Ezekiɛli 5 - Bibeli do fee

Ilaaɔ̃ á kpã inɛi Zeruzalɛmu ŋa iju

¹ Aɔ̃ Lafɛ̃ɛ í sɔ̃m í ni, awɔ amanɛ, so lɛmu ku dɔ̃ anu ku jɛ bɛi abɛɛ i waò iriɛ do agbãɛ. Si anyiɛ, so kiloo i wã kuwoɛ nɔ i timbiɛ ikɔ mɛɛta.

² Waati iyi ajɔi iluu ku bu koeu á leekĩ, koo jo ikɔ sinteu si aninii iluu. Ikɔ minjisiau, cãa do abɛu i kaakoò iluu. Ikɔ mɛɛtasiau koo fangaaɛ si fufu nɔ n leleɛ do taakubam.

³ Bu nyankuti i woo si itĩi ibɔɛ.

⁴ Si iyi ì buu, so gɔgɔ ŋa i dasi ina i jo ŋa. Nɔ inau ku tosi inɛi Izirɛli ŋau fei.

⁵ Aɔ̃ Lafɛ̃ɛ í ni, mii iyi á ba Zeruzalɛmu ilu iyi ǹ jilɛ si aninii dimi ŋa nɔ ǹ jɔ̀ ilɛ mmu ŋa à kaakoɛu mbɛ.

⁶ Inɛɛ ŋa à kɔ̀ ku jirima woodam ŋa do idem ŋa. Laalɔ ku ce nŋa í re ti dimi mmu ŋa do ilɛ mmu ŋa iyi à waa kaako ŋa ŋau. Ntɔ ntɔ à kɔ̀ ku jirima woodam ŋa do idem ŋai.

⁷ Na nŋu, amu Aɔ̃ Lafɛ̃ɛ ǹ sɔ̃ ŋa ǹ ni, laalɔ ku ce nŋa í re ti dimi mmu ŋa iyi à waa kaako ŋa. Ntɔ ntɔ à kɔ̀ ku jirima woodam ŋa do idem ŋai, nɔ a kù jirima baa ti dimi ŋa iyi à waa kaako ŋa ŋau mɔ.

⁸ Na nŋu, amu Aɔ̃ Lafɛ̃ɛ ǹ ni, an dede si aŋa inɛi Zeruzalɛmu ŋaui n kpã ŋa iju si wajui dimi mmu ŋau.

⁹ Mii iyi n kù ce nŋa ajɔ kãma, nŋui an ce nŋa na laalɔ ku ce nŋa ŋau, nɔ n kaa n ce dimiɛ má ajɔ kãma.

¹⁰ Si inɔ iluu, baa ŋa aa maa ŋɔ ama nŋa ŋai, nɔ amu ŋa mɔ aa maa ŋɔ baa nŋa ŋai. An kiiti ŋa n kpa ŋai, nɔ n fangaa inɛ ŋa iyi à wɛɛ si hunde ŋau bii fei si andunyau.

¹¹ Si bɛi à riisi kpasɛ̃m nɔu do kuce laalɔ nŋa ŋa do iwɛ̃ nŋa ŋa, amu Aɔ̃ Lafɛ̃ɛ ǹ wa n fɔɔi do kugbasi iyi an fa wajum nii hai bi tu ŋa. N kaa n ce araare nŋa, nɔ n kaa n jɔ̀ inɛ kãma ku fita si.

¹² Bii à kpɛ̃ zamaai iluu ikɔ mɛɛta, sinteu á kui do bɔ̃ɔ do ari iyi á ce si inɔ iluu. Minjisiau do taakubai aa kpa ŋa si anyii iluu a kaakoɛ. Mɛɛtasiau mɔ an fangaa ŋai bii fei si andunyau nɔ n maa n lele ŋa do taakubam.

¹³ Aɔ̃ Lafɛ̃ɛ í ni, an nyisi idɔɔkɔ̃m nii hee kɔɔ. An sã gbesei si ŋa. Nɔ aa mà kãm kãm ŋa iyi amu Aɔ̃ Lafɛ̃ɛi ǹ ba ŋa ide ku fɔ si na iyi í jɔ̀ n kaa n maa n temuaò dee dee hai jɛ nŋau.

¹⁴ An jɔ̀ dimi mmu ŋa iyi à waa kaako iluu do inɛ ŋa iyi à too do bɛ à waa lɔ fei a yɛ í kpɔò bomma nɔ kù nɛ bɛɛrɛ má.

¹⁵ An kiiti iluu do idɔɔkɔ̃ nla nla, nɔ n yɛ taaleɛ ntɔ ntɔ. Dimi ŋa iyi à waa kaakoɛ ŋau aa maa yaakoɛi nɔ a maa buu. Amma iyi bɛi á jɛ nyinda iyi á fa laakai nŋa ku jɔ̀ njo ku mu ŋa. Amu Aɔ̃ Lafɛ̃ɛi ǹ fɔ bɛɛbɛ.

¹⁶ An jɔ̀ ari ku naa si ŋa bɛi afa ŋa iyi à ta wa a ce nfe nŋa. An ce nfei kosĩai sɔnda nŋa ŋa n jɔ̀ ari ku kpa ŋa.

¹⁷ Ari do mɛɛmu buu ŋai an jɔ̀ a naa si ŋa a kpa ama nŋa ŋa. Bɔ̃ɔ do gbugbã ku taa njɛ do igũi an jɔ̀ a naa si ŋa a ce nfe nŋa. Amu Aɔ̃ Lafɛ̃ɛi ǹ fɔ bɛɛbɛ.