Ezekiɛli 41 - Bibeli do fee

¹ Si anyiɛ inɛɛu í gbã í bɔòm si inɔi ile nlau. Ŋɔi í wã idĩi andɛ bi ku too ku lɔòu. Sisimaɛ í wɛɛi agbãawɔ mɛɛfa cingaa do cingaa fei.

² Kucĩi andɛu í wɛɛi agbãawɔ mɛɛwa. Sisimai idĩi andɛu í wɛɛi agbãawɔ miiu cingaa do cingaa fei. Kusɔi ileu takaɛ í wɛɛi agbãawɔ ciiji, kucĩɛ mɔ agbãawɔ kɔnfia.

³ Si anyiɛ í bɔ hee andɛi ilaawau í wã sisimaɛ nɔ í ce agbãawɔ minji, kugbokaɛ mɔ agbãawɔ mɛɛfa. Kucĩɛ mɔ í ce agbãawɔ mɛɛje.

⁴ Ŋɔi í wã inɔi ileu takaɛ, nɔ kusɔɛ í ce agbãawɔ kɔnfia, kucĩɛ mɔ agbãawɔ kɔnfia. Nɔ í sɔ̃m í ni, ihɛ̃i í jɛ ile iyi í re do kumá.

Inɔi ileu gɔgɔ ŋa má

⁵ Ŋɔi inɛɛu í wã idĩi inɔi ileu. Sisimaɛ í wɛɛi agbãawɔ mɛɛfa. Kucĩi inɔ ŋa iyi à wa cingaaɛ à kaakoɛu à wɛɛi agbãawɔ mɛɛ mɛɛ.

⁶ Ile ŋa iyi à ma si cingaaɛ ŋau à kpɛkɛ ŋai tuuba mɛɛta. Kukpɛkɛ akã fei inɔ kuntaai í nɛ. Ile ŋau si bindii bantumai kpasɛ̃ui à waa gusi, amma kù jɛ si idĩi kpasɛ̃i Aɔ̃ Lafɛ̃ɛu takaɛ.

⁷ Zaka bɛi kukpɛkɛi ileu wa bɔ lele wa koo fei, bɛɛbɛi kucĩi inɔ ŋau wa kɔ̃ɔsi si na iyi í jɔ̀ sisimai idĩu wa kaye wa kooi. Na ŋɔi í ce bɛi ì gũ lele ì waa koo fei, kucĩi inɔu í ya maa kɔ̃ɔsii. Hai si kukpɛkɛ sinteu inɛ á yɔkɔ ku bɔ si kukpɛkɛ minjisia do mɛɛtasiau.

⁸ Ŋɔi ǹ cɔ kugbokai ile ŋa iyi à kaako kpasɛ̃i Aɔ̃ Lafɛ̃ɛu, nɔ ǹ yɛ iyi sisimai icu nŋa í to agbãawɔ mɛɛfa.

⁹ Idĩi anyii ile ŋa iyi à kaako kpasɛ̃u, sisima nŋa í to agbãawɔ miiu. Afe iyi à jɔ̀ í wɛɛ ngbɛ si aninii ile ŋa iyi à wa cingaa ŋau

¹⁰ do ile mmu ŋa iyi à kaako kpasɛ̃u, kucĩɛ í wɛɛi agbãawɔ kɔnfia.

¹¹ Ile ŋa iyi à wa cingaa ŋau à nɛ andɛ minji. Andɛ ŋau à waa cɔ do ikpa bi bantuma iyi à jɔ̀ í wɛɛ ngbɛu. Andɛ akã í wai do ikpa awɔ njɛi kpãai inunu, akã mɔ do ikpa awɔ cangai kpãai inunu. Kucĩi afe iyi í wɛɛ ngbɛ í kaako inyau, agbãawɔ miiui.

¹² Do ikpa nunui alɛi kpasɛ̃u, ile gɔ í wa bɛ wa cɔ ikpa bi afe iyi í wɛɛ ngbɛu. Kusɔɛ í wɛɛi agbãawɔ cinɛò fɛɛwa, kucĩɛ mɔ agbãawɔ kitaò fɛɛwai, nɔ sisimai idĩɛ mɔ í wɛɛi agbãawɔ miiu.

¹³ Ŋɔi inɛɛu í wã kusɔi kpasɛ̃u nɔ í ce agbãawɔ cĩɔ. Afe iyi í wɛɛ ngbɛu do ile iyi í wa do ikpa nunui alɛu do idĩɛ ŋau, aŋa mɔ à ce agbãawɔ cĩɔ.

¹⁴ Do ikpa nunui daakɔi kpasɛ̃u, í wã kusɔi kpasɛ̃u do afe ngbɛ ŋa iyi à jɔ̀ cingaa do cingaa ŋau, nɔ kusɔ nŋa í wɛɛi agbãawɔ cĩɔ.

¹⁵ Inɛɛu í nyi í wã kusɔi ile iyi í wa do anyii kpasɛ̃u má do bi ku too ŋau cingaa do cingaa fei, nɔ í ce agbãawɔ cĩɔ. Andɛ bi ku lɔi kpasɛ̃u, do inɔ nlau, do ilaawau,

Inɔi kpasɛ̃u

¹⁶ à bii ŋai do jĩi. Jĩi ndii fɛrɛnti ŋau do bi ku too ku lɔò lelei ile kukpɛkɛ ŋau, à ce ŋai do jĩi ŋa. Hai ilɛi ileu hee ku bɔ bi fɛrɛnti ŋau, à ce fei ndɛɛi do jĩi. Fɛrɛnti ŋau taka nŋa, à bii ŋai do jĩi.

¹⁷ Anyii kpasɛ̃u do inɔu, hai andɛ bi ku lɔu hee ku bɔ ilaawau, à ce si idĩ ŋau booda ŋai.

¹⁸ Fotooi serubɛ̃ɛ ŋa do amaawɔi jĩi ndii kpakpa ŋai à ce si. Amaawɔi jĩi ndii kpakpau akã fei í wai si aninii fotooi serubɛ̃ɛ minji. Serubɛ̃ɛ ŋau inɛ akã fei waju minjii í nɛ.

¹⁹ Waju akã í jɔ ti amanɛ, nɔ wa cɔ ikpa bi amaawɔi jĩi ndii kpakpau. Waju akã mɔ í jɔ ti muusu nla saasaabɔ nɔ wa cɔ ikpa bi amaawɔi jĩi ndii kpakpa do cingaa ihɔ̃. Nɔ bɛɛbɛi à coo à kaakoò kpasɛ̃u fei.

²⁰ Hai ilɛ hee ku bɔ do lelei gambo ŋau, fotooi serubɛ̃ɛ ŋa do ti amaawɔi jĩi ndii kpakpa ŋai à ce si idĩi ileu fei.

²¹ Jĩi ŋa iyi à ceò gamboi anui inɔ nlau, kusɔ nŋa do kucĩ nŋa fei wa mungai. Do wajui ile iyi í re do kumáu, aa maa yɛ ngɔgɔ bɛ í jɔ

²² bi kuwee gɔ iyi à ce do jĩi. Kugbokaɛ í wɛɛi agbãawɔ mɛɛta, kucĩɛ mɔ agbãawɔ minji. Í nɛ gonta ŋa do sɔbe, nɔ jĩi ŋa à waa masi cingaaɛ ŋa. Inɛɛu í sɔ̃m í ni, taabuu ihɛ̃i í jɛ taabu iyi à ya jilɛ si wajui Aɔ̃ Lafɛ̃ɛ.

²³ Ile iyi í máu, andɛ minjii í nɛ. Akã ti inɔ nlau, akã mɔ ti ile iyi í má í reu.

²⁴ Andɛ akã fei, gambo minjii í nɛ. Gambo ŋau à ya na a koi si njɛ.

²⁵ À ce si gamboi inɔ nlau fotooi serubɛ̃ɛ ŋa do ti amaawɔi jĩi ndii kpakpa bɛi à ce si idĩu. Do anyii andɛi ileu, à masi jĩi ŋa si itĩɛ do lele.

²⁶ Si idĩ ŋau do ikpa bi andɛu, à dasi fɛrɛnti ku nɛ annya ŋa nɔ à ce si boodai amaawɔi jĩi ndii kpakpa si bii fei.