Ezekiɛli 47 - Bibeli do fee

Isɔ̃i kpasɛ̃i Ilaaɔ̃u

¹ Ŋɔi inɛɛu í baam wa do ikpa anu koofai kpasɛ̃i Aɔ̃ Lafɛ̃ɛu. Nɔ ǹ yɛ inyi wa sɔ̃ wa hai do lɛlɛi andɛ koofai nunui daakɔu, domi wajui kpasɛ̃u wa cɔi do ikpa nunui daakɔ. Inyiu wa cãi hai do ikpa awɔ cangai kpãai inunui kpasɛ̃u wa bɔ ikpa awɔ cangai kpãai inunu bi ku ce kuweeu.

² Ŋɔi inɛɛu í jɔ̀ ǹ fita hai do ikpa anu koofai awɔ njɛi kpãai inunu nɔ í jɔ̀ ǹ kaako ǹ bɔ hee do ikpa anu koofai nunui daakɔu. Inyiu wa cãi do ikpa awɔ cangai kpãai inunu hai bi anu koofau.

³ Inɛɛu í fita í bɔ do ikpa nunui daakɔ, nɔ wa mu ikũ si awɔ. Nɔ í wã agbãawɔ dubu akã do cingaa ikpa bɛ. Si anyiɛ í jɔ̀ ǹ lɔ si inyiu hee si ijui isɛ nɔ ǹ kua.

⁴ Ŋɔi í wã agbãawɔ dubu akã má, nɔ ǹ lɔ si inyiu má ǹ kua, nɔ inyiu í toom wa hee si ilugũ. Ŋɔi í nyi í wã agbãawɔ dubu akã má, nɔ í jɔ̀ ǹ lɔ si inyiu má ǹ kua, nɔ inyiu í toom wa hee si kpaka.

⁵ Ŋɔi í wã agbãawɔ dubu akã má, amma n kaa n yɔkɔ n kua, domi inyiu í kɔ̃ wa í naa tengi bii í gbe inɛ ku wai. Inyiu í jĩisa hee inɛ kaa yɔkɔ ku kuaɛ.

⁶ Ŋɔi í ni, awɔ amanɛ, ì yɔɔ í sĩa? Si anyiɛ, í tɛkɛɛm nɔ í baam wa má itĩi inyiu.

⁷ Waati iyi í baam wa, ǹ ba wee jĩi ŋai à wa si itĩi inyiu cingaa do cingaa fei.

⁸ Ŋɔi inɛɛu í sɔ̃m í ni, inyiu ihɛ̃ wa bɔi do ikpa nunui daakɔi ilɛu nɔ wa dasi lɔɔmai Zuudɛ̃ɛu, í koo wa lɔ si Tenku ku da Imuu. Waati iyi í lɔ si inyii tenkuu í ya kpaasi inyiui ku baa ku jɛ jiida.

⁹ Tengi bii inyiu í to fei, mii ilu hunde ikã ikã ŋa iyi à wa bɛ fei aa ya maa wɛɛi. Nɔ cɛ̃ɛ ŋa aa wa bɛi nkpɔ nkpɔ. Tengi bii inyiu í to fei, í ya kpaasi inyi ŋaui a baa a maaju, nɔ mɛɛmu ŋa a maa wɛɛ.

¹⁰ Waati bɛɛbɛ, hai Eni-Gedi hee ku bɔ Enegalaimu, sɔɔkɔ ŋa aa ya wa bɛi a maa sa taao nŋa ŋa si itĩi tenkuu. Cɛ̃ɛ ikã ikã ŋa iyi aa ba bɛ, aa yɛi bɛi cɛ̃ɛ ŋa iyi à wa si Tenku Nlau. Cɛ̃ɛ ŋau aa kpɔi ntɔ ntɔ.

¹¹ Fatama ŋa do ido ŋa iyi à wa kɔkɔɛ ŋau a kaa maaju, aa wɛɛ bɛɛbɛi na imuu.

¹² Si itĩi inyiu cingaa do cingaa fei, jĩi kuso ŋa aa fitai dimi ikã ikã fei. Wua nŋa ŋa a kaa ya gbɛ, nɔ aa ya maa soi waati kãma fei. Cukpa fei aa ya so iso titɔ̃i si na iyi í jɔ̀ inyi iyi wa cã si ŋa wa, wa naai hai si kpasɛ̃i Aɔ̃ Lafɛ̃ɛ. Iso nŋa sɔndai á jɛ, wua nŋa mɔ iwɔ.

Aɔ̃ Lafɛ̃ɛ í nya kɔɔi ilɛi Izirɛli ŋa

¹³ Aɔ̃ Lafɛ̃ɛ í ni, ilɛ iyi iŋɛ dimi maateejii inɛi Izirɛli ŋau aa kpɛ̃ ku jɛ tubu nŋɛ ŋau, kɔɔɛ ŋa wee. Dimii Zozɛfu ikpɛ̃ minjii á ba.

¹⁴ Aa kpɛ̃ ilɛu ŋai ku munga. Ntɔ ntɔ si yaase bɛi ǹ fɔ do kugbasi ǹ ni bala nŋɛ ŋai an na, bɛbɛi iŋɛi aa jɛ tubuɛ ŋa.

¹⁵ Kɔɔɛ ŋau wee. Hai do ikpa awɔ njɛi kpãai inunu, á sintii hai bi Tenku Nlau ku too kpãa iyi wa bɔ Hetilɔ̃ɔ do Lebo-Amati hee ku bɔ Sedadi.

¹⁶ Si anyiɛ á lɔi hai ilui Berɔta do Sibaraimu si afei ilɛi bommai Damasi do ilɛi Amati do ilui Hatisɛɛ-Tikɔ̃ɔ do ikpa kɔɔi ilɛi Horãau.

¹⁷ Do yaase bɛɛbɛ, kɔɔi ilɛu á bɔi hee si Tenku Nlau nɔ ku mɔsi ku bɔ hee Hasaa-Enaa ikpa nunui daakɔ. Ilɛi Damasi do Amati ŋai aa jɛ kɔɔɛ do ikpa awɔ njɛi kpãai inunu.

¹⁸ Kɔɔi nunui daakɔu á sintii si afei Damasi do Horãa nɔ á tooi do lɔɔmai Zuudɛ̃ɛu si ilɛi Galaadi do ilɛi Izirɛliu nɔ ku mɔsi ku bɔ hee ilui Tamaa hee bi Tenku ku da Imuu do ikpa nunui daakɔ.

¹⁹ Do ikpa awɔ cangai kpãai inunu mɔ, kɔɔi ilɛu á sintii hai ilui Tamaa hee ku bɔ isɔ̃i Meriba-Kadɛsi nɔ ku too acãi inyii Ezibitiu hee koo dasi Tenku Nlau. Kɔɔ iyi í wa do ikpa awɔ cangai kpãai inunuu mbɛ.

²⁰ Do ikpa nunui alɛ, Tenku Nlaui á jɛ kɔɔɛ hai ikpa awɔ cangai kpãai inunu hee ku bɔ Lebo-Amati ikpa awɔ njɛi kpãai inunu. Iyi í jɛ kɔɔu do ikpa nunui alɛ mbɛ.

²¹ Aa kpɛ̃ ilɛu ŋai si gãmɛi dimii iŋɛ inɛi Izirɛli ŋau.

²² Aa ta kpasa i kpɛ̃ò ilɛu ŋai si gãmɛ nŋɛ do si inɛ njoo ŋa iyi à wa bi tu ŋɛ iyi à bí amu ŋa si anini nŋɛ. Aa doo ŋa ŋai bɛi ilu ide ŋa si inɔi iŋɛ inɛi Izirɛli ŋau. Aŋa mɔ aa ba ikpɛ̃ nŋai bɛi dimii inɛi Izirɛli ŋau.

²³ Nɔ si bɛɛbɛ si dimi iyi inɛ njoo í wa, si dimiu bɛi aa naa ikpɛ̃ɛ. Amu Aɔ̃ Lafɛ̃ɛi ǹ fɔ bɛɛbɛ.