Aɔ̃ Lafɛ̃ɛ í ni, an jɔ̀ iwɛ̃ ŋau a baa a jɛ nŋa mii riisi ŋa.

²¹ An jɔ̀ inɛ njoo ŋa a ko iwɛ̃ nŋa ŋau. An jɔ̀ inɛ laalɔ ŋa a mu ŋai a nɛò ŋa bɛi amani iyi à ko wa hai si igũ, nɔ a bɛjɛ ŋa.

²² An sinda n to nŋa anyi, nɔ inɛ ŋa aa bɛjɛ mii iyi ǹ bi. Inɛ laalɔ ŋai aa lɔ siɛ nɔ aa bɛjɛɛi.

²³ Ce sɔɔlui sesee ŋa, domi woo kpa inɛ ŋai à waa kɔ̃ si ilɛu nɔ gbugbã ku taa njɛi wa kɔ̃ si iluu.

²⁴ An jɔ̀ dimi mmu kugaabu ŋa a naa si ŋa ku ba a gba kpasɛ̃ nŋa ŋa. An leekĩ faaui ilu gbugbã ŋau, nɔ n jɔ̀ ile bi kutɔɔ nŋa ŋau a so riisi.

²⁵ An jɔ̀ wahala ku naa. Waati bɛɛbɛ, aa maa dɛdɛ laakai ku sũ, amma a kaa ba.

²⁶ Si antaii wahalau, wahalai á naa má, nɔ laabaau laalɔ ŋai aa ya maa gbɔ. Aa tɔɔ walii ŋa a ce kuyɛ, nɔ aa bi woo wee ŋa do inɛ ngbo ŋa a ya kɔ inɛ ŋa, amma woo wee ŋau taka nŋa a kaa mà wooda.

²⁷ Ilaalu á wɛɛò inɔ kufɔi iku, amai ilaalu á wɛɛò zigiida, nɔ inɛ fei á maa yayai si ilɛu do zigiida. An kpã ŋa ijui si yaase bɛi isɛɛnɛ nŋa í yɛ. An kiiti ŋai si yaase bɛi í nɛ ku jɛ. Do yaase bɛɛbɛ, aa mà kãm kãm iyi amui ǹ jɛ Aɔ̃ Lafɛ̃ɛ.