Ezekiɛli 39 - Bibeli do fee

Idei ijuukpã mmu si gãmɛi Gɔgu

¹ Awɔ amanɛ, ce walii si gãmɛi Gɔgu i ni amu Aɔ̃ Lafɛ̃ɛ ǹ ni, an na n kpã awɔ iyi ì jɛ amanlui inɛi Rɔsi do Mesɛki do Tubali ŋau iju.

² An faɛ n fitaɛi do tilasi hai ilɛi ideɛ iyi í wa hee kɔɔi awɔ njɛi kpãai inunu n bɔòɛ si iri kutai Izirɛli i koo i ce igũ.

³ Si anyiɛ, an cã biooɛ hai si awɔ cangaɛ n nyɔɔ ilɛ. Nɔ afaɛ ŋa aa cukui hai si awɔ njɛɛ.

⁴ Awɔ do soogeɛ ŋa do inɛi anyiɛ ŋa aa ku ŋai si iri kutai Izirɛli ŋau. Yembeeku ŋa do yɛi ikã ikã ŋa do mɛɛmui sako ŋai aa jɛ ara iku nŋɛ.

⁵ Si gbugbãai aa cuku i ku, domi amui ǹ fɔ ide, amu Aɔ̃ Lafɛ̃ɛ.

⁶ An jɔ̀ ina ku naa si ilɛi Magɔgu do si inɛ ŋa iyi à wa gũngũm bii à waa tamaa aŋa à wɛɛò laakai ku sũ. Do yaase bɛɛbɛ, aa mà iyi amui ǹ jɛ Aɔ̃ Lafɛ̃ɛ.

⁷ An cei bɛi inɛi Izirɛli inɛm ŋau aa mà iyi amui ǹ jɛ Ilaaɔ̃ inɛ kumá. N kaa n jɔ̀ a maa yaako iri kumám má. Inɛi ilɛ mmu ŋa aa mà iyi amui ǹ jɛ Aɔ̃ Lafɛ̃ɛ inɛ kumá si ilɛi Izirɛli.

⁸ Ntɔ ntɔ, mii ŋau aa na a ce, nɔ à sinti tã. Idei ajɔi ijuukpã iyi amu Aɔ̃ Lafɛ̃ɛ ǹ fɔ ideɛu mbɛ.

⁹ Inɛi Izirɛli ŋa aa fitai hai ilu nŋa. Aa ko jĩnɛi igũ ikã ikãi mbɛɛ nŋa ŋaui a dasi ŋa ina a jo ŋa zakai adɔ̃ mɛɛje. Hai tɛli keeke do nla ŋa, hai bioo do afa ŋa, hai golo ŋa do kaka ŋa.

¹⁰ Inɛ ŋa a kaa nɛ bukaatai jĩi ku bɔ ku dɛdɛ inɔ sako má. A kaa da jĩi kãma si inɔ agbo ŋa má, domi do jĩnɛ ŋaui aa maa kòò ina. Inɛ ŋa iyi à tako à ko amani nŋa ŋau, aŋa mɔ aa ko tu ŋai. Inɛ ŋa iyi à tako à gba mii ndu nŋa ŋau, aŋa mɔ aa gba mii ndu ŋa ŋai. Amu Aɔ̃ Lafɛ̃ɛi ǹ fɔ bɛɛbɛ.

¹¹ Ajɔ nŋu bɛ, si ilɛi Izirɛli, an na Gɔgu inya gɔ bii á jɛ balɛɛ. Inyau si lɔɔmai woo bɔ ilu ŋaui do ikpa nunui daakɔi Tenku ku da Imuu. Balɛ ŋau aa kpa kpãai woo bɔ ilu ŋaui, bɛi aa si Gɔgu do zamaaɛ ŋau fei. Nɔ aa kpooi lɔɔmai zamaai Gɔgu.

¹² Inɛi Izirɛli ŋau cukpa mɛɛjei aa ce a bɛi a si zamaau, ilɛu ku bɛi ku maaju.

¹³ Ajɔ si bii an nyisi amboem nɔu, inɛi ilɛ bɛ ŋau aa na ara nŋa si icɛi kusiui, nɔ aa cooi a nya iri. Amu Aɔ̃ Lafɛ̃ɛi ǹ fɔ bɛɛbɛ.

¹⁴ Bii cukpa mɛɛjeu í lɔ, aa nya inɛ gɔ ŋa ikãi a maa dabii si ilɛu a maa dɛdɛ iku ŋa iyi a kɔ̀ a gbe si gbugbãa ŋau ku ba a si ŋa do sobii woo bɔ ilu ŋau. Bɛɛbɛi aa ce ilɛu ku bɛi ku maaju.

¹⁵ Inɛ ŋau aa maa dabii si ilɛu, nɔ bii inɛ akã nŋa gɔ í yɛ kũkũi amanɛ fei, a ya ce nyinda gɔ bɛi, ku ba woo tu isa ŋau a naa a soo a koo a suu si lɔɔmai zamaai Gɔguu.

¹⁶ Ilu gɔ á wɛɛ iyi aa kpe Hamona, waatɔ zamaa. Do yaase bɛɛbɛi aa ce a jɔ̀ ilɛu ku maaju.

¹⁷ Aɔ̃ Lafɛ̃ɛ í sɔ̃m má í ni, awɔ amanɛ, sɔ̃ yɛi ikã ikã fei do mɛɛmui sako ŋa fei i ni, i naa hai do bii fei ŋa, i tɔtɔɔ wa ku ba n ce nŋɛ kuwee. Kuwee nla nlai an ce nŋɛ si iri kutai Izirɛli ŋau. Iŋai aa ŋɔ nɔ i mɔ njɛ ŋa.

¹⁸ Iŋai arai sooge ilu wɔɔkɔ ŋai aa ŋɔ ŋa nɔ i mɔ njɛi amanlui ilɛ ŋa si agbɛi iŋai angudã kombo ŋa do ti angudã saasaabɔ ŋa do ti iwo kombo ŋa do ti kɛtɛ kombo ŋa. Aŋa fei mɛɛmu ku nɛ ikpo ŋai si ilɛi Basãa.

¹⁹ Iŋai aa ŋɔ hee i yo ŋa nɔ aa mɔ njɛ ŋai hee ku maa kpa ŋɛ si kuwee iyi an na ŋɛu.

²⁰ Si jingau nɔu, aa jɛ ŋai bɛi i bi ŋa. Aa ŋɔ iŋai acĩ ŋa do iŋai masa ŋa, do iŋai sooge ilu wɔɔkɔ ŋa, do ti sooge mmu ŋa iyi à gbe fei. Amu Aɔ̃ Lafɛ̃ɛi ǹ fɔ bɛɛbɛ.

²¹ An nyisi inɛi ilɛ mmu ŋa amboem, nɔ aa yɛ gbugbãm waati iyi an jɔ̀ ijuukpã ku naa si ŋa.

²² Hai ajɔ nŋu bɛ, inɛi Izirɛli ŋa aa mà iyi amui ǹ jɛ Aɔ̃ Lafɛ̃ɛ.

À tɔtɔɔ idei Ezekiɛli ŋau

²³ Inɛi ilɛ mmu ŋa aa mà iyi na kurara ŋa iyi inɛi Izirɛli ŋa à ce bi tom nii í jɔ̀ à mu ŋa aru à nɛò ŋa. Na kurara ŋaui í jɔ̀ ǹ sinda ǹ to nŋa anyi, nɔ ǹ jɔ̀ à dasi awɔi mbɛɛ nŋa ŋa ku ba a kpa ŋa si igũ.

²⁴ Ǹ kpã ŋa ijui si bɛi kuce hai maaju nŋa do kurara nŋa í to, nɔ ǹ sinda ǹ to nŋa anyi.

²⁵ Amma ide iyi amu Aɔ̃ Lafɛ̃ɛ ǹ wa n fɔ wee. Hai nsɛi bɛbɛi, an ce araarei inɛi Izirɛli tɔkui Zakɔbu ŋau. An jɔ̀ kuwɛɛ nŋa ku baa ku yɛ bɛi ti tako, nɔ n tilasi aŋa fei a mà bɛɛrɛi irim.

²⁶ Do yaase bɛɛbɛ, aa gbɛjɛ idei anyɔ iyi kurara ŋa iyi à ce si gãmɛm nɔu í jɔ̀ à wa siu. Aa maa wɛɛi si ilɛ nŋau do laakai ku sũ, inɛ kãma kaa na ku bitandi ŋa má.

²⁷ An jɔ̀ a fita wai hai ilɛi mbɛɛ nŋa ŋau, nɔ n tɔtɔɔ ŋa n baaò ŋa wa ilɛ nŋa. Bii ǹ ce bɛɛbɛ si gãmɛ nŋa, inɛi ilɛ mmu ŋa aa mà iyi amui ǹ jɛ Aɔ̃ Lafɛ̃ɛ inɛ kumá.

²⁸ Waati iyi an tɔtɔɔ ŋa n baaò ŋa wa si ilɛ nŋa, nɔ n maà n jɔ̀ inɛ kãma ilɛ mmu bɛ, aŋa taka nŋa aa mà iyi amui ǹ jɛ Aɔ̃ Lafɛ̃ɛi aŋa.

²⁹ An jɔ̀ hundem ku baa si inɛi Izirɛli ŋau má, nɔ n kaa n sinda n to nŋa anyi má pai. Ide iyi amu Aɔ̃ Lafɛ̃ɛ ǹ fɔ mbɛ.