Ezekiɛli 45 - Bibeli do fee

Inya ŋa iyi à nya ikã

¹ Waati iyi aa na i kpɛ̃ ilɛu si dimii inɛi Izirɛli ŋau ŋa, aa nya cingaa gɔi ku jɛ ti Aɔ̃ Lafɛ̃ɛ ŋa. Inyau kusɔɛ agbãawɔ dubu kɔnfia do miiui (25.000) á jɛ, kucĩɛ agbãawɔ dubu kɔnfiai (20.000) á jɛ. Inyau fei, inya iyi í mái á jɛ.

² Si inyaui kpasɛ̃i Aɔ̃ Lafɛ̃ɛu á wa. Kusɔɛ do kucĩɛ fei agbãawɔ cĩɔ miiui á jɛ cingaa do cingaa fei. Bantuma ngbɛ iyi í kaakoɛu, kucĩɛ cingaa do cingaa fei agbãawɔ ciitaai á jɛ.

³ Si inɔi inya iyi kusɔɛ í wɛɛ agbãawɔ dubu kɔnfia do miiu, kucĩɛ mɔ agbãawɔ dubu mɛɛwaui aa nya tengi bii ile iyi í má í reu á wa.

⁴ Inyau, inya iyi í mái á jɛ si ilɛu fei. Aa nyaa ikãi ku jɛ ti woo wee ŋa iyi à waa ce icɛi Aɔ̃ Lafɛ̃ɛu si inɔ ile kumáu. Bɛi ile nŋa ŋa aa wa do kpasɛ̃i Aɔ̃ Lafɛ̃ɛu.

⁵ Inyai inɛi Levii ŋa iyi à waa ce icɛ si kpasɛ̃u, kusɔɛ agbãawɔ dubu kɔnfia do miiui (25.000) á jɛ, kucĩɛ mɔ agbãawɔ dubu mɛɛwa (10.000). Tengi bɛi aa ma ilu ŋa bii aa maa wa.

⁶ Si kusɔi inya iyi í jɛ ti Aɔ̃ Lafɛ̃ɛui aa nya inya gɔ bɛ má iyi kusɔɛ á nɛ agbãawɔ dubu kɔnfia do miiu (25.000), kucĩɛ mɔ agbãawɔ dubu miiu (5.000). Bɛi á jɛ ilu bii inɛi Izirɛli ŋa aa yɔkɔ a ce ide nŋa.

⁷ Aa nya inya gɔ bɛ má iyi á jɛ ti amanlui ilɛu. Á wai si afei cingaa minjii inyai Aɔ̃ Lafɛ̃ɛu do ilui inɛi Izirɛli ŋau. Bantumau do nunui alɛ á bɔi hee si inɔ tenku nlau. Hai do nunui daakɔ mɔ hee ku bɔ kɔɔi ilɛi Izirɛli ŋau, kusɔɛ á maa mungai do ikpɛ̃ iyi dimi ŋau à ba.

⁸ Bɛi á jɛ inyai amanlu ŋau, nɔ a kaa maa taa inɛm ŋa gbugbã má. Amma aa jɔ̀ mbɔi ilɛui na inɛi Izirɛli ŋa do dimi nŋa ŋa.

Asaiyai amanlu do icɛɛ ŋa

⁹ Ide iyi amu Aɔ̃ Lafɛ̃ɛ ǹ fɔ wee. Ǹ ni, iŋɛ amanlui Izirɛli ŋa í to i leekĩ do inɛ ŋa ku taa gbugbã do ile ku ce ŋa ŋa. I too ntɔ do dee dee ku jɛ ŋa. I maà ti i maa gba ilɛi inɛm ŋa bɛɛbɛ ŋa. Amu Aɔ̃ Lafɛ̃ɛi ǹ fɔ bɛɛbɛ.

¹⁰ I jɔ̀ kiloo nŋɛ do gũa nŋɛ ŋa ku jɛ dee dee.

¹¹ Gũa iyi à ya kpe efa iyi à ya wãò amaajɛ ŋa do iyi à ya kpe bati iyi à ya wãò mii bɛi inyi ŋa, fei ndɛɛ á maa mungai do gũa iyi à ya kpe omɛɛ iyi í jɛ akã si mɛɛwa fei.

¹² Sikilii akã gɛra kɔnfiai á jɛ. Mini akã, sikilii kitai á jɛ.

¹³ Do yaase bɛi aa ya naaò amua nŋɛ ŋa wa wee. Si amaajɛ nŋɛ ŋa, bilee walakɔ ɔɔzu, si gũai efa kita fei, akãi aa ya naaò wa ŋa.

¹⁴ Si ikpoi olivi nŋɛ ŋa mɔ, si bati cĩɔ fei, akãi aa ya naaò wa ŋa. Bii ì waa wãa si bati ŋa, bati mɛɛwa fei, omɛɛ akãi. Omɛɛu do kɔɔu fei akãi.

¹⁵ Si mɛɛmu gaa nŋɛ ŋa, iŋɛ inɛi Izirɛli ŋa, si angudã walakɔ si iwo cĩɔ minji fei, akãi aa ya kooò ŋa iyi aa ceò kuweei iyafũ walakɔ kuwee iyi à ya jo si ina fei sãa sãa walakɔ kuweei anu akã ku ba n ce nŋɛ suuru. Amu Aɔ̃ Lafɛ̃ɛi ǹ fɔ bɛɛbɛ.

¹⁶ Si ilɛi Izirɛliu inɛ baa yooma fei í nɛ ku kooò kamazaɛi bi amanlu.

¹⁷ Amanluui á ya na mii ŋa iyi aa ya ceò kuwee iyi à ya jo si ina fei sãa sãa, do kuweei iyafũ ŋa do ti atɛ̃ vɛ̃ɛ ŋa si waatii jingau ŋa iyi à jɛ ti cukpa titɔ̃, do ti ajɔi kusĩmi ŋa, do ti awaati mmu gɔ ŋa bii inɛi Izirɛli ŋau aa ya tɔtɔɔ. Amanluui á ya so asoi kuwee iyi í ya kpa idei dulum ŋa do ti iyafũ ŋa, do kuwee iyi à ya jo si ina fei sãa sãa, do ti anu akã, ku ba n cea inɛi Izirɛli ŋau suurui dulum du ŋa.

¹⁸ Aɔ̃ Lafɛ̃ɛ í nyi í ni má, si ajɔ sintei cukpa sinte, aa mu kɛtɛ kombo saasaabɔ iyi kù nɛ leebui i ceò kuwee ku ba kpasɛ̃m nɔu ku maaju.

¹⁹ Woo weeu á bu njɛi mɛɛmu iyi à ceò kuweeui ku jɔsi jĩi ndii gamboi kpasɛ̃ ŋau, do si gonta mɛɛi sɔbei bi kuweeu, do si jĩi ndii gamboi anu koofai bantumai inɔu.

²⁰ Si ajɔ mɛɛjesiai cukpau, bɛɛbɛi aa cea inɛ iyi í ce dulum iyi kù jɛ do idɔɔbiɛ walakɔ si atafiiɛ. Do yaase bɛɛbɛi aa nyaò riisii kpasɛ̃u.

²¹ Ajɔ maatɛ̃ɛsiai cukpa sinteui á jɛ jingaui Iku ku kua. Ajɔ mɛɛjei aa jɛ jingauu ŋa nɔ aa jɔɔ ŋai do pɛ̃ɛ hai nɛ levɛ̃ɛ ŋa.

²² Ajɔ nŋu bɛ, amanluu á jɔ̀ a ce kuwee do kɛtɛ komboi na dulum dii nŋu takaɛ do ti zamaai ilɛu fei.

²³ Si ajɔ mɛɛje ŋau, ajɔ akã fei, kɛtɛ kombo mɛɛje do angudã kombo mɛɛje iyi kãma nŋa kù nɛ leebu gɔi á jɔ̀ a kpa a ceò kuwee iyi à ya jo si ina fei sãa sãau. Nɔ ku jɔ̀ a kpa iwo kombo mɛɛje má iyi a kù nɛ leebu kãma gɔ ku jɛ ti kuweei dulum ku kpa.

²⁴ Si anyii nŋu, á nyi ku na iyafũi bilee efa akã mái do ikpoi olivi hini akã iyi á lesi antaii kuweei kɛtɛ kombo akã fei do angudã kombo akã do iwo kombo akã.

²⁵ Si ajɔ maatũi cukpa mɛɛjesiau, si jingauu, kuwee dimi akãui amanluu á ce si gãmɛi kuweei dulum ku kpau, do ti iyi à ya jo si ina fei sãa sãau, do ti iyafũu, do ti ikpoi oliviu.