Ezekiɛli 37 - Bibeli do fee

Kuyɛ si gãmɛi kũkũ ngbɛ ŋa

¹ Aɔ̃ Lafɛ̃ɛ í mum do awɔ gbugbãɛ, nɔ í jɔ̀ hundeɛ í bɔòm hee si aninii lɔɔma gɔ iyi í kɔ̃ do kũkũ ŋa.

² Aɔ̃ Lafɛ̃ɛ í jɔ̀ ǹ kaako kũkũ ŋau fei. Kũkũ ŋau à kpɔi bututu nɔ à gbɛ ntɔ ntɔ.

³ Ŋɔi Aɔ̃ Lafɛ̃ɛ í beem í ni, awɔ amanɛ, kũkũ ŋau ihɛ̃ aa yɔkɔ a baa si kuwɛɛ mbɛ má? Nɔ ǹ jɛ ǹ ni, Aɔ̃ Lafɛ̃ɛ, awɔi ì mà.

⁴ Nɔ í sɔ̃m má í ni, ce walii i sɔ̃ ŋa i ni, iŋɛ kũkũ ŋa i sotĩ i gbɔ idei Aɔ̃ Lafɛ̃ɛ ŋa.

⁵ Amu Aɔ̃ Lafɛ̃ɛ ǹ ni, an jɔ̀ hunde gɔ ku naa si ŋɛ nɔ i ba kuwɛɛ ŋa.

⁶ An da nŋɛ si atĩ ŋa, do ara baasĩ, nɔ n bii ŋɛ do bata, si anyiɛ, an da nŋɛ si ami nɔ i baa si kuwɛɛ má ŋa. Do yaase bɛɛbɛ, aa mà ŋa iyi amui ǹ jɛ Aɔ̃ Lafɛ̃ɛ ŋa.

⁷ Ǹ ba kũkũ ŋau ide ku fɔi si yaase bɛi Aɔ̃ Lafɛ̃ɛ í sɔ̃m si kuyɛu. Ŋɔi iba í ce, nɔ kũkũ ŋau à yaya à tɔtɔɔ si njɛ wa.

⁸ Nɔ ǹ ba wee à nɛ atĩ ŋa do ara baasĩ do bata iyi í bii ŋa, amma a kù nɛ hunde.

⁹ Ŋɔi Aɔ̃ Lafɛ̃ɛ í sɔ̃m si kuyɛu í ni n sɔ̃ hundei kuwɛɛu n ni, hundei kuwɛɛ, Aɔ̃ Lafɛ̃ɛ í ni n sɔ̃ɛ i naa wa hai gonta mɛɛi ilɛu i naa i lɔ si inɛ ŋa iyi à kpau nɔ a baa si kuwɛɛ má.

¹⁰ Ǹ fɔ ide iyi Aɔ̃ Lafɛ̃ɛ í sɔ̃m si kuyɛu. Ŋɔi hundeu í naa í lɔ si ŋa nɔ à baa si kuwɛɛ nɔ à dede à leekĩ. À yɛi bɛi sooge ŋa nɔ à kpɔ ntɔ ntɔ.

¹¹ Aɔ̃ Lafɛ̃ɛ í ni má, awɔ amanɛ, cɔ kũkũ ŋau bɛ fei, inɛi Izirɛli ŋa mbɛ. Inɛi Izirɛli ŋau à ni, à yɛi bɛi kũkũ ngbɛ, kpãa ku cɔ nwa í leekĩ, a kaa ka yɔkɔ ka ce nkãma má.

¹² Na nŋu, ce walii na iri nŋa. Sɔ̃ ŋa i ni amu Aɔ̃ Lafɛ̃ɛ ǹ ni, an cĩ balɛ nŋɛ ŋa, n nya iŋɛ inɛm ŋa wa hai bɛ, n baaò ŋɛ wa si ilɛi Izirɛli.

¹³ Waati iyi an cĩ balɛ nŋɛ ŋa n nya iŋɛ inɛm ŋa hai bɛ, waati bɛɛbɛi aa mà ŋa iyi amui ǹ jɛ Aɔ̃ Lafɛ̃ɛ nŋɛ.

¹⁴ An da nŋɛ si hundem, nɔ aa baa si kuwɛɛ má ŋa. An baaò ŋɛ wa si ilɛ nŋɛ. Nɔ do yaase bɛɛbɛ, aa mà ŋa iyi amui ǹ jɛ Aɔ̃ Lafɛ̃ɛ, nɔ iyi ǹ fɔ ǹ ya n cooi. Amu Aɔ̃ Lafɛ̃ɛi ǹ fɔ bɛɛbɛ.

Aɔ̃ Lafɛ̃ɛ á jɔ̀ bomma minji ŋau a nɛ anu akã

¹⁵ Aɔ̃ Lafɛ̃ɛ í sɔ̃m í ni,

¹⁶ awɔ amanɛ, so jĩi gɔ nɔ i kɔ si ide ŋau ihɛ̃, Zudaa do inɛi Izirɛli ŋa iyi à wa si bommau ihɛ̃. So jĩi mmu gɔ má, nɔ i kɔ si, Zozɛfu, walakɔ Efaraimu, do inɛi kpasɛ̃i Izirɛli ŋa iyi à wa si bommau ihɔ̃.

¹⁷ Jɔ̀ jĩi minji ŋau a masi njɛ i tɔtɔɔ ŋa a baa a jɛ akã si awɔɛ.

¹⁸ Waati iyi inɛɛ ŋa aa beeɛ à ni, i kaa sisi nwa yaasei mii nɔu bɛ?

¹⁹ Jɛ nŋa i ni amu Aɔ̃ Lafɛ̃ɛ ǹ ni, an so jĩi iyi í jɛ bɛi Zozɛfu walakɔ Efaraimu do bɛi inɛi Izirɛli ŋa iyi à jɛ bomma akãu nɔ n tɔtɔɔ ŋa do jĩi iyi í jɛ bɛi bommai Zudaau a baa a jɛ jĩi akã si awɔm.

²⁰ Jĩi ŋa iyi aa kɔ siu, si awɔɛi aa maa wa si waju nŋa bɛ.

²¹ Si anyiɛ, sɔ̃ inɛi Izirɛli ŋau iyi amu Aɔ̃ Lafɛ̃ɛ ǹ ni an nya ŋa wai hai si inɔi dimi mmu ŋa bii à wa fei, n tɔtɔɔ ŋa n baaò ŋa wa si ilɛ nŋa.

²² An jɔ̀ a na a jɛ dimi akã si ilɛu si iri kutai Izirɛli ŋau. Ilaalu akãi aa nɛ. A kaa kpɛ̃ bɛi dimi minji má, bomma akãi aa baa a jɛ.

²³ A kaa riisi ara nŋa do iwɛ̃ nŋa ŋa ku tɔɔ do kuce laalɔ nŋa ŋa do kurara ikã ikã nŋa ŋa má. An nya ŋai hai si mii ŋa iyi a kù jɛ dee dee iyi à ce, nɔ n jɔ̀ a maaju si wajum. Aa jɛ inɛm ŋa nɔ amu mɔ an jɛ Ilaaɔ̃ Lafɛ̃ɛ nŋa.

²⁴ Davidi woo ce icɛm nii á jɛ ilaalu nŋa, nŋu akãi á jɛ woo degbe nŋa. Aa maa mu kukɔi idem ŋa nɔ a maa jirima woodam ŋa a maa ceò ŋa icɛ.

²⁵ Aa bubai si ilɛ iyi ǹ na Zakɔbu woo ce icɛm nɔu tengi bii bala nŋa ŋa à bubau. Aa wa bɛi do ama nŋa ŋa do tɔku nŋa ŋa hee do ajɔ fei. Davidi woo ce icɛm nii á jɛ ilaalu nŋa do ajɔ fei.

²⁶ An dĩ akabuu do aŋa. Akabuuui á jɔ̀ a maa wɛɛò laakai ku sũ hee do ajɔ fei. An jɔ̀ a kpɔ nɔ n ce bi kuwa kumám bi tu ŋa do ajɔ fei.

²⁷ An wa si anini nŋa, n jɛ Ilaaɔ̃ Lafɛ̃ɛ nŋa, nɔ aŋa mɔ a jɛ inɛm ŋa.

²⁸ Do yaase bɛɛbɛi inɛi ilɛ mmu ŋa aa mà iyi amui ǹ jɛ Aɔ̃ Lafɛ̃ɛ nŋa. Ǹ ce bi kuwam bi tu ŋai nɔ ǹ nya ŋa ikãi a maa ceem icɛ hee do ajɔ fei.