Ezekiɛli 48 - Bibeli do fee

Ikpɛ̃ ŋa iyi à jɛ ti dimi ŋa iyi à wa ikpa awɔ njɛi kpãai inunu

¹ Irii dimi ŋau wee do ikpɛ̃ nŋa. Ikpɛ̃i dimii Dãa do ikpa awɔ njɛi kpãai inunui á wa fei. Itĩi kpãa iyi wa bɔ Hetilɔ̃ɔi á too do Lebo-Amati do Hasaa-Enaa hee ku bɔ kɔɔi bommai Damasi do ti Amati. Á sintii hai kɔɔi ilɛu do ikpa nunui daakɔ hee koo kãsi Tenku Nlau do ikpa nunui alɛ.

² Si cingaai kɔɔi Dãa do ikpa awɔ cangai kpãai inunu hai kɔɔi ilɛu do ikpa nunui daakɔ hee ku bɔ kɔɔi ilɛu do ikpa nunui alɛ, bɛi ikpɛ̃i Azɛɛ á wa.

³ Si cingaai ti Azɛɛu do ikpa awɔ cangai kpãai inunu hai nunui daakɔ hee ku bɔ nunui alɛ, bɛi ti Nɛfitali á wa.

⁴ Si cingaai ti Nɛfitaliu do ikpa awɔ cangai kpãai inunu hai nunui daakɔ hee ku bɔ nunui alɛ, bɛi ti Manasee á wa.

⁵ Si cingaai ti Manaseeu do ikpa awɔ cangai kpãai inunu hai nunui daakɔ hee ku bɔ nunui alɛ, bɛi ti Efaraimu á wa.

⁶ Si cingaai ti Efaraimuu do ikpa awɔ cangai kpãai inunu hai nunui daakɔ hee ku bɔ nunui alɛ, bɛi ti Rubɛ̃ɛ á wa.

⁷ Nɔ hai kɔɔi Rubɛ̃ɛ do ikpa awɔ cangai kpãai inunu hai nunui daakɔ hee ku bɔ nunui alɛ, bɛi ti Zudaa á wa.

Ikpɛ̃ iyi í ti Aɔ̃ Lafɛ̃ɛ

⁸ Si cingaai Zudaa do ikpa awɔ cangai kpãai inunu hai kɔɔi nunui daakɔ ku bɔ do ikpa Tenku Nlau do nunui alɛ, bɛi aa jɔ̀ inya gɔ iyi kusɔɛ á maa mungai do ikpɛ̃ iyi dimi fei í ba. Kucĩi inyau agbãawɔ dubu kaafɛtũi (25.000) á jɛ, nɔ kpasɛ̃i Aɔ̃ Lafɛ̃ɛu si anini bɛi á wa.

⁹ Inya iyi aa jɔ̀a Aɔ̃ Lafɛ̃ɛu, kusɔɛ agbãawɔ dubu kaafɛtũi (25.000) á jɛ, kucĩɛ agbãawɔ dubu kɔnfia (20.000).

¹⁰ Inyau bɛ iyi aa jɔ̀, ti woo wee ŋaui á jɛ. Kusɔɛ agbãawɔ dubu kaafɛtũi (25.000) á jɛ hai do ikpa nunui daakɔ hee ku bɔ ikpa nunui alɛ. Kucĩɛ mɔ agbãawɔ dubu mɛɛwai á jɛ (10.000) hai do ikpa awɔ njɛi kpãai inunu hee ku bɔ ikpa awɔ cangai kpãai inunu. Kpasɛ̃i Aɔ̃ Lafɛ̃ɛu aninii á wa.

¹¹ Inyau bɛ, ti tɔkui Sadɔku ŋa iyi à nya ikã a jɛ woo wee ŋaui á jɛ. Aŋai à ce icɛi Aɔ̃ Lafɛ̃ɛ dee dee. A kù yaa bɛi inɛi Levii ŋa waati iyi inɛi Izirɛli ŋa à sinda à toa Ilaaɔ̃ anyiu.

¹² Na ŋɔi í jɔ̀ aa na ŋa inya iyi í má ntɔ ntɔ si bantuma iyi í jɛ ti Aɔ̃ Lafɛ̃ɛu, nɔ si kɔɔi ti inɛi Levii ŋaui á wa.

¹³ Ikpɛ̃i inɛi Levii ŋau á wai si kɔɔi ti woo wee ŋau. Bantuma minjiu fei kusɔ nŋa ŋa agbãawɔ dubu kaafɛtũi (25.000) á jɛ. Kucĩ nŋa ŋa mɔ agbãawɔ dubu mɛɛwa (10.000).

¹⁴ A kaa yɔkɔ a ta inyau, a kaa yɔkɔ a kpaasiɛ, nɔ a kaa yɔkɔ a so a muaa inɛ gɔ, domi à nyaa ikãi í jɛ ti Aɔ̃ Lafɛ̃ɛ.

Ikpɛ̃ iyi á jɛ ti amanlu do ti inɛi ilu ŋau

¹⁵ Si inyau aa jɔ̀ bantuma gɔ bɛ iyi kucĩɛ agbãawɔ dubu miiui (5.000) á jɛ, kusɔɛ mɔ agbãawɔ dubu kaafɛtũ (25.000). Inyau bantuma hai mái á jɛ. Nŋui á jɛ ti iluu do bi ku jɛi mɛɛmu ŋa, nɔ iluu si aninii á wa.

¹⁶ Gontaɛ ŋau, kusɔ nŋa do kucĩ nŋa fei a maa mungai. Do awɔ njɛi kpãai inunu agbãawɔ dubu mɛɛ do cĩɔ miiu (4.500), do awɔ cangai kpãai inunu agbãawɔ dubu mɛɛ do cĩɔ miiu (4.500), do nunui daakɔ agbãawɔ dubu mɛɛ do cĩɔ miiu (4.500), do ikpa nunui alɛ agbãawɔ dubu mɛɛ do cĩɔ miiu (4.500).

¹⁷ Si gonta mɛɛi iluu, aa jɔ̀ afe gɔ bɛ, kucĩɛ agbãawɔ cĩɔ minji do ciitaai á jɛ (250).

¹⁸ Si bantuma iyi à nya ikã í jɛ ti Aɔ̃ Lafɛ̃ɛu, inya gɔ á gbe bɛ má iyi kusɔɛ agbãawɔ dubu mɛɛwai (10.000) do ikpa nunui daakɔ nɔ bɛɛbɛi aa jɔ̀ do ikpa nunui alɛ mɔ má. Amaajɛ ŋa iyi aa ya gbɛ̃ bɛ fei, ti inɛ ŋa iyi à waa ce icɛ si inɔ iluui á jɛ.

¹⁹ Inɛ ŋa iyi aa jɛ amaacɛ si inɔ iluu aŋai aa maa logooɛ. Aa naai hai si dimii inɛi Izirɛli ŋa fei.

²⁰ Bantuma iyi à jɔ̀a Aɔ̃ Lafɛ̃ɛu gonta mɛɛɛ ŋau fei aa maa mungai. Gonta akã fei agbãawɔ dubu kaafɛtũi (25.000) á jɛ. Aa kpɛ̃ bantumaui ikɔ mɛɛ, nɔ ikɔ akãi á jɛ ti iluu.

²¹ Bantuma iyi í gbeu ti amanlui á jɛ nɔ á wai si afei ti Aɔ̃ Lafɛ̃ɛu do ti inɛi ilu ŋau. Kusɔɛ á wɛɛi agbãawɔ dubu kɔnfia do miiu (25.000) do ikpa nunui daakɔ, nɔ kucĩɛ mɔ agbãawɔ dubu kɔnfia do miiui (25.000) do ikpa nunui alɛ hee ku bɔ si Tenku Nlau. Bantuma iyi à jɔ̀a Aɔ̃ Lafɛ̃ɛu do bi kuweeu, fei ndɛɛ si aninii inyaui á wa.

²² Inyai inɛi Levii ŋau do inyai inɛi ilu ŋau á kpɛ̃ ti amanluui minji. Á wai si afei ti inɛi Zudaa ŋa iyi à wa do ikpa awɔ njɛ kpãai inunuu do ti inɛi Bɛnzamɛɛ ŋa iyi à wa do ikpa awɔ cangai kpãai inunuu.

Ikpɛ̃ iyi á jɛ ti dimi ŋa iyi à wa do awɔ cangai kpãai inunu

²³ Dimi ŋa iyi à gbeu, ikpɛ̃ nŋa ŋa wee. Dimii Bɛnzamɛɛ á bubai hai do nunui daakɔ hee koo nɛ si Tenku Nlau do ikpa nunui alɛ.

²⁴ Si cingaai ti Bɛnzamɛɛ do ikpa awɔ cangai kpãai inunu, hai nunui daakɔ hee koo nɛ nunui alɛ, bɛi ti dimii Simeɔ̃ á wa.

²⁵ Si cingaai ti Simeɔ̃ do ikpa awɔ cangai kpãai inunu, bɛi ti dimii Isakaa á wa.

²⁶ Si cingaai ti Isakaa do ikpa awɔ cangai kpãai inunu, bɛi ti Zabulɔ̃ɔ á wa.

²⁷ Si cingaai ti Zabulɔ̃ɔ do ikpa awɔ cangai kpãai inunu, hai nunui daakɔ hee ku bɔ nunui alɛ bɛi ti dimii Gadi á wa.

²⁸ Kɔɔi dimii Gadi do ikpa awɔ cangai kpãai inunui á jɛ kɔɔi ilɛi inɛi Izirɛli ŋau. Á sintii hai ilui Tamaa hai nunui daakɔ ku bɔ ikpa isɔ̃i Meriba-Kadɛsi, nɔ ku mɔsi si acãi inyii Ezibitiu koo dasi Tenku Nlau.

²⁹ Ilɛ iyi iŋɛ inɛi Izirɛli ŋau aa kpɛ̃ ŋa mbɛ do kpasa nɔ dimi fei ku ba titɛɛ. Amu Aɔ̃ Lafɛ̃ɛi ǹ fɔ bɛɛbɛ.

Andɛ maateejii ilui Zeruzalɛmu

^30-31 Andɛ maateejii ilui Zeruzalɛmuu á nɛ. Andɛ akã fei á nɛ irii dimii Izirɛli akãi. Bindiu do ikpa awɔ njɛi kpãai inunu, kusɔɛ agbãawɔ dubu mɛɛ do cĩɔ miiui (4.500) á jɛ. Andɛ mɛɛtai á nɛ. Andɛ iyi í jɛ ti dimii Rubɛ̃ɛ, do ti dimii Zudaa, do ti dimii Levii.

³² Do ikpa nunui daakɔ mɔ, kusɔi bindiu agbãawɔ dubu mɛɛ do cĩɔ miiui (4.500) á jɛ. Andɛ mɛɛtai á nɛ. Andɛ iyi í jɛ ti dimii Zozɛfu do ti dimii Bɛnzamɛɛ do ti dimii Dãa.

³³ Do ikpa awɔ cangai kpãai inunu mɔ, kusɔi bindiu agbãawɔ dubu mɛɛ do cĩɔ miiui (4.500) á jɛ. Andɛ mɛɛtai á nɛ. Andɛ iyi í jɛ ti dimii Simeɔ̃ do ti dimii Isakaa do ti dimii Zabulɔ̃ɔ.

³⁴ Do ikpa nunui alɛ mɔ, kusɔi bindiu agbãawɔ dubu mɛɛ do cĩɔ miiui (4.500) á jɛ. Andɛ mɛɛtai nŋu mɔ í nɛ. Andɛ iyi í jɛ ti dimii Gadi do ti dimii Azɛɛ do ti dimii Nɛfitali.

³⁵ Kusɔi bindi iyi á kaako iluu fei, agbãawɔ dubu maatũ do mɛɛtai (18.000) á jɛ. Hai ajɔ nŋu bɛ, aa kpe iluui Aɔ̃ Lafɛ̃ɛ í wa ihɛ̃.