Ezekiɛli 34 - Bibeli do fee

Ilaaɔ̃ wa gbagba si inɛ ngboi Izirɛli ŋa

¹ Aɔ̃ Lafɛ̃ɛ í bam ide ku fɔ í ni,

² awɔ amanɛ, sɔ̃ inɛ ngboi Izirɛli ŋau idei ijuukpã ŋa iyi aa naa si ŋa. Sɔ̃ ŋa iyi amu Aɔ̃ Lafɛ̃ɛ ǹ wa n fɔ ǹ ni, laalɔ á naa si iŋɛ woo degbei Izirɛli ŋau, si na iyi í jɔ̀ idei iri nŋɛi ì ya maa ce. Nɔ woo degbe, idei irii mɛɛmu ŋai í nɛ ku maa ce.

³ Wee amɔi mɛɛmu ŋaui ì ya maa mɔ ŋa, do nto nŋa ŋai ì ya ceò jĩnɛ ku dasi nŋɛ ŋa, nɔ mɛɛmu ŋa iyi à nɛ ikpo à re ŋai ì ya kpa i ceò kuwee ŋa. Amma mɛɛmu ŋau, i ci ya gbɔ nŋa ŋa.

⁴ Mɛɛmu ŋa iyi a kù nɛ gbugbã, i ci ya mu nŋa gbugbã ŋa. I ci ya gbɔa iyi a kù nɛ baani ŋa. Iyi à nɛ kumɛɛ ŋa, i ci ya da nŋa si iwɔ ŋa. Gɔgɔ ŋa iyi à ga ara nŋa à nyɔ, i ci ya dɛdɛ ŋa wa ŋa. Amma ì ya maa tɛɛsɛ ŋa ŋai nɔ ì ya maa ta nŋa gbugbã ŋai.

⁵ Mɛɛmu ŋau à fangaa si na iyi í jɔ̀ a kù nɛ woo degbe ŋa, nɔ à koo à jɛ sɔndai mɛɛmui sako ŋa.

⁶ Mɛɛmu gaam ŋau à fangaa si iri kuta ŋa do si geete ŋa fei. Mɛɛmum ŋau à fangaai si ilɛu fei, inɛ gɔ kù waa cɔ ŋa, nɔ inɛ gɔ kù bɔ ku dɛdɛ nŋa.

⁷ Na nŋu, iŋɛ woo degbei Izirɛli ŋau, i sotĩ i gbɔ iyi amu Aɔ̃ Lafɛ̃ɛ ǹ wa n fɔ ŋa.

⁸ Ǹ ni, ntɔ ntɔ hee do kuwɛɛm fei, amu Aɔ̃ Lafɛ̃ɛ ǹ wa n fɔi iyi i kù waa gbɔa mɛɛmu ŋau ŋa. Idei iri nŋɛ ŋai ì waa ce ŋa, si na iyi í jɔ̀ ì jɔ̀ mɛɛmu ŋau à fangaa à koo à dasi awɔi ile ŋa, nɔ i kù bɔ ku dɛdɛ ŋa ŋa, nɔ gɔgɔ ŋa à jɛ sɔndai mɛɛmui sako ŋa.

⁹ Na nŋu, iŋɛ woo degbei Izirɛli ŋa i sotĩ i gbɔ iyi ǹ wa n fɔ ŋa.

¹⁰ Amu Aɔ̃ Lafɛ̃ɛ, ǹ wa n fɔi iyi an sinda si iŋɛ woo degbe ŋau wa nɔ an gba mɛɛmum ŋau hai si awɔ nŋɛi. I kaa jɛ woo degbe nŋa má ŋa, nɔ i kaa ba riba nŋa i jɛ má ŋa. An gba mɛɛmum ŋau hai si awɔ nŋɛi, nɔ a kaa jɛ sɔnda nŋɛ ŋa má.

¹¹ Ntɔ ntɔ, amu Aɔ̃ Lafɛ̃ɛ, ǹ wa n fɔi iyi hai nsɛi amu takam nii an maa n degbe mɛɛmum ŋa nɔ n maa n gbɔ nŋa.

¹² Amu takam nii an tɔtɔɔ mɛɛmum ŋau wa bɛi woo degbe í ya tɔtɔɔ mɛɛmuɛ ŋa iyi à fangaa ŋau wa. An koo n dɛdɛ mɛɛmum ŋau wai hai tengi bii à fangaa à nɛu fei si ajɔi ilu kuku nla nla.

¹³ An nya ŋa wai hai si inɔi dimi mmu ŋa, n tɔtɔɔ ŋa wa hai ilɛ mmu ŋa n baaò ŋa si ilɛ nŋa, nɔ n gbã ŋa n bɔò ŋa si iri kutai Izirɛli ŋa do si lɔɔma ŋau do si inya bii inɛ ŋa à ya wa si ilɛu.

¹⁴ An bɔò ŋai si inyai sɔnda jiida si iri kutai Izirɛli ŋau. Tengi bɛi aa ya ba a sũ si inya jiida, nɔ aa ya ba sɔnda jiida a jɛ si iri kutai Izirɛli ŋau.

¹⁵ Amui an ya n maa n gbã mɛɛmu ŋau, nɔ amui an ya n dasi ŋa aro. Amu Aɔ̃ Lafɛ̃ɛi ǹ fɔ bɛɛbɛ.

¹⁶ An ya n koo n dɛdɛ mɛɛmu iyi í nyɔ wai do iyi í ga araɛ í nɛ bii gɔ. Mɛɛmu iyi í ba kumɛɛ, an daa si iwɔi, iyi kù waa nɛ baani, an jɔ̀ ku ba irii. Amma iyi í la wa nɛ baani, nɔ í nɛ gbugbã, an kpaai. An maa n degbe mɛɛmu ŋaui si dee dee ku jɛ.

Aɔ̃ Lafɛ̃ɛ í naa ku faaba inɛɛ ŋa

¹⁷ Amu Aɔ̃ Lafɛ̃ɛ, ide iyi ǹ wa n fɔ si gãmɛi mɛɛmum ŋau wee. An kiiti mɛɛmu gaam ŋau n fɛɛfɛ angudã kombo ŋa do iwo kombo ŋa.

¹⁸ Na mii í ce si inɔ nŋɛ inɛ gɔ ŋa fɔfɔ jiida iyi à ba à waa jɛ si inya jiidau kù waa to ŋa. Na mii í ce à waa jojo si fɔfɔ iyi í gbeu. Na mii í ce inyi jiida iyi ì ba ì waa mɔ ŋau kù waa to ŋɛ. Na mii í ce ì waa fɔ inyi iyi i kù mɔ ŋau do kutɛ nŋɛ ŋa.

¹⁹ Mɛɛmum ŋa iyi à gbe ŋau, tilasi fɔfɔ ŋa iyi à tɛɛsɛui aa ŋɔ nɔ a mɔ inyi iyi à fɔu.

²⁰ Na nŋu, amu Aɔ̃ Lafɛ̃ɛ, ǹ fɔ n ni, amu takam nii an fɛɛfɛ mɛɛmu ŋa iyi à la à nɛ ikpo do mɛɛmu ŋa iyi à gbɛ.

²¹ Mɛɛmu hai nɛ gbugbã ŋau ì tale ŋa do banga do cingaa ì nya ŋa hai si inɔ gaau ŋa nɔ ì cã ŋa do ngo nŋɛ ŋa ì lele ŋa ŋa.

²² An faaba mɛɛmum ŋa ku ba a maà dasi awɔi ile ŋa. Nɔ an kiiti iŋɛò ŋa feii.

²³ Woo degbe akãi an jilɛ nŋa iyi á maa gbã ŋa nɔ ku maa gbɔ nŋa. Woo ce icɛm Davidii á jɛ woo degbe nŋa, nŋui á maa cɔ mɛɛmu gaam ŋau.

²⁴ Amu Aɔ̃ Lafɛ̃ɛi an jɛ Ilaaɔ̃ Lafɛ̃ɛ nŋa, nɔ Davidi woo ce icɛm mɔi á jɛ ilaalu nŋa. Amu Aɔ̃ Lafɛ̃ɛi ǹ fɔ bɛɛbɛ.

²⁵ An dĩ akabuui laakai ku sũi do mɛɛmu gaam ŋa. An lele mɛɛmu buu ŋaui hai si ilɛu. Do yaase bɛɛbɛ, mɛɛmu gaam ŋa aa ba a wɛɛi do laakai ku sũ si gbaa, nɔ a ya maa sũ si abɛ wua ŋa.

²⁶ An jɔ̀ a wai kɔkɔi iri kuta iyi à nya ikã í jɛ titom nɔu. An ya n jɔ̀ ijĩ ku rɔi si waati iyi í jɔ nɔ nŋui á jɛ kuwee nŋa.

²⁷ Jĩi ŋa aa soi, ilɛ á ce amaajɛi, nɔ inɛ baa yooma fei á maa wɛɛi do laakai ku sũ si ilɛu. An da sesee iyi à dĩò inɛm ŋaui, nɔ n nya ŋa hai si aru ku jɛ. Do yaase bɛɛbɛ, inɛ ŋa aa mà iyi amui ǹ jɛ Aɔ̃ Lafɛ̃ɛ.

²⁸ Isɛ mmu ŋa a kaa ko mii ndu ŋa ŋa má. Mɛɛmu kugaabu ŋa a kaa ŋɔ ŋa má. Aa maa wɛɛi do laakai ku sũ nɔ inɛ kãma kaa da zigi nŋa má.

²⁹ An mu nŋa ilɛ ŋa iyi à nɛ taasi jiida nɔ a kaa nɛ wahalai ari si ilɛu má. Nɔ inɛi ilɛ mmu kãma kaa maa yaako ŋa má.

³⁰ Inɛ fei á mà iyi amu Aɔ̃ Lafɛ̃ɛ ǹ wɛɛ do ŋa, nɔ ntɔ ntɔ aŋa inɛi Izirɛli ŋau, inɛm ŋai. Amu Aɔ̃ Lafɛ̃ɛi ǹ fɔ bɛɛbɛ.

³¹ Ntɔ ntɔ, iŋɛ amanɛ ŋa, iŋɛi ì jɛ bɛi mɛɛmu gaam ŋa iyi ǹ wa n gbɔa. Amui ǹ jɛ Aɔ̃ Lafɛ̃ɛ nŋɛ. Amu Aɔ̃ Lafɛ̃ɛi ǹ fɔ bɛɛbɛ.