Ezekiɛli 33 - Bibeli do fee

Aɔ̃ Lafɛ̃ɛ í jilɛ Ezekiɛli í jɛ bɛi woo kɛɛma

¹ Aɔ̃ Lafɛ̃ɛ í bam ide ku fɔ í ni,

² awɔ amanɛ, ye inɛi Izirɛli ŋau gigii mii iyi í ya ce waati iyi amu ǹ jɔ̀ igũ í dede si ilɛ gɔ. Inɛi ilɛ ŋau à ya so inɛ gɔi si inɔ nŋa ku jɛ woo kɛɛma nŋa.

³ Bii woo kɛɛmau í yɛ mbɛɛ ŋa à waa naa si ilɛu, í ya fã kuui ku fa laakai zamaau.

⁴ Inɛ iyi í gbɔ imui kuuu nɔ í ce si atafii nɔ í ku si igũu, ikuɛ í jɛ idei iriɛ.

⁵ Á kui si na iyi í jɔ̀ í gbɔ imui kuuu nɔ í ce si atafii. Bii kù ce si atafii wo kaa ku.

⁶ Amma bii woo kɛɛmau í yɛ mbɛɛ ŋa à waa naa nɔ kù fã kuuu kù fa laakai zamaau, nɔ igũu í naa í kpa inɛ gɔ, ikui inɛɛu kurarai woo kɛɛmaui á jɛ nɔ nŋui an bee idei ikui inɛɛu.

⁷ Awɔ amanɛ, ǹ jilɛɛi i jɛ woo kɛɛmai inɛi Izirɛli ŋau. Aa ya gbɔ ide iyi ǹ wa n sɔ̃ɛi nɔ i koo i sɔ̃ inɛi Izirɛli ŋau i faò laakai nŋa.

⁸ Waati iyi ǹ ni inɛ laalɔ gɔ á ku, bii i kù sɔ̃ɔ ku ce laakai do kpãa iyi wa mu, á kui si kuraraɛ, nɔ ikuɛu á jɛ idei iriɛ.

⁹ Amma bii ì fa laakaiɛ si kpãa iyi wa mu, nɔ kù jɔ̀ kpãau, á kui si kuraraɛ, nɔ awɔ aa ya kuwɛɛɛ.

Inɛ laalɔ iyi í nyi wa bi Ilaaɔ̃ á ba kuwɛɛ

¹⁰ Awɔ amanɛ, inɛi Izirɛli ŋa à ya fɔ a maa ni, kurara nwa ŋa do dulum du wa ŋa à waa tɛ̀ wa. Nɔ na nŋu ŋau bɛi í jɔ̀ à waa wũ. Bɛirei aa ka ce ka yɔkɔ ka maa wɛɛ.

¹¹ Na nŋu, koo i sɔ̃ ŋa iyi amu Aɔ̃ Lafɛ̃ɛ ǹ ni, hee do kuwɛɛm fei, n kù bi ikui inɛ laalɔ. Iyi ǹ bii í jɛ, ku jɔ̀ kpãa laalɔɛ nɔ ku wɛɛ. Iŋɛ inɛi Izirɛli ŋa, i jɔ̀ laalɔ ku ce nŋɛ. Na mii í jɔ̀ ì waa bi i ku ŋa.

¹² Awɔ amanɛ, sɔ̃ inɛɛ ŋau má i ni, dee dee kú jɛi inɛ dee dee kaa faabaɛ si ajɔ iyi á na ku ce kurara. Nɔ inɛ laalɔ iyi í jɔ̀ laalɔ ku ce, laalɔ iyi í ce wou kaa jɔ̀ ku ku. Dee dee ku jɛi inɛ dee dee kaa faabaɛ si ajɔ iyi í na í ce dulum.

¹³ Bii ǹ sɔ̃ inɛ dee dee gɔ ǹ ni á maa wɛɛ, bii í tamaa si dee dee ku jɛi nŋu í to, nɔ í lɔsi laalɔ ku ce, a kaa ye gigii mii jiida iyi í ce má si na iyi í jɔ̀ í lɔsi laalɔ ku ce, nɔ nŋui á jɔ̀ ku ku.

¹⁴ Bii ǹ sɔ̃ inɛ laalɔ gɔ ǹ ni á ku, bii í jɔ̀ laalɔu nɔ wa ce iyi í jɛ dee dee do iyi í jɛ ntɔ, kaa ku.

¹⁵ Bii í sindo tɔɔma iyi wa mu, walakɔ bii í sindo mii iyi í ce ile, bii wa too si bɛi wooda í ni, nɔ kù ce kurara gɔ má, á maa wɛɛi kaa ku.

¹⁶ A kaa ye gigii laalɔ kãma gɔ iyi inɛ laalɔ í ce, bii í na wa ce iyi í jɛ dee dee do iyi í jɛ ntɔ bɛi wooda í fɔ. Kaa ku, á maa wɛɛi.

¹⁷ Inɛɛ ŋau aa maa ni, kuce iyi Aɔ̃ Lafɛ̃ɛ wa ceu kù sĩa. Amma kuce nŋaui kù sĩa.

¹⁸ Bii inɛ dee dee í jɔ̀ jiida ku ce nɔ í na wa ce laalɔ á kui na nŋu bɛ.

¹⁹ Bii inɛ laalɔ í jɔ̀ laalɔ iyi wa ce, bii wa nɛ si dee dee ku jɛ do si ntɔ, á maa wɛɛi na nŋu bɛ.

²⁰ Iŋɛ inɛi Izirɛli ŋa, ì waa ni ŋa, kucei amu Aɔ̃ Lafɛ̃ɛ kù sĩa. I jɔ̀ i mà ŋa iyi an kiiti inɛ baa yooma feii si yaasei kuceɛ.

Ilɛi Izirɛli á lɛgɛ

²¹ Si adɔ̃ maateejisiai kumui awa inɛi Izirɛli ŋa si ajɔ miiusiai cukpa mɛɛwasiaɛ, inɛ gɔ iyi í ba í fita si waati iyi mbɛɛ ŋa à naa si Zeruzalɛmu, í naa í sɔ̃m í ni, iluu í cuku.

²² Alɛ ajɔ nŋu hee ku maa to wa, Aɔ̃ Lafɛ̃ɛ í jɔ̀ gbugbãɛ í naa sim. Waati iyi inɛɛu í naa í to wa bi tom daadaakɔ, Aɔ̃ Lafɛ̃ɛ í cĩ gɛlɛm, ǹ yɔkɔ ǹ fɔ ide, domi n ci ya n fɔ ide wo.

²³ Ŋɔi Aɔ̃ Lafɛ̃ɛ í sɔ̃m í ni,

²⁴ awɔ amanɛ, inɛ ŋa iyi à gbe si ilu ŋa iyi à lɛgɛ si ilɛi Izirɛliu à waa ni, Aburahamu nŋu akãi, do nŋu fei í gba ilɛu fei í buba si. Awai à kpɔ à re, nɔ awa feii à na ilɛu í jɛ tu wa.

²⁵ Na nŋu, sɔ̃ ŋa iyi amu Aɔ̃ Lafɛ̃ɛ ǹ ni, ì ya maa ŋɔ iŋa do njɛ ajɔ, ì ya maa tɔɔ iwɛ̃ ŋa nɔ ì ya maa kpa inɛ ŋa. Bɛirei í ce ì fɔ ì waa ni, ilɛu tu ŋɛi.

²⁶ Taakuba nŋɛi ì ya maa kaaba ŋa. Ì ya maa ce laalɔ ikã ikã ŋa. Ì ya maa sũò aboi inɛ mmu ŋa. Nɔ do yaase bɛɛbɛi ì waa lasabu ilɛu ku jɛ tu ŋɛ?

²⁷ Na nŋu, sɔ̃ ŋa iyi amu Aɔ̃ Lafɛ̃ɛ ǹ fɔ ǹ ni, hee do kuwɛɛm fei, inɛ ŋa iyi à wa si ilu ŋa iyi à lɛgɛu, aa kpa ŋai do taakuba. Inɛ ŋa iyi à wa inɔ sako, mɛɛmui sako ŋai aa kpa ŋa. Inɛ ŋa mɔ iyi à waa manji si iri kuta ŋa do si isai kuta ŋa, bɔ̃ɔi á kpa ŋa.

²⁸ An jɔ̀ ilɛu ku kpɔò bomma. Gbugbãɛu iyi í jɔ̀ inɛɛ ŋa à nɛ faauu á kpa irii. Iri kutaɛ ŋau aa gbe ngbɛi, nɔ inɛ kãma kaa ya too do bɛ má.

²⁹ Waati iyi an jɔ̀ ilɛu ku kpɔò bomma mam mam n kpãò inɛi Izirɛli ŋa iju na daa sãmi nŋa, waati nŋui aa mà iyi amui ǹ jɛ Aɔ̃ Lafɛ̃ɛ.

³⁰ Awɔ amanɛ, inɛi Izirɛli inɛɛ ŋau aa maa fɔ idei si anyii bindi ŋa do si anu koofa ŋa. Aa sɔ̃ njɛi si gãmɛɛ a maa ni, i naa wa ŋa kaa gbɔ ide iyi wa naa hai bi Aɔ̃ Lafɛ̃ɛ.

³¹ Inɛ ŋau à ya naa a tɔtɔɔ si wajuɛ a de siɛ itĩ a maa gbɔ ideɛ. Amma a ci ya ce iyi ì waa sɔ̃ ŋau. Lasabu nŋa do mii iyi à bii à ya maa ce.

³² Bi tu ŋa, ì yɛi bɛi woo kɔ̃ iri iyi í mà iri ku kɔ̃ nɔ í nɛ imu didɔ̃. À ya gbɔ ide iyi ì waa sɔ̃ ŋa, amma a ci ya ceò icɛ.

³³ Waati iyi mii ŋau aa na a to wa, nɔ à waa to wa tã, waati bɛɛbɛ, aa mà iyi walii gɔ í wa si inɔ nŋa.