Ezekiɛli 46 - Bibeli do fee

Wooda iyi amanlu á ceò icɛ

¹ Aɔ̃ Lafɛ̃ɛ í ni, anu koofai bantumai inɔ kpasɛ̃u iyi í wa do ikpa nunui daakɔu, á maa cĩmboi si ajɔ mɛɛfa iyi inɛ ŋa aa maa ce icɛu. Amma aa ya cũui si ajɔi kusĩmi do si ajɔi jingaui cukpa titɔ̃.

² Amanluu á lɔ wai hai do bi andɛ koofai bantumai waduudeu nɔ ku too wa do bi ile iyi í wa kɔkɔi anu koofau. Á leekĩi kɔkɔi jĩi ndii gambou waati iyi woo wee ŋau à waa cea kuwee iyi à ya jo si ina fei sãa sãau do kuweei anu akãu. Á sɛɛbatai si anu ileu, si anyiɛ nɔ ku fita, nɔ anu koofau á maa wɛɛi a kaa cĩmboɛ hee alɛ koo lɛu.

³ Zamaai ilɛu á ya naa ku sɛɛbatai si wajui Aɔ̃ Lafɛ̃ɛ si anu koofau si ajɔi kusĩmi ŋau do si ajɔi jingaui cukpa titɔ̃ ŋau.

⁴ Kuwee iyi à ya jo si ina fei sãa sãa iyi amanluu á cea Aɔ̃ Lafɛ̃ɛ si ajɔi kusĩmiu, á cooi do ama angudã mɛɛfa iyi kãma nŋa kù nɛ leebu gɔ do angudã kombo akã má iyi kù nɛ leebu kãma gɔ.

⁵ Á nyi ku naaò iyafũi bilee efa akã wa mái si kuweei angudã kombou. Ti ama angudã ŋau mɔ, iyafũi bilee zaka bɛi á yɔkɔ. Si iyafũi bilee efa akã fei, á nyi ku dasi ikpoi olivi hini akã mái.

⁶ Si ajɔi jingaui cukpa titɔ̃ ŋau, á ce kuweei do kɛtɛ kombo akã do ama angudã mɛɛfa do angudã kombo akã iyi kãma nŋa kù nɛ leebu gɔ.

⁷ Si kɛtɛ kombo akã, do si angudã kombo akãu, iyafũi bilee efa akãi á dasi. Ti ama angudã ŋau mɔ, iyafũi bilee zaka bɛi á yɔkɔ. Si iyafũi bilee efa akã fei, á nyi ku dasi ikpoi olivi hini akã mái.

⁸ Waati iyi amanluu wa lɔ ileu, á lɔ wai hai do bi andɛ koofai bantumai waduudeu, nɔ ku fita hai do bɛ má.

⁹ Waati iyi zamaai ilɛu wa naa ku tɔɔ amu Aɔ̃ Lafɛ̃ɛ si jingau ŋau, inɛ iyi í lɔ wa hai do ikpa anu koofai awɔ njɛi kpãai inunu í naa í sɛɛbata, á fitai do ikpa anu koofai awɔ cangai kpãai inunuu. Bɛɛbɛ mɔi inɛ iyi í lɔ wa hai do ikpa awɔ cangai kpãai inunu, á fitai do ikpa awɔ njɛi kpãai inunuu. Inɛ kãma kù nɛ ku fita hai do bii í lɔò wa, amma á fitai hai do andɛ iyi aŋaò andɛ iyi ihɔ̃ à waa cɔ njɛ suusuuu.

¹⁰ Amanluu do zamaaɛ ŋa fei aa lɔi ajɔ, nɔ aŋaò ŋa fei aa fita mái ajɔ.

Wooda ŋa iyi à jɛ ti kuwee ŋa

¹¹ Si ajɔi jingau ŋa do si buki nla ŋa, aa ce kuweei do iyafũi bilee efa akã ti kɛtɛ kombo akã fei, walakɔ do ti angudã kombo akã fei. Ti ama angudã ŋau mɔ, iyafũi bilee zaka bɛi amanlu á yɔkɔ. Si iyafũi bilee efa akã fei, ikpoi olivi hini akãi aa dasi.

¹² Bii amanlu í dasi idɔ ku cea Aɔ̃ Lafɛ̃ɛ kuwee iyi à ya jo si ina fei sãa sãa, walakɔ kuweei anu akã si idɔɔbiɛ, aa cĩaa anu koofa iyi í wa ikpa nunui daakɔui. Á ce kuwee iyi à ya jo si ina fei sãa sãa do kuweei anu akãui bɛi í ya ce si ajɔi kusĩmiu, si anyiɛ á fitai nɔ a cĩmbo anu koofau.

¹³ Ajɔ fei aa ya cea Aɔ̃ Lafɛ̃ɛ kuwee iyi à ya jo si ina fei sãa sãaui do ama angudãi adɔ̃ akã iyi kù nɛ leebu kãma. Daakɔ feii aa ya coo.

¹⁴ Daakɔ fei, aa ya cea Aɔ̃ Lafɛ̃ɛ kuweei do iyafũi bilee efa akã. Aa kpɛ̃ iyafũui ikɔ mɛɛfa nɔ a so ikɔ akãi iyi aa tɔtɔɔ do ikpoi olivi hini akã iyi à kpɛ̃ mɛɛta nɔ a so ikɔ akã. Wooda gɔ mbɛ iyi á maa wɛɛ hee do ajɔ fei.

¹⁵ Kuweei ama angudã iyi à ya jo si ina fei sãa sãau do kuweei iyafũu do ti ikpoi oliviu, à nɛ a ya maa cea Aɔ̃ Lafɛ̃ɛi daakɔ fei. Aa ya maa cooi hee do ajɔ fei.

Tubui ama inɛmɔkɔi amanlu ŋau

¹⁶ Aɔ̃ Lafɛ̃ɛ í ni, bii amanlu í so ngɔgɔ iyi í nɛ í na ama akã gɔ si inɔi amaɛ ŋa, amuau á dooɛi bɛi ikpɛ̃ iyi í nɛ ku ba iyi á jɛ bɛi tubuɛ.

¹⁷ Amma bii amanlu í cea amaacɛ gɔ amua si mii ndɛɛ gɔ, amuau ti amaacɛui á jɛ hee adɔ̃i ara ku nɛ koo to wa, si anyiɛ á sindoa amanlu ndɛɛ mái. Mii iyi amanlu í nɛ, amaɛ ŋa aŋa akãi à nɛ a jɛ tubuɛ.

¹⁸ Amanlu kù nɛ ku so nkãma iyi í jɛ ti zamaau ku jɛ tubuɛ. Kù nɛ ku gba nkãma si mii ndu ŋa gɔ. Mii iyi í nɛi á kpɛ̃a amaɛ ŋa ku jɛ tubu nŋa ku ba si inɔi zamaam inɛ gɔ ku maà kua iyi í jɛ ikpɛ̃ɛ.

Bi ku tɛkɛ cakai kpasɛ̃u

¹⁹ Si anyiɛ, ŋɔi inɛɛu í jɔ̀ ǹ lɔ wa hai anu koofa iyi í wa do ikpa awɔ njɛi kpãai inunuu, nɔ í bɔòm si ile ŋa iyi à nya ikã a jɛ ti woo wee ŋau. Nɔ í nyisim inya gɔ bɛ do ikpa nunui alɛ.

²⁰ Ŋɔi í sɔ̃m í ni, inya tengi bii woo wee ŋa aa ya se iŋai mɛɛmu ŋa iyi à jɛ ti kuweei ku teese do ti kuweei dulum ŋa ku kpaui ihɛ̃. Nɔ bɛi aa ya tɛkɛ kuweei iyafũ ŋau. A kaa fitaò si bantumai waduudeu ku ba zamaau ku maà lu mii ŋa iyi à má ŋau.

²¹ Ŋɔi í fitaam si bantumai waduudeu, nɔ í bɔòm si afei gonta mɛɛi bantumau fei. Wee si gonta akã fei bantuma gɔ í wa bɛ.

²² Bantuma mɛɛ ŋau a kù la. Aŋa fei à waa mungai. Kusɔ nŋa agbãawɔ ciijii nɔ kucĩ nŋa mɔ agbãawɔ kuntaai.

²³ À ma idĩ à kaako gonta ŋau do kuta, nɔ à ma bi ku tɛkɛ caka ŋa à waa gũsi idĩu.

²⁴ Ŋɔi inɛɛu í sɔ̃m í ni, inya tengi bii woo ce icɛi kpasɛ̃ ŋau aa ya se iŋai kuwee ŋa iyi zamaau á naa ku ce mbɛ.