Ezekiɛli 4 - Bibeli do fee

Ezekiɛli í ni aa bu ilui Zeruzalɛmu koe

¹ Awɔ amanɛ, so biiki í jilɔɔ si wajuɛ nɔ i ce si fotoo gɔ ku jɔ ilui Zeruzalɛmu.

² Si anyiɛ, nyisi iyi mbɛɛ ŋa à kaakoɛ à buu koe. Ma timtim ŋa a gũsi idĩu. Ceaa asɔi sooge ŋa do mii ku ja igũ ŋa i kaakoɛò.

³ So isɔ ku munga anu i jilɔɔ bɛi idĩ si afeɛ do iluu. Kãsi iluu iju i maa i kaakoɛò. Kuceɛui á nyisi iyi aa naa a bu ilui inɛi Izirɛli ŋau koe.

⁴ Na nŋu koo i sũ si cingaa cangaɛ, i so asoi dulum dii inɛi Izirɛli ŋau. Ajɔ zaka bɛi i sũ si cingaaɛui aa so kuwoi dulum du ŋau.

⁵ Kukpɔi ajɔu á maa mungai do kukpɔi adɔ̃i dulum du ŋa. Ajɔ cĩɔ mɛɛta do cinɛ do mɛɛwai (390) aa so asoi dulum dii inɛi Izirɛli ŋau.

⁶ Waati iyi ajɔ ŋau aa kɔ̃, aa sindai si cingaa njɛɛi nɔ i so asoi dulum dii inɛi Zudaa ŋa ajɔ ciiji. Ajɔ akã adɔ̃ akãi á jɛ.

⁷ Si anyiɛ, sinda i cɔ Zeruzalɛmu iyi à bu koeu nɔ i to siɛ awɔɛ i sɔ̃ɔ idei wahala ŋa iyi ǹ sɔ̃ɛ.

⁸ An dĩɛi do ikũ ku ba i maà yɔkɔ i sinda si cingaa ihɔ̃u, hee koo to i kpa irii waatii iluu ku bu koeu.

⁹ Nɔ i so amaajɛ ikã ikã hai bilee do ɔɔzu do ilege do lantii do iyaku do iya i tɔtɔɔɛ si jɛɛ akã i ce pɛ̃ɛ ku jɛ sɔndaɛ iyi aa maa jɛ zakai ajɔ cĩɔ mɛɛta do cinɛ do mɛɛwau (390).

¹⁰ Ajɔ akã fei, sɔndai garamu cĩɔ minjii aa ya jɛ. Nŋu bɛi á jɛ sɔndaɛ si waatiu bɛ.

¹¹ Aa ya wã inyi ku mɔɛi liiti akã si ajɔ akã fei. Nŋu bɛi á jɛ inyi ku mɔɛ si waatiu bɛ fei.

¹² Sɔndaɛu aa ya sɔ̃ kaaɛi bɛi à ya sɔ̃ kaai ɔɔzu. Aa ya sɔ̃ɔi do imii amanɛ si wajui zamaau fei.

¹³ Nɔ Aɔ̃ Lafɛ̃ɛ í ni má, do yaase bɛɛbɛi inɛi Izirɛli ŋa aa koo a maa jɛ ijɛ riisi si ilɛ mmu bii an lele ŋa a koo a wau.

¹⁴ Ŋɔi ǹ ni, Aɔ̃ Lafɛ̃ɛ ǹ mu aram nii si mii iyi kù maaju fei. N kù ŋɔ mɛɛmu gɔ iyi í ku do araɛ walakɔ iyi mɛɛmu gɔ í kpa hai awaasũm hee ku baa nnyi. Nɔ iŋa hai maaju kãma gɔ kù lɔ gɛlɛm.

¹⁵ Ŋɔi í jɛɛm í ni, imii kɛtɛi an naɛ si agbɛi ti amanɛu nɔ si bɛi aa ya tɛkɛ sɔndaɛu.

¹⁶ Ŋɔi í sɔ̃m má í ni, n kaa n jɔ̀ Zeruzalɛmu ku nɛ ijɛ do inyi. Ijɛ do inyiu, aa ya wã nŋa wai kekee kekee nɔ si zigiidai aa ya maa wa.

¹⁷ Do yaase bɛɛbɛ, ijɛ do inyi kaa wɛɛ nŋa, aŋa fei aa kua gbugbãi nɔ aa ce nfei si kurara nŋa.