Ezekiɛli 40 - Bibeli do fee

Ezekiɛli í sinti kuyɛ ku ce má

¹ Si adɔ̃ kɔnfia do miiusiai kumui awa inɛi Izirɛli ŋa, hai sintei adɔ̃u, si ajɔ mɛɛwasiai cukpau, adɔ̃ maatɛ̃ɛ wai ihɛ̃ dee dee iyi à jɛ Zeruzalɛmu igũ à lɛgɛɛ í ce bomma. Ajɔ nŋu bɛi Aɔ̃ Lafɛ̃ɛ í naa í som í bɔòm bɛ.

² Si kuyɛ iyi Ilaaɔ̃ í jɔ̀ ǹ ce, ǹ yɛ Ilaaɔ̃ í bɔòm ilɛi Izirɛli í koo í jilɛm hee si iri kuta kugboka gɔ. Nɔ do ikpa awɔ cangai kpãai inunu ǹ yɛ ile ŋa bɛ iyi à jɔ ilu gɔ.

³ Í gbãm í bɔòm bɛ. Inɛ gɔ í wa bɛ. Í yɛ bɛi isɔ nkpa. Wa mu ikũ ku nɛ gbugbã gɔ do akpa ku wã ilɛ si awɔɛ. Wa leekĩ kɔkɔi gambo gɔ.

⁴ Ŋɔi inɛɛu í sɔ̃m í ni, awɔ amanɛ, cĩ ijuɛ ŋa do itĩɛ ŋa. Ce laakai ntɔ ntɔ si mii ŋa iyi an nyisiɛ, domi à naaɛ wa ihɛ̃i ku ba i cɔ inyau sãa sãa. Si anyiɛ nɔ i koo i sisia inɛi Izirɛli ŋau mii iyi ì yɛ.

Bantumai kpasɛ̃i Ilaaɔ̃u do gamboi waduude ŋau

⁵ Mii iyi ǹ yɛ wee. Ǹ yɛ bindi gɔ í kaako kpasɛ̃i Ilaaɔ̃. Akpa iyi inɛ iyi ǹ yɛu wa mu, kusɔɛ í to agbãawɔ mɛɛfa. Amma agbãawɔ akã fei à kɔ̃ɔsi kucĩi ataawɔ akã. Do akpaui í wã sisimai bindiu do kugbokaɛ. Sisimai bindiu í ce akpa akã, kugbokaɛ mɔ akpa akã.

⁶ Ŋɔi í bɔ do ikpa anu koofa iyi í wa ikpa nunui daakɔu í gũ antaiɛ í wã sisimaɛ nɔ í ce akpa akã.

⁷ Si ile bii woo degbe ŋau à ya wa, akã fei kusɔɛ do kucĩɛ akpa akãi. Sisimai idĩ iyi wa fɛɛfɛ ŋa, í wɛɛi agbãawɔ miiu. Anu koofa iyi aa kãsi hee i maa lɔ inɔ ileu, akpa akãi.

^8-9 Ŋɔi mɔkɔu í wã inɔi ileu. Kugbokaɛ í wɛɛi agbãawɔ mɛɛjɔ, nɔ sisimai idĩi waduudeu í wɛɛi agbãawɔ minji. Andɛ koofa iyi í wa do ikpa inɔu, kɔkɔi ileui í wa.

¹⁰ Inɔ ile bii woo degbe ŋau à ya wa ara mɛɛfai. Do ikpa nunui daakɔi kpasɛ̃i Ilaaɔ̃i à wa nɔ fei ndɛɛ wa mungai. Inɔ mɛɛta mɛɛtai í wa cingaa do cingaai andɛi aniniu. Idĩ ŋa iyi à waa fɛɛfɛ ŋau, sisima nŋa wa mungai.

¹¹ Mɔkɔu í wã kucĩi andɛu, nɔ í ce agbãawɔ mɛɛwa, kusɔɛ mɔ agbãawɔ mɛɛwa do mɛɛta.

¹² Si wajui andɛ bii woo degbe ŋa à ya wau, afe gɔ í wa si iyi kucĩɛ do kusɔɛ cingaa do cingaa fei agbãawɔ akã akãi. Inɔ ileu akã fei í nɛ agbãawɔ mɛɛfa mɛɛfa cingaa do cingaa fei.

¹³ Ŋɔi inɛɛu í wã afe iyi í wa aninii andɛ ŋa iyi à waa cɔ njɛ ŋau, nɔ kucĩɛ í ce agbãawɔ kɔnfia do miiu.

¹⁴ Nɔ í wã inɔi ileu hee do bantumai waduudei kpasɛ̃u fei. Kucĩɛ í wɛɛi agbãawɔ kɔnfia.

¹⁵ Afe iyi í wa hai bi andɛ sintei bindii waduudeu, hee ku bɔ si andɛi bindii inɔu, agbãawɔ ciitaai.

¹⁶ Fɛrɛnti ŋa iyi à dasi annya ŋai à wa do ikpa andɛi ile bii woo degbe ŋau à ya wa do ikpa inɔ. À dasi fɛrɛnti ŋaui si idĩi inɔ ile ŋau do si idĩ ŋa iyi à waa fɛɛfɛ inɔi ile ŋau hee si idĩi andɛ sintei bantumai kpasɛ̃u fei à kaakoɛ. Nɔ à ce si bindiu boodai amaawɔi jĩi ndii kpakpa.

¹⁷ Ŋɔi inɛɛu í gbãm í bɔòm si bantumai kpasɛ̃u ikpa waduude. Bantumau à tɛsi kuta í nɛ gbugbã nɔ ile kuntaai í kaakoɛ.

¹⁸ Kutau í wai si ilɛu si anu koofau. Kugbokai kuta iyi à tɛsi ilɛu kù to ti bantumai inɔu.

¹⁹ Ŋɔi inɛɛu í wã afei bi ku lɔ iyi í wa si bindi sinteu do bindii inɔu, nɔ í ba agbãawɔ cĩɔ do ikpa nunui daakɔ. Nɔ í ba cĩɔ má do ikpa awɔ njɛi kpãai inunu.

²⁰ Ŋɔi í wã kusɔ do kucĩi anu koofa iyi í wa bantumai kpasɛ̃u ikpa waduude do ikpa awɔ njɛi kpãai inunu.

²¹ Anu koofa nlau í nɛ ile mɛɛfa bii woo degbe ŋa à ya wa. Si cingaa minjiu, cingaa akã fei ilei woo degbe mɛɛtai. Bindiu do andɛ bi ku lɔu fei à waa mungai do andɛ iyi í wa ikpa nunui daakɔu. Kugbokaɛ agbãawɔ ciitaai, kucĩɛ mɔ agbãawɔ kɔnfia do miiu.

²² Kugbokai andɛu do ti fɛrɛnti ŋau do ti boodai amaawɔi jĩi ndii kpakpa ŋau fei à waa mungai do ti andɛ iyi í wa ikpa nunui daakɔu si cingaa minji fei. I bɛi i gũ i to si anui gambo iyi í wa ikpa awɔ njɛi kpãai inunuu, aa wu isɛi tuuba mɛɛje.

²³ Si wajui andɛ iyi í wa do ikpa awɔ njɛi kpãai inunuu, andɛ mmu gɔ í wa bɛ iyi wa bɔ inɔ bantumai kpasɛ̃u, nɔ gɔgɔ mɔ í wa do ikpa nunui daakɔ. Nɔ inɛɛu í wã afe iyi í wa si anini andɛ minji ŋau, nɔ í ce agbãawɔ cĩɔ.

²⁴ Nɔ inɛɛu í bɔòm do ikpa awɔ cangai kpãai inunu, nɔ ǹ yɛ andɛ gɔ iyi wa cɔ ikpa bɛ. Nɔ í wã ile bii woo degbe ŋa à ya wau do bindiu do andɛ bi ku lɔu, nɔ í ba fei ndɛɛ wa mungai do iyi ihɔ̃ ŋau.

²⁵ Tengi bɛ mɔ, fɛrɛnti ŋa à kaako koofau do andɛ bi ku lɔu. Fɛrɛnti ŋau à yɛi bɛi ti nunui daakɔ do ti awɔ njɛi kpãai inunu ŋau. Kusɔ nŋa agbãawɔ ciitaai, kucĩ nŋa mɔ agbãawɔ kɔnfia do miiu.

²⁶ Bi ku gũ ku lɔò ileu, aa wu isɛi tuuba mɛɛje. Idĩi inɔ ŋau si cingaa minji fei, à ce si boodai amaawɔi jĩi ndii kpakpai.

²⁷ Bantumai inɔu í nɛ andɛ do ikpa awɔ cangai kpãai inunuu. Nɔ í wã afe iyi í wa si aninii andɛ minji ŋau do ikpa awɔ cangai kpãai inunu nɔ í ce agbãawɔ cĩɔ.

Bantumai inɔu do gamboɛ ŋa

²⁸ Ŋɔi inɛɛu í bɔòm hee bantumai inɔ kpasɛ̃u do ikpa andɛi awɔ cangai kpãai inunu. Í wã andɛu nɔ í ba wee wa mungai do ti bantumai waduudeu.

²⁹ Ilei woo degbe ŋau do idĩ iyi wa fɛɛfɛ inɔ ŋau do andɛ bi ku lɔu fei wa mungai do andɛ iyi ihɔ̃ ŋau. Fɛrɛnti ŋa à kaako andɛu bii fei. Kusɔɛ agbãawɔ ciitaai, kucĩɛ mɔ agbãawɔ kɔnfia do miiu.

³⁰ Kusɔi inɔ bi kuwai woo degbe ŋau, agbãawɔ kɔnfia do miiui, kucĩ nŋa mɔ agbãawɔ miiu.

³¹ Andɛi inɔu wa cɔi do ikpa bantumai waduudeu. À ce si idĩi inɔ ŋau boodai amaawɔi jĩi ndii kpakpa. I bɛi i gũ i lɔ bɛ, aa wu isɛi tuuba mɛɛjɔ.

³² Si anyiɛ nɔ í bɔòm do ikpa andɛi nunui daakɔu si bantumai inɔ kpasɛ̃u. Ŋɔi í wã andɛu nɔ í yɛ wa mungai do ti waduudeu.

³³ Ilei woo degbe ŋau do idĩ iyi wa fɛɛfɛ inɔ ŋau do andɛ bi ku lɔu fei wa mungai do andɛ iyi ihɔ̃ ŋau. Fɛrɛnti ŋa à kaako andɛu bii fei. Kusɔɛ agbãawɔ ciitaai, kucĩɛ mɔ agbãawɔ kɔnfia do miiu.

³⁴ Andɛi inɔu wa cɔi do ikpa bantumai waduudeu. À ce si idĩi inɔu boodai amaawɔi jĩi ndii kpakpa si cingaa minji fei hai bi ku lɔu. I bɛi i gũ i bɔ lele bɛ, aa wu isɛi tuuba mɛɛjɔ.

³⁵ Ŋɔi inɛɛu í bɔòm do ikpa andɛ koofai awɔi njɛi kpãai inunuu. Ŋɔi í wãa nɔ í ba wee wa mungai do ti tako ŋau fei.

³⁶ Nŋu mɔ í nɛ ilei woo degbe ŋa do idĩ iyi wa fɛɛfɛ inɔ ŋau, do andɛ bi ku lɔ ŋa nɔ fɛrɛnti ŋa à kaako andɛ ŋau bii fei. Kusɔɛ fei agbãawɔ ciitaai, kucĩɛ agbãawɔ kɔnfia do miiu.

³⁷ Andɛi inɔu wa cɔi do ikpa bantumai waduudeu. À ce si idĩi inɔu boodai amaawɔi jĩi ndii kpakpa si cingaa minji fei hai bi ku lɔu. I bɛi i gũ i to bɛ, aa wu isɛi tuuba mɛɛjɔ.

³⁸ Si andɛ koofai awɔ njɛi kpãai inunu ile akã gɔ í wa bɛ tengi bii à ya wiɛ mɛɛmu ŋa iyi à kpa iyi aa ceaò Aɔ̃ Lafɛ̃ɛ kuwee ŋa iyi à ya jo si ina fei sãa sãa.

³⁹ Si gontai ileu akã fei, taabu minjii í wa si. Si antaii taabu ŋaui à ya saka mɛɛmui kuwee ŋa iyi à ya jo si ina fei sãa sãa, do kuwee mmu ŋa iyi à jɛ ti dulum ku kpa do ti kurara ku teese.

⁴⁰ Do anyii andɛu, taabu mɛɛi í nyi í wa bɛ má. Bii inɛ wa lɔ hai do andɛi awɔ njɛi kpãai inunu, á yɛ taabu minji minji cingaa do cingaa fei.

⁴¹ Taabu mɛɛjɔi í wa bɛ si bii à ya saka mɛɛmui kuwee ŋau. À jilɛ ŋai mɛɛ mɛɛ cingaa do cingaa si anu koofau.

⁴² Taabu mɛɛ ŋa iyi à jɛ ti kuwee iyi à ya jo si ina fei sãa sãau, kutai à gbe à ce ŋa do. Kusɔɛ agbãawɔ akã do bubui, kucĩɛ mɔ agbãawɔ akã do bubui, kugbokaɛ mɔ agbãawɔ akã. Si bɛi à ya lesi jĩnɛi icɛ ŋa iyi à ya sakaò mɛɛmui kuwee ŋau.

⁴³ À ce isa ŋa iyi kucĩ nŋa í to ataawɔ si antaii taabu ŋau à kaako ŋa. Si taabu ŋaui à ya lesi iŋai kuwee ŋau.

⁴⁴ Ŋɔi inɛɛu í bɔòm si bantumai inɔu. Tengi bɛ, ǹ yɛ ilei woo kɔ̃ iri ŋa. Akã í wa do ikpa anu koofai awɔ njɛi kpãai inunu nɔ andɛɛ wa cɔ do ikpa awɔ cangai kpãai inunu. Akã mɔ í wa do ikpa awɔ cangai kpãai inunu, nɔ andɛɛ wa cɔ ikpa awɔ njɛi kpãai inunu.

⁴⁵ Ŋɔi inɛɛu í sɔ̃m í ni, ile iyi andɛɛ wa cɔ ikpa awɔ cangai kpãai inunuu ihɛ̃, ti woo wee ŋa iyi à ya maa ce icɛ si inɔ kpasɛ̃i Aɔ̃ Lafɛ̃ɛui.

⁴⁶ Ile iyi andɛɛ wa cɔ ikpa awɔ njɛi kpãai inunuu ihɛ̃ mɔ, ti woo wee ŋa iyi à ya maa ce icɛ si bi ku ce kuweeui. Si dimii Levii ŋa, amai Sadɔku ŋa aŋa akãi à nɛ kpãa a ya lɔ si ile kumáu a cea Aɔ̃ Lafɛ̃ɛ kuwee ŋau.

Yaasei kpasɛ̃i Ilaaɔ̃

⁴⁷ Ŋɔi inɛɛu í wã bantumai inɔ kpasɛ̃u. Kusɔu do kucĩu gonta mɛɛ fei wa mungai. Aŋa fei agbãawɔ cĩɔ cĩɔi à nɛ. Bi kuweeu í wai do wajui kpasɛ̃u.

⁴⁸ Ŋɔi í bɔòm andɛi kpasɛ̃u, nɔ í wã idĩi bi ku too ku lɔu. Sisima nŋa í wɛɛi agbãawɔ miiu miiu, nɔ andɛ koofau kucĩɛ í wɛɛi agbãawɔ mɛɛwa do mɛɛ, idĩi gonta ŋau à wɛɛi agbãawɔ mɛɛta mɛɛta.

⁴⁹ Kusɔi andɛi ileu í wɛɛi agbãawɔ kɔnfia, kucĩɛ mɔ agbãawɔ mɛɛwa do akã. Aa wu isɛi tuuba mɛɛwa i bɛi i lɔ inɔ ileu. Cingaa do cingaa fei í nɛ sɔbe ŋa.