Ezekiɛli 43 - Bibeli do fee

Aɔ̃ Lafɛ̃ɛ í baa si kpasɛ̃u

¹ Ŋɔi inɛɛu í bɔòm do ikpa andɛi nunui daakɔi kpasɛ̃u.

² Nɔ ǹ yɛ amboei Ilaaɔ̃ Lafɛ̃ɛi inɛi Izirɛli ŋau wa naa hai do ikpa nunui daakɔ. Wa ce iba aa ni ibai tenkui nɔ inya kumáɛ í bii ilɛ fei.

³ Kuyɛ iyi ǹ ceu í jɔ ti iyi ǹ ce waati iyi Aɔ̃ Lafɛ̃ɛ í naa í lɛgɛ Zeruzalɛmuu do bɛi ti waati iyi ǹ wa itĩi idoi Kebaau. Nɔ ǹ sɛɛbata ilɛ.

⁴ Ŋɔi amboei Aɔ̃ Lafɛ̃ɛu í lɔ wa inɔ kpasɛ̃u hai do ikpa andɛi nunui daakɔu.

⁵ Ŋɔi hundeu í som í bɔòm si bantumai inɔ kpasɛ̃u. Nɔ ǹ ba wee amboei Aɔ̃ Lafɛ̃ɛu í kɔ̃ inɔ ileu.

⁶ Ŋɔi ǹ gbɔ inɛ gɔ wa bam ide ku fɔ wa hai inɔ kpasɛ̃u, nɔ inɛ iyi í bɔòm bɛu wa leekĩ kɔkɔm.

⁷ Ŋɔi Aɔ̃ Lafɛ̃ɛ í sɔ̃m í ni, awɔ amanɛ, cɔ inyau ihɛ̃i kitãi bommam í wa. Bɛi an lesi isɛm. An maa n wa inɔi inɛi Izirɛli ŋai do ajɔ fei. Nɔ inɛi Izirɛli ŋa walakɔ ilaalu nŋa ŋa a kaa maa jɛ kuwɛɛ nŋa si sakara ku ce iyi í jɛ iwɛ̃ ŋa ku tɔɔ nɔ a kaa maa si ikui ilaalu nŋa ŋa ihɛ̃ má a maa bɛjɛò irim.

⁸ Ilaalu ŋau à na à ce anu koofai kaba nŋa ŋa do jĩi ndii gambo nŋa ŋa kɔkɔi ti kpasɛ̃m. Bindi akãi wa fɛɛfɛ kpasɛ̃m do kpasɛ̃ nŋa. À ce laalɔ nla nla à bɛjɛò irim. Na ŋɔi í ce si idɔɔkɔ̃m ǹ ce nfe nŋa fei mam mam.

⁹ Nsɛi inɛi Izirɛli ŋau aa jɔ̀ sakara ku ce nŋa, nɔ aa fa ikui ilaalu nŋa ŋau hai bi tom. Do yaase bɛɛbɛ an wa si anini nŋai hee do ajɔ fei.

¹⁰ Awɔ amanɛ, nyisi inɛi Izirɛli ŋau yaasei kpasɛ̃u ku ba anyɔ ku mu ŋa na kurara nŋa ŋau nɔ a cɔ yaase bɛi á jɛ.

¹¹ Bii í jɛ ntɔ ntɔ anyɔ í mu ŋa si mii ŋa iyi à cei, nyisi ŋa yaase bɛi á jɛ, hai kusɔɛ do kucĩɛ do andɛɛ ŋa, do boodaɛ ŋa yaase bɛi á jɛ fei de. Nyisi ŋa a yɔɔ nɔ i na ŋa kukɔɛ ku jɛ wooda do asaiya iyi aa too si ku ba a yɔkɔ a jirimaɛ nɔ a ceò icɛ.

¹² Wooda ku nɛ gbugbã si gãmɛi kpasɛ̃u wee. Bantuma iyi í kaakoɛu hee ku bɔ si antaii iri kutau fei, à nɛ a nyaa ikãi ku jɛ ti Aɔ̃ Lafɛ̃ɛ.

Bi ku ce kuwee do kuwee ŋa

¹³ À wã bi ku ce kuweeui do yaase bɛi à ya tako a ce kuwãi mii ŋa. Tako wo agbãawɔ akã fei í cei agbãawɔ akã do kucĩi ataawɔ akã. Isa iyi í kaako bi kuweeu kucĩɛ agbãawɔ akãi í ce. Kujĩisaɛ agbãawɔ akãi í ce. Kugbokai itĩu hai do waduude bubui agbãawɔi í ce. Kugbokai bi kuweeu takaɛ,

¹⁴ hai icuɛ wa do lɛlɛ hee ku naa ku mungaò ilɛ do lele, kugbokaɛ agbãawɔ minjii, kucĩɛ mɔ agbãawɔ akã. Si antaii icuui à ce timtim. Kugbokaɛ agbãawɔ mɛɛi. Kucĩɛ mɔ agbãawɔ akã.

¹⁵ Si antaii lelei bi kuweeu, icu alulu gɔ í wa bɛ. Kugbokaɛ agbãawɔ mɛɛi nɔ í nɛ ngo mɛɛ do lele.

¹⁶ Icui aluluu, kusɔɛ agbãawɔ maateejii, kucĩɛ mɔ agbãawɔ maateejii.

¹⁷ Timtim nɔu mɔ kusɔɛ do kucĩɛ fei wa mungai, agbãawɔ maatɛ̃ɛi cingaa do cingaa fei. À ma itĩi timtim nɔui à kaakoɛ. Si antaii itĩu, kugbokaɛ bubui agbãawɔi. Kujĩisaɛ agbãawɔ akãi. À cea bi ku tɛ ku gũ ŋai do ikpa nunui daakɔ iyi inɛ á gũ ku toò bɛ.

¹⁸ Ŋɔi inɛɛu í sɔ̃m í ni, awɔ amanɛ, gbɔ ide iyi Aɔ̃ Lafɛ̃ɛ wa sɔ̃ɛ. Aɔ̃ Lafɛ̃ɛ í ni, waati iyi aa ma bi kuweeu a tã, nɔ à bi a ce si kuwee ŋa iyi à ya jo si ina fei sãa sãa, nɔ a dikã njɛi mɛɛmu ŋa si bɛ, wooda ŋa iyi aa ya maa too si wee.

¹⁹ Aa ya na inɛi Levii woo wee ŋa iyi à jɛ inɛi nyaanzei Sadɔku ŋa kɛtɛ gombo akãi. Aŋa akãi à nɛ kpãa a naa bi titom a ce kuweeu. Amu Aɔ̃ Lafɛ̃ɛi ǹ fɔ bɛɛbɛ. Kuwee iyi aa ce do kɛtɛu, ti dulum ku kpai.

²⁰ Aa bu njɛi kɛtɛui i jɔsi ngo mɛɛ ŋau nɔ i jɔsi gonta mɛɛ ŋa iyi à wa do ilɛɛu, si anyiɛ nɔ i jɔsi itĩi bi kuweeu i kaakoɛ fei. Do yaase bɛɛbɛi aa jɔ̀ bi kuweeu ku maaju nɔ i nyaa ikã.

²¹ Kɛtɛ kombo iyi aa ceò kuwee iyi í jɛ ti dulum ku kpau, aa so iŋaui a bɔò si inya gɔ iyi à nya ikã do anyii kpasɛ̃u a koo a joo.

²² Si ajɔ minjisiaɛ, aa mu iwo kombo akãi iyi kù nɛ leebu kãma i ceò kuwee iyi í jɛ ti dulum ku kpa. Do yaase bɛɛbɛi aa jɔ̀ bi kuweeu ku maaju nɔ i nyaa ikã bɛi ì ce do kɛtɛ kombou.

²³ Waati iyi aa tã do kuweei dulum ku kpau, aa mu kɛtɛ kombo akãi iyi kù nɛ leebu kãma do angudã kombo akã iyi kù nɛ leebu kãma hai si gaaɛ

²⁴ i naaò ŋa wa bi amu Aɔ̃ Lafɛ̃ɛ. Woo wee ŋai aa fãsi ŋa imu nɔ a ceem do kuwee iyi à ya jo si ina fei sãa sãa.

²⁵ Ajɔ mɛɛjei aa ce kuwee iyi í jɛ ti dulum ku kpau ŋa. Ajɔ akã fei aa ya ce kuweeui do iwo kombo akã do kɛtɛ kombo akã do angudã kombo akã iyi kãma nŋa kù nɛ leebu gɔ.

²⁶ Ajɔ meejei aa jɔ̀ bi kuweeu ku maaju nɔ a nyaa ikã a bɛi a sinti ku ce si icɛ.

²⁷ Waati iyi ajɔ meejeu í kɔ̃, hai ajɔ mɛɛjɔsiaɛ, woo wee ŋau aa ce kuwee iyi à ya jo si ina fei sãa sãaui do ti kuweei anu akã si bi ku ce kuweeu. Do yaase bɛɛbɛ, an gba ŋɛi do inɔ akã. Amu Aɔ̃ Lafɛ̃ɛi ǹ fɔ bɛɛbɛ.