Ezekiɛli 44 - Bibeli do fee

Anu koofai nunui daakɔi à jɔ̀ɔa amanlu

¹ Ŋɔi inɛɛu í baam wa do ikpa anu koofai waduudei kpasɛ̃u iyi í wa do ikpa nunui daakɔ. Nɔ í ba wa cĩmbo.

² Ŋɔi Aɔ̃ Lafɛ̃ɛ í sɔ̃m í ni, gambou ihɛ̃ á maa cĩmboi, a kù nɛ a cũu nɔ inɛ gɔ kaa lɔ do bɛ, domi amu Aɔ̃ Lafɛ̃ɛi Izirɛliu, hai bɛi ǹ lɔò, debɛi á maa wɛɛi do kucĩmbo.

³ Amma amanluu, si bɛi í jɛ amanlu, á yɔkɔ koo buba ku jɛ si wajui amu Aɔ̃ Lafɛ̃ɛ. Á lɔi hai do bi ile iyi í jɛ anu koofau nɔ do kpãau bɛi á fitaò.

Inɛ njoo ŋa a kaa ba a lɔ inɔi ileu

⁴ Ŋɔi inɛɛu í bɔòm do ikpa awɔ njɛi kpãai inunuu hee si anu koofau do wajui kpasɛ̃u. Nɔ ǹ yɛ amboei Aɔ̃ Lafɛ̃ɛ í kɔ̃ kpasɛ̃i Aɔ̃ Lafɛ̃ɛu. Ŋɔi ǹ gulɛ, ǹ sɛɛbata.

⁵ Ŋɔi Aɔ̃ Lafɛ̃ɛ í sɔ̃m í ni, awɔ amanɛ, ce laakai ntɔ ntɔ. Cĩ ijuɛ nɔ i sotĩ i gbɔ idei wooda ŋa do asaiya ŋa iyi ǹ wa n sɔ̃ɛ si gãmɛi idei kpasɛ̃u. Nɔ i ce laakai má ntɔ ntɔ si gãmɛi kpasɛ̃ kumáu kulɔɛ do kufitaɛ.

⁶ Sɔ̃ inɛi Izirɛli woo kɔ̀ ide ŋau iyi amu Aɔ̃ Lafɛ̃ɛ ǹ ni, laalɔ ku cei iŋɛ inɛi Izirɛli ŋau í caa.

⁷ Si waati iyi ì naa ì waa ceem kuwee do pɛ̃ɛ do ti ikpoi iŋa ŋau, do njɛi iŋa ŋau, ì jɔ̀ isɛ mmu hai ce bango ŋa à lɔ wa kpasɛ̃m à riisiɛ. Do yaase bɛɛbɛi ì bɛjɛ akabuu iyi í wa si gãmɛi awaɛ ŋa na kuce laalɔ nŋɛ ŋau.

⁸ Iŋɛ taka nŋɛ i kù na ara nŋɛ si icɛi kpasɛ̃m nɔu ku ce ŋa. Isɛ mmu ŋaui ì jɔ̀ à waa coo si agbɛ nŋɛ ŋa.

⁹ Na nŋu, amu Aɔ̃ Lafɛ̃ɛ ǹ ni, isɛ mmu kãma iyi kù ce bango nɔ kù waa jirimam, kaa lɔ inɔ kpasɛ̃m baa bii í wa bi iŋɛ inɛi Izirɛli ŋa.

Wooda iyi í jɛ ti inɛi Levii ŋa

¹⁰ Inɛi Levii ŋa iyi à fa ara nŋa hai bi tom waati iyi inɛi Izirɛli ŋa à koo à waa tɔɔ iwɛ̃ nŋa ŋau, aŋai aa so asoi kurara nŋa.

¹¹ Aŋai aa ya maa ce icɛ si inɔ kpasɛ̃m. Aŋai aa jɛ woo degbe anu koofai kpasɛ̃u, nɔ aŋai aa ya maa ce icɛ ikã ikã si inɔ kpasɛ̃u. Aŋai aa ya saka mɛɛmui kuwee ŋa iyi zamaa í naaò wa iyi aa ya jo si ina fei sãa sãa, do kuwee mmuɛ ŋau. Aa ya maa wa bɛi na icɛi zamaau.

¹² Amma si bɛi aŋa inɛi Levii ŋau à tɔɔ iwɛ̃ ŋa nɔ à jɛa inɛi Izirɛli ŋa bi ku koosɛ na kurara nŋau, amu Aɔ̃ Lafɛ̃ɛ ǹ wa n fɔi do kugbasi iyi aŋai aa so asoi kurara nŋau.

¹³ A kù nɛ a maai wa bi tom hee a ceem icɛi kuwee. A kù nɛ a maai wa si mii ŋa iyi à nya ikã à jɛ titom ŋau hee má jɛ si ile iyi í má í reu. Aŋai aa so asoi kuce laalɔ nŋa ŋau, nɔ aa yɛ anyɔ na kurara ŋa iyi à ceu.

¹⁴ Icɛ ŋa iyi à nɛ bukaataɛ si inɔ kpasɛ̃u fei, aŋai aa ya maa coo.

Wooda iyi í jɛ ti woo wee ŋa

¹⁵ Inɛi Levii woo wee ŋa iyi à jɛ tɔkui Sadɔku ŋau, aŋa iyi à ce icɛ nŋa dee dee si kpasɛ̃m waati iyi inɛi Izirɛli ŋau à toom anyi, aŋa akãi à nɛ kpãa a naa bi tom a ceem kuwee do ikpoi iŋa ŋa do njɛi iŋa ŋa. Amu Aɔ̃ Lafɛ̃ɛi ǹ fɔ bɛɛbɛ.

¹⁶ Aŋa akãu bɛi aa ya lɔ ile kumáu bi taabum nɔu ku ba a ceem kuwee. À nɛ a cooi dee dee si yaasei woodai icɛu.

¹⁷ Waati iyi aa to wa anu koofai bantumai inɔ kpasɛ̃u, ibɔ ŋa iyi à ce do ikũ ku nɛ gbugbã ŋai aa ya dasi. A kù nɛ a dasi nkãma gɔ iyi à ce do ntoi mɛɛmu ŋa waati iyi à waa ce icɛ anu koofai bantumai inɔu do si inɔi ileu.

¹⁸ Aa ya dĩ bɔngɔtɔbɛɛi acɔ iyi à ce do ikũ ku nɛ gbugbã si iri, nɔ à dasi pɛɛtu ŋa iyi à ce do ikũ ku nɛ gbugbã ŋa, nɔ a kù nɛ a dĩ kungbã ku nɛ inya gbãa ŋa si kpaka nŋa.

¹⁹ A bɛi a fita si bantumai waduude tengi bii zamaa í wau, aa ya bɔ ibɔ ŋa iyi à dasi a ceò kuweeui a jilɔɔ inɔ ile bi ku ce kuweeu, nɔ a dasi mmuɛ ŋa. Do yaase bɛɛbɛ zamaau kaa ba ku lu ibɔ kumá nŋa ŋau.

²⁰ Woo wee ŋa a kaa ya wa ntoi iri nŋa ŋa fei mam mam, amma aa ya jaai, a kaa ya jɔ̀ ku sɔ.

²¹ Kãma nŋa kù nɛ ku mɔ vɛ̃ɛ waati iyi wa lɔ si bantumai inɔ kpasɛ̃u.

²² A kù nɛ kpãa a so abo jaaɔ̃ walakɔ abo iyi mɔkɔɛ í kɔ̀siɛ. Mudɛ̃ɛ iyi kù mà mɔkɔi aa so si dimii inɛi Izirɛli ŋa walakɔ abo jaaɔ̃i woo wee gɔ.

²³ Woo wee ŋau aa ya na inɛ ŋa ikɔi si mii iyi í má do iyi kù má, si mii iyi í riisi do iyi kù riisi.

²⁴ Aŋai aa jɛ woo kiiti inɛ ŋa, nɔ aa ya cooi dee dee a maa jirimaò woodam ŋa. Aa ya jirima woodam ŋai do ikɔm ŋa si gãmɛi jingaum ŋa fei, nɔ aa ya nya ajɔi kusĩmi ŋau ikãi a jɛ titom.

²⁵ Woo wee gɔ kù nɛ ku bɔ kɔkɔi iku gɔ ku ba ku maà dasi araɛ riisi. Kɔkɔi iku ŋa iyi á yɔkɔ ku bɔi í jɛ, ti baaɛ walakɔ ti iyeɛ, walakɔ ti ama inɛmɔkɔɛ, walakɔ ti ama inaaboɛ, walakɔ ti ifɔɛ, walakɔ ti igbãɛ, walakɔ ti wecĩɛ gɔ iyi kù so mɔkɔ titã.

²⁶ Si anyiɛ í nɛ ku ce buki iyi á jɔ̀ ku maajui, nɔ ku ce ajɔ mɛɛje titã ku bɛi ku sinti icɛ.

²⁷ Ajɔ iyi á nyi ku lɔ si bantumau si inɔ ile kumáu má, á ce kuwee iyi á kpa idei dulum dɛɛi titã. Amu Aɔ̃ Lafɛ̃ɛi ǹ fɔ bɛɛbɛ.

²⁸ Iyi í jɛ ikpɛ̃i woo wee ŋau wee. Amui ǹ jɛ ikpɛ̃ nŋa. I kù nɛ i na ŋa ilɛ kãma si ilɛ iyi an na iŋɛ inɛi Izirɛli ŋau ku jɛ tubu nŋɛ ŋa. Amui ǹ jɛ tubu iyi woo wee ŋau aa ba.

²⁹ Kuweei iyafũ ŋa do mɛɛmu ŋa iyi aa ya ceem do kuwee iyi á kpa dulum ŋau do kuweei ku teese ŋaui aa ya jɛ sɔnda nŋa. Mii iyi à nya ikã í jɛ titom iyi inɛi Izirɛli ŋa a kù nɛ kpãai ku jɛɛ fei, aŋai aa ya nɔɔ.

³⁰ Si amaajɛ sinte ŋa do amani ŋa iyi inɛi Izirɛli ŋa à nya wa í jɛ titom fei, ti woo wee ŋaui á jɛ. Iŋɛ inɛi Izirɛli ŋa aa ya na woo wee ŋau iyafũ iyi í jɛ jiida í re ŋaui ku ba n wee nŋɛ si inɔ kpasɛ̃ nŋɛ ŋa.

³¹ Amma woo wee ŋau a kaa ya ŋɔ yɛi gɔ walakɔ mɛɛmu gɔ iyi í ku walakɔ iyi mɛɛmui sako gɔ í kpa.