Ezekiɛli 6 - Bibeli do fee

Ijuukpã iyi á ba woo tɔɔ iwɛ̃ ŋa

¹ Aɔ̃ Lafɛ̃ɛ í bam ide ku fɔ í ni,

² awɔ amanɛ, sinda i cɔ ikpa iri kutai Izirɛli ŋau, nɔ i fɔ idei ijuukpã iyi á na ku ba ŋa.

³ Aa sɔ̃ ŋai i ni, iŋɛ iri kutai Izirɛli ŋau, i sotĩ i gbɔ ide iyi Aɔ̃ Lafɛ̃ɛ wa sɔ̃ inɛ nŋɛ ŋa iyi à wa si geete ŋau do si lɔkɔntɔ ŋa do si lɔɔma ŋau. Í ni, amu Aɔ̃ Lafɛ̃ɛ an jɔ̀ igũ ku naa si ŋɛ nɔ ku ce nfei bi kuwee nŋɛ ŋau.

⁴ Bi ku ce kuwee nŋɛ ŋa do bi ku jo tuae nŋɛ ŋau aa lɛgɛ ŋai. An jɔ̀ inɛ nkpɔ nŋɛ ŋa a ku si wajui iwɛ̃ nŋɛ ŋau.

⁵ An jilɛ ikui inɛi Izirɛli ŋai si wajui iwɛ̃ nŋa ŋa nɔ n fangaa kũkũ nŋa ŋa n kaakoò bi kuwee nŋa ŋau.

⁶ Tengi bii inɛ ŋa à wa fei, ilu nŋa ŋau aa kpɔò bommai. Nɔ bi kuwee nŋɛ ŋau, aa lɛgɛ ŋai. Do yaase bɛɛbɛ bi ku ce kuwee nŋɛ ŋau aa kpɔò bommai. Iwɛ̃ nŋɛ ŋau aa lɛgɛ ŋai nɔ a kaa wɛɛ má. Bi ku jo tuae nŋɛ ŋau aa lɛgɛ ŋai. Nɔ mii ŋa iyi ì ce ŋa fei, aa kpa iri nŋai.

⁷ Inɛ ŋa aa kui nkpɔ nkpɔ si inɔ nŋa, nɔ do yaase bɛɛbɛ, aa mà ŋa iyi amui ǹ jɛ Aɔ̃ Lafɛ̃ɛ.

⁸ Amma an jɔ̀ inɛ gɔ ŋa a fita si igũu. Nɔ inɛ ŋa iyi à ba à fita si ŋau, an fangaa ŋai si ilɛ mmu ŋa.

⁹ Nɔ si ilɛ mmu ŋa bii aa koo a maa jɛ aruu, aa maa ye gigim wai. Aa maa ye gigii bɛi ǹ cea idɔ hai jɛ dee dee nŋa do bɛi ǹ jɔ̀ à fa ijum nŋa iyi í ya maa kãsi iwɛ̃ nŋa ŋau. Nɔ aŋa taka nŋa aa cé ara nŋa na laalɔ ŋa iyi à ceu.

¹⁰ Nɔ aa mà kãm kãm iyi amui ǹ jɛ Aɔ̃ Lafɛ̃ɛ, nɔ kù jɛ si fufui ǹ fɔ iyi laalɔ ŋau aa ba ŋa.

¹¹ Na nŋu, ide iyi amu Aɔ̃ Lafɛ̃ɛ ǹ wa n fɔ wee. Ǹ ni, ya iriɛ nɔ i cĩ isɛɛ ŋa ilɛ i ni, waiyoo, na laalɔ nla nla ŋa iyi inɛi Izirɛli ŋa à ceu, igũ do ari do bɔ̃ɔi á naa si ŋa ku kpa ŋa.

¹² Inɛ ŋa iyi à wa jĩijĩ, aa kui do bɔ̃ɔ, inɛ ŋa iyi à wa amɛɛ, aa kui si igũu, nɔ inɛ ŋa mɔ iyi à ba à fita si, arii á kpa ŋa. An jɔ̀ idɔɔkɔ̃m ku ce icɛɛ si ŋai hee kɔɔ.

¹³ Waati iyi aa yɛ iku ŋa à waa tɛ bi iwɛ̃ nŋa ŋa do bi ku ce kuwee nŋa ŋa do si geete ŋa do si iri kuta ŋa do si abɛ jĩi tũtũ ŋa do si abɛ jĩi nla nla ŋa tengi bii à ya maa jo tuae ku dɔ̃ inunu ŋau, aa mà kãm kãm iyi amui ǹ jɛ Aɔ̃ Lafɛ̃ɛ.

¹⁴ An jɔ̀ gbugbãm ku naa si ŋa. An ce nfei ilɛui nɔ n kpa inɛɛ ŋa tengi bii à wa fei hai bi gbaa iyi í wa awɔ cangai kpãai inunu hee ku bɔ ilui Ribula ikpa awɔ njɛi kpãai inunu. Do yaase bɛɛbɛ, aa mà iyi amui ǹ jɛ Aɔ̃ Lafɛ̃ɛ.