Ezekiɛli 42 - Bibeli do fee

Ile ŋa iyi à wa kɔkɔi kpasɛ̃u

¹ Ŋɔi inɛɛu í fitaam si bantumai kpasɛ̃u ikpa awɔ njɛi kpãai inunu, nɔ í bɔòm si ile ŋa iyi à wa do ikpa awɔ njɛi kpãai inunuu si wajui afe iyi í wɛɛ ngbɛu do si wajui ile iyi í wa do anyii kpasɛ̃u.

² Ileu do ikpa awɔ njɛi kpãai inunu, kusɔɛ í wɛɛi agbãawɔ cĩɔ, kucĩɛ mɔ, agbãawɔ ciitaai.

³ Cingaa akã wa cɔ afe iyi í wɛɛ ngbɛ iyi í kaako kpasɛ̃u. Afe ngbɛu kucĩɛ í wɛɛi agbãawɔ kɔnfia. Cingaa akã mɔ wa cɔ bantumai anyi iyi à tɛsi kutau. Í nɛ afe bi ku gũ ku lɔò ŋa hee ku bɔ si ile kukpɛkɛ mɛɛtasiau.

⁴ Do wajui ile ŋau ikpa bantumai inɔ kpasɛ̃u, à jɔ̀ kpãa gɔ bɛ iyi kucĩɛ í to agbãawɔ mɛɛwa, kusɔɛ agbãawɔ cĩɔ. Andɛi ile ŋau wa cɔi do ikpa awɔ njɛi kpãai inunu.

⁵ Inɔi ile ŋa iyi à wa lele ŋau à kere à re iyi à wa ilɛ ŋau do iyi à wa anini ŋau domi kpãa ŋau à gba inya í la í re si ilei ilɛ ŋau do ti anini ŋau.

⁶ Ile kukpɛkɛ mɛɛtai nɔ í nɛ kpãa bi ku too ku lɔò ŋa, amma kù nɛ sɔbe ŋa bɛi ile mmu ŋa iyi à wa si bantumau. Bɛi ì gũ ì waa koo fei, inɔ ŋau à ya kerei a maa koo ku re bii ì kita wa si inɔi anini do ti ilɛ ŋau.

⁷ Do ikpa cingaai bantumai waduudeu, bindi iyi wa too cingaa sisɔi inɔi ile ŋau, kusɔɛ agbãawɔ ciitaai.

⁸ Kusɔi inɔi ile ŋau taka nŋa agbãawɔ ciitaai. Inɔi ile ŋa iyi anu nŋa wa cɔ kpasɛ̃u, kusɔ nŋa agbãawɔ cĩɔi.

⁹ Do ilɛi ile ŋau, do cingaai nunui daakɔ, andɛ gɔ í wa bɛ ti inɛ ŋa iyi à waa naa hai do ikpa bantumai waduudeu.

¹⁰ Andɛ iyi bɛ í wai hai tengi bii bindii bantumau í sinti. Do ikpa awɔ cangai kpãai inunu, ile gɔ ŋa à wa do wajui bantumau do ile mmu gɔ mɔ iyi í wa do anyii kpasɛ̃u má.

¹¹ Si wajui ile ŋau, kpãa gɔ í wa bɛ. Ile ŋau à jɔ njɛi do ile ŋa iyi à wa ikpa awɔ njɛi kpãai inunuu. Kusɔ nŋa do kucĩ nŋa do yaase bɛi à ma ŋa do andɛ ŋau fei dimi akãi.

¹² Bɛɛbɛi andɛi ile ŋa iyi à wa do ikpa awɔ cangai kpãai inunu ŋau mɔ à yɛ. Andɛ gɔ í wa hai anu kpãau iyi í nɛ suusuu hee do wajui bindi iyi í wa ikpa nunui daakɔ hai do bii inɛ ŋa à ya lɔò wau.

¹³ Ŋɔi inɛɛu í sɔ̃m í ni, ilei awɔ njɛi kpãai inunu do ti awɔ cangai kpãai inunu ŋa iyi à waa cɔ bantumau, ile gɔ ŋai iyi à nya ikã à jɛ ti Aɔ̃ Lafɛ̃ɛ. Woo wee ŋai aa ya lɔ bɛ aŋa iyi aa yɔkɔ a jɛ sɔnda ŋa iyi à má iyi à nya ikã à jɛ ti Aɔ̃ Lafɛ̃ɛu. Tengi bɛi aa ya koo a jilɛ mii ŋa iyi à nya ikã ŋau, hai kuweei iyafũ ŋa, do kuwee ŋa iyi à jɛ ti dulum ku kpa, do kuweei ku teese ŋa.

¹⁴ Waati iyi woo wee ŋau aa lɔ inɔ ileu, a kaa fita wa hai inɔ ileu si bantumai waduudeu má. Amma tengi bɛi aa ya jilɛ ibɔ ŋa iyi à ya ceò icɛi kuweeu, domi ibɔ kumá ŋai. Ibɔ mmu ŋai aa ya dasi a bɛi a fita wa bii zamaau í wa.

Kuwãi bindii waduudeu

¹⁵ Waati iyi inɛɛu í wã ilei inɔ kpasɛ̃ ŋau í tã, ŋɔi í fitaam do ikpa andɛi nunui daakɔu. Nɔ í lɔsi bantuma iyi wa kaako kpasɛ̃u fei ku wã.

¹⁶ Do akpa ku wãui í wã cingaai nunui daakɔu, nɔ kusɔɛ í ce agbãawɔ cĩɔ miiu.

¹⁷ Í wã cingaai awɔ njɛi kpãai inunuu do akpa ku wãu, nɔ í ce agbãawɔ cĩɔ miiu.

¹⁸ Í wã cingaai awɔ cangai kpãai inunuu do akpa ku wãu, nɔ nŋu mɔ í ce agbãawɔ cĩɔ miiu.

¹⁹ Ŋɔi í sinda do cingaa nunui alɛ do akpa ku wãu, nɔ nŋu mɔ í ce agbãawɔ cĩɔ miiu.

²⁰ Í wã gonta mɛɛi bindi iyi í kaako kpasɛ̃u fei, nɔ kusɔɛ í ce agbãawɔ cĩɔ miiu, kucĩɛ mɔ agbãawɔ cĩɔ miiu. Bindiui wa fɛɛfɛ inya iyi à nya ikã í jɛ ti Aɔ̃ Lafɛ̃ɛ do inya bii zamaa í ya wau.