Ezekiɛli 36 - Bibeli do fee

Inɛi Izirɛli ŋa aa baa si ilɛ nŋa má

¹ Aɔ̃ Lafɛ̃ɛ í ni, awɔ amanɛ, koo fɔ idem si gãmɛi iri kutai Izirɛli ŋau. Sɔ̃ ŋa i ni a sotĩ a gbɔ ide ŋa iyi amu Aɔ̃ Lafɛ̃ɛ ǹ wa n fɔ.

² Ǹ ni, mbɛɛ ŋa wee à fɔ à waa ni, nsɛi iri kutai takoi Izirɛli ŋau ti aŋai.

³ Na nŋu, awɔ amanɛ, koo ba ŋa ide ku fɔ. Sɔ̃ inɛi Izirɛli ŋau ide iyi amu Aɔ̃ Lafɛ̃ɛ ǹ fɔ na iri nŋa ǹ ni, ǹ yɛ hai do bii fei inɛ ŋa à dede si ŋɛ wa a naa a lele ŋɛ ku ba i dasi awɔi dimi mmu ŋa nɔ a ya maa yaako ŋɛ a maa bu ŋɛ.

⁴ Na nŋu, iŋɛ iri kutai Izirɛli ŋau i sotĩ i gbɔ ide iyi amu Aɔ̃ Lafɛ̃ɛ ǹ fɔ si gãmɛi iri kuta ŋau do si geete ŋau do si lɔɔma ŋau do si gɔlɔ ŋau do si inya ŋa iyi à kpɔò bomma ŋau, do si ilu ŋa iyi a kù nɛ amanɛ ŋa nɔ à ko mii ndu ŋa ŋau nɔ inɛi kɔkɔ nŋa ŋau à waa nyaanyi ŋau.

⁵ Ntɔ ntɔ, amu Aɔ̃ Lafɛ̃ɛ ǹ fɔ si idɔɔkɔ̃ nlam ǹ ni, an kpã ilɛ ŋa iyi à waa kaako ŋɛ ŋau iju, nɔ iyi í re mɔm ilɛi Edɔmu fei. Do inɔ didɔ̃ nla nla, do yaakoi inɛi ilɛ ŋau à gba ilɛm nɔ à ko mii ŋa iyi à wa si fei.

⁶ Awɔ amanɛ, koo i sɔ̃ iri kuta ŋau do geete ŋau do lɔɔma ŋau do gɔlɔ ŋau si ilɛi Izirɛli i ni amu Aɔ̃ Lafɛ̃ɛ ǹ ni, an nyisi ŋɛ idɔɔkɔ̃ nlam si na iyi í jɔ̀ inɛi ilɛ mmu ŋa à bu ŋɛ à yaako ŋɛ.

⁷ Na nŋu, amu Aɔ̃ Lafɛ̃ɛ ǹ ni, ilɛ ŋa iyi à waa kaako ŋɛu, aŋa mɔ aa dasi anyɔi.

⁸ Si waati nŋu bɛ, jĩi ndu ŋɛ ŋa aa ce wua ŋa nɔ aa so iso ŋa na zamaa nŋɛ. Ntɔ ntɔ, kaa kpɛ má zamaau ku nyi si ilɛɛ.

⁹ An sinda si aŋa inɛi Izirɛli ŋau wa nɔ n cɔ ŋa do iju jiida. An jɔ̀ a fa ilɛ nŋa ŋa nɔ a gbɛ̃ ŋa.

¹⁰ Si ilɛi Izirɛli fei an jɔ̀ akpɔ nŋa ku kɔ̃ɔsi. Inɛ ŋa aa baa a wa si ilu ŋau má, nɔ inya ŋa iyi à lɛgɛu aa ma ŋa má.

¹¹ Amanɛ ŋa do mɛɛmu ŋa aa kpɔ a kɔ̃ɔsii si ilɛu bii fei. Aa kpɔ, nɔ aa ba tɔku ŋa bututu. Zamaa nŋa á kpɔi bɛi ti takou, nɔ amani nŋa á re ti tako si ilɛu fei. Do yaase bɛɛbɛi, aa mà iyi amui ǹ jɛ Aɔ̃ Lafɛ̃ɛ nŋa.

¹² Inɛi Izirɛli inɛm ŋa an jɔ̀ a maa nɛi si iri kutai ilɛi Izirɛli ŋa. Aa buba si ilɛui ku jɛ tubu nŋa. Nɔ ilɛu kaa kpa amaɛ ŋa má.

¹³ Ide iyi amu Aɔ̃ Lafɛ̃ɛ ǹ wa n fɔ wee. Inɛ ŋa à ni, ilɛi Izirɛli í ya maa ŋɔ amaɛ ŋai.

¹⁴ Na nŋu, hai nsɛi, kaa ŋɔ inɛ kãma má, nɔ kaa kpa ama kãma má. Amu Aɔ̃ Lafɛ̃ɛi ǹ fɔ bɛɛbɛ.

¹⁵ N kaa n jɔ̀ ilɛu ku jɛ arabui inɛi ilɛ mmu ŋau má. Nɔ kaa jɛ yaakoi dimi mmu ŋa má. Kaa jɛ ilɛ iyi á maa kpa amaɛ ŋa má. Amu Aɔ̃ Lafɛ̃ɛi ǹ fɔ bɛɛbɛ.

Aɔ̃ Lafɛ̃ɛ á tɔtɔɔ inɛi Izirɛli ŋa má

¹⁶ Aɔ̃ Lafɛ̃ɛ í sɔ̃m í ni,

¹⁷ awɔ amanɛ, inɛi Izirɛli ŋa waati iyi à wa si ilɛ nŋau, à jɔ̀ í riisi si kuce nŋa do isɛɛnɛ nŋa. Kuce nŋau í yɛi si wajum bɛi riisii inaabo waati iyi wa ce awɔ ku mu.

¹⁸ À riisi ilɛui do njɛi inɛ ŋa iyi à kpa do iwɛ̃ ŋa ku tɔɔ. Na ŋɔi í jɔ̀ idɔɔkɔ̃m í naa si ŋa.

¹⁹ Ǹ fangaa ŋa si ilɛ mmu ŋa si inɔi dimi mmu ŋa. Ǹ kiiti ŋai si zaka bɛi kuce nŋa do isɛɛnɛ laalɔ nŋa í to.

²⁰ Si ilɛ mmu bii à to fei, irim í ya bɛjɛi na kurara nŋa. Na nŋu bɛi í jɔ̀ inɛ ŋa à ya maa ni, inɛi Ilaaɔ̃ ŋa mbɛ fa, hai si ilɛɛi à fita wa.

²¹ Ǹ nɛ inɔ kufɔ na irim iyi inɛ ŋa à waa yaako si ilɛ mmu ŋa tengi bii inɛi Izirɛli ŋa à to fei.

²² Na nŋu, sɔ̃ inɛi Izirɛli ŋau iyi amu Aɔ̃ Lafɛ̃ɛ ǹ ni, iyi an ce fei, an cooi, nɔ kù jɛ na iri nŋɛ. Amma na inɛ ŋa a mà bɛɛrɛi irim iyi ì bɛjɛ si ilɛ bii ì bɔ ŋa feiui.

²³ Iŋɛi ì bɛjɛ bɛɛrɛ nla nlai irim nɔu bi dimi mmu ŋau. Nɔ do nŋu bɛ fei, an nyisi ŋa iyi amui ǹ jɛ Ilaaɔ̃ inɛ kumá. Iŋɛi an so n nyisi ŋaò. Do yaase bɛɛbɛ, inɛ ŋau aa mà iyi amui ǹ jɛ Aɔ̃ Lafɛ̃ɛ. Amu Aɔ̃ Lafɛ̃ɛi ǹ fɔ bɛɛbɛ.

²⁴ An nya ŋɛ wai hai si inɔi dimi mmu ŋa do si ilɛ mmu ŋa bii ì wa ŋau. Nɔ an tɔtɔɔ ŋɛ wai n baaò ŋɛ wa si ilɛ nŋɛ.

²⁵ An fã si ŋɛ inyi kumá iyi á jɔ̀ i maaju ŋa. An jɔ̀ i maaju ŋai hai si riisi nŋɛ ŋa fei, do hai si riisi iyi iwɛ̃ nŋɛ ŋa à dasi ŋɛ fei.

²⁶ An mu nŋɛ idɔ titɔ̃ do hunde titɔ̃. An nya idɔ nŋɛ iyi í le bɛi kutaui, nɔ n sã nŋɛ si idɔ iyi í rɔ bɛi ara bãasĩi amanɛ.

²⁷ Hundem nii an da ŋɛ si ku ba i yɔkɔ i maa too si woodam ŋa, nɔ i maa ceò ŋa icɛ ŋa.

²⁸ Aa wa si ilɛ iyi ǹ na bala nŋɛ ŋau. Aa jɛ inɛm ŋa nɔ an jɛ Ilaaɔ̃ Lafɛ̃ɛ nŋɛ.

²⁹ An faaba ŋɛ hai si riisi ikã ikã fei. An jɔ̀ bilee nŋɛ ŋa a fita nɔ i ba amaajɛ ŋa nkpɔ nkpɔ. N kaa n jɔ̀ ari ku naa si ilɛ nŋɛ má.

³⁰ An jɔ̀ jĩi ndu ŋɛ ŋa a so nkpɔ nkpɔ, nɔ amaajɛi iko nŋɛ ŋa a ce ncɛɛ ku ba i maà na i yɛ anyɔi ari ŋa si wajui dimi mmu ŋa.

³¹ Waati bɛɛbɛ, aa ye gigii isɛɛnɛ laalɔ nŋɛ ŋa, do kuce nŋɛ ŋa iyi kù sĩa, nɔ aa nɛ inɔ kufɔ nla nla ŋa na laalɔ ŋau bɛ.

³² I jɔ̀ i mà ŋa iyi amu Aɔ̃ Lafɛ̃ɛ ǹ wa n fɔɔi iyi kù jɛ na iri nŋɛi ǹ wa n ce bɛɛbɛ. Iŋɛ inɛi Izirɛli ŋa, anyɔ í nɛ ku mu ŋɛi na kuce nŋɛ ŋau.

³³ Ŋɔi Aɔ̃ Lafɛ̃ɛ í ni má, ajɔ si bii an jɔ̀ i maaju hai si kurara nŋɛ ŋau, an jɔ̀ i nyi i kpɔ má ŋa si ilu ŋau, nɔ mii iyi à lɛgɛ fei aa teese a maa mái.

³⁴ Iko ŋa iyi à jɔ̀ a kù waa ce ŋa, aa ce ŋa má. Woo lɔ ŋa a kaa yɛ iko gɔ iyi í wɛɛ gbɛ má.

³⁵ Inɛ ŋa aa ni, ilɛ iyi à lɛgɛ í ce bommau, wee í baa í yɛ bɛi lamboi Edɛni má. Iluɛ ŋau iyi à lɛgɛ à ce bomma, à teese à ma ŋa do bindi ku nɛ gbugbã nŋa nɔ inɛ ŋa à baa à wa si má.

³⁶ Si bɛɛbɛ, inɛi ilɛ mmu ŋa iyi à kaako ŋɛ ŋau aa mà iyi amu Aɔ̃ Lafɛ̃ɛ amui ǹ teese ǹ ma ilu iyi à lɛgɛ í ce bommau, nɔ ǹ teese ǹ lɔ jĩi iyi à tuu. Amu Aɔ̃ Lafɛ̃ɛi ǹ fɔ bɛɛbɛ, nɔ bɛi ǹ fɔui an ce.

³⁷ Amu Aɔ̃ Lafɛ̃ɛ, ide iyi ǹ wa n fɔ má wee. Ǹ ni, an jɔ̀ inɛi Izirɛli ŋa a tɔɔm sobi má nɔ an jɛ nŋa n jɔ̀ a kpɔ bɛi mɛɛmu gaa ŋa.

³⁸ Si waatii jingau nla ŋa, Zeruzalɛmu í ya kɔ̃i do mɛɛmu ŋa iyi à waa naa ku ceò kuwee ŋa. Mɛɛmu gaa ŋai à ya naaò wa. Inɛ ŋa iyi aa baa a naa a wa si ilu nŋɛ ŋa iyi à tako à lɛgɛ ŋau, aa kpɔ ntɔ ntɔ bɛi mɛɛmu gaa ŋau. Do yaase bɛɛbɛ, inɛ fei á mà iyi amui ǹ jɛ Aɔ̃ Lafɛ̃ɛ.