Ezekiɛli 32 - Bibeli do fee

À kɔ̃a inɛi Ezibiti ŋa do ilaalu nŋa irii akũ

¹ Si adɔ̃ maateejisiai kumui inɛi Izirɛli ŋa, si ajɔ sintei cukpa maateejisiaɛ, Aɔ̃ Lafɛ̃ɛ í bam ide ku fɔ í ni,

² awɔ amanɛ, kɔ̃ irii akũ si gãmɛi ilaalui Ezibiti. Si iri ku kɔ̃u aa nii, ì yɛ bɛi muusu nla saasaabɔ si inɔi inɛ ŋa, nɔ ì yɛi má bɛi annyɛi iyi í wa inɔ tenku. Ì ya maa yaga inyii ido nlaui, i maa fɔɔ do kutɛɛ ŋa, nɔ i jɔ̀ ku riisi.

³ Na nŋu, Aɔ̃ Lafɛ̃ɛ í ni, waati iyi zamaa á tɔtɔɔ nkpɔ nkpɔ, an sɔ taaom wa siɛi nɔ a faɛ wa ice si inɔ taaou.

⁴ An jɔ̀ a na a nyɔɛ ilɛi. Aa nyɔɛi si inɔ iko ŋa nɔ yɛi ŋa do mɛɛmui sako ŋa fei a naa a ŋɔ iŋaɛ.

⁵ Mbɔi araɛ ŋa iyi aa gbe ŋau, an jɔ̀ a koo a dikãɛi si iri kuta ŋa do si lɔɔma ŋa bii fei.

⁶ An jɔ̀ ilɛ ku mɔ njɛɛ. Njɛɛu á bii hee do iri kuta ŋa fei, nɔ gɔlɔ ŋa aa kɔ̃i do njɛɛu.

⁷ Waati iyi i kaa wɛɛ má, an jɔ̀ ilu kuku ku ce lelei, nɔ inya kumái leleaɔ̃ ŋau kaa wɛɛ. Kudũi ijĩi á bii inunu nɔ inya kumái cukpa kaa wɛɛ.

⁸ Na iriɛi an jɔ̀ inya kumá kaa wa lele má, nɔ ilɛɛu si ilu kuku nla nlai á wa. Amu Aɔ̃ Lafɛ̃ɛi ǹ fɔ bɛɛbɛ.

⁹ Waati iyi an jɔ̀ laabaaui kucukuɛu ku to hee si ilɛ ŋa iyi a kù màɛ, zamaa nkpɔ nkpɔi á wa si biti.

¹⁰ Ntɔ ntɔ, zamaau á wa si biti na iriɛ, nɔ ilaalu nŋa ŋa aa maa yayai do njo waati iyi aa yɛ taakubam nɔu. Inɛ fei idei iriɛi á maa ce si ajɔi kucukuɛu.

¹¹ Aɔ̃ Lafɛ̃ɛ í ni, woo ja igũi ilaalui Babilɔni ŋai aa naa siɛ.

¹² An jɔ̀ zamaaɛ nkpɔ ku ku si igũu. Ilu gbugbãi ilɛ mmu ŋai aa kpa ŋa. Aa leekĩ faaui Ezibitiui nɔ zamaa nkpɔɛu fei á ce nfei.

¹³ An kpa irii mɛɛmuɛ ŋa iyi à wa itĩi idou feii. Isɛi amanɛ do kɔwei mɛɛmu kãma kaa fɔ inyiu má.

¹⁴ An jɔ̀ inyii ido nŋau ku sũi nɔ ku maa cã bɛi ikpo. Amu Aɔ̃ Lafɛ̃ɛi ǹ fɔ bɛɛbɛ.

¹⁵ Waati iyi an jɔ̀ ilɛi Ezibitiu ku kpɔò gbaa, nɔ n jɔ̀ mii iyi í nɛ fei hee do amanɛ ŋa iyi à wa bɛ fei a kpa iri, inɛ ŋa aa mà iyi amui ǹ jɛ Aɔ̃ Lafɛ̃ɛ.

¹⁶ Irii akũu bɛi ama mudɛ̃ɛi ilɛ mmu ŋa aa kɔ̃. Aa kɔ̃ɔi na Ezibiti do na zamaaɛ fei. Amu Aɔ̃ Lafɛ̃ɛi ǹ fɔ bɛɛbɛ.

Kukpatai inɔ kufɔi dimi ŋa iyi à kãmia

¹⁷ Si adɔ̃ maateejisiai kumui inɛi Izirɛli ŋau, si ajɔ maatũsiai cukpa maateejisiaɛ, Aɔ̃ Lafɛ̃ɛ í bam ide ku fɔ í ni,

¹⁸ awɔ amanɛ, kpataa zamaai Ezibitiu. Kukpataɛu ku jɔ̀ nŋu do inɛi ilɛ mmu ŋa iyi à jɛ ilu gbugbã ŋau a dasi bi kuwai iku ŋa lɛlɛi ilɛ bii inɛ ŋa iyi à ku ŋau à wa.

¹⁹ Sɔ̃ ŋa i ni, ì waa tamaa bɛi bɛɛrɛ nŋɛ í re ti inɛ mmu ŋa iyi à gbeui? Aa bɔ mbɛ hee bi kuwai iku ŋa nɔ i koo i maa sũ bɛ do inɛ ŋa iyi a kù ce bango ŋa iyi à kpa si igũ.

²⁰ Ntɔ ntɔ, inɛi Ezibiti ŋau aa ce nfei si igũ. À teese anui taakuba ŋau tã ku ba a ce nfei soogei Ezibiti ŋau.

²¹ Hai si bi kuwai iku ŋau, woo ja igũ ilu wɔɔkɔ ŋau do woo sobi inɛi Ezibiti ŋau aa fɔi a maa ni, hai ce bango ŋa iyi à ku si igũu à to wa à waa sũ si inɔ nwa.

²² Ihɛ̃i ilaalui Asiri í sũ nŋu do zamaaɛ ŋa. Balɛi woo ja igũɛ ŋa à kaakoɛ, aŋa fei si igũi à kpa ŋa.

²³ Balɛ nŋa ŋau à wa hee lɛlɛ bi kuwai iku ŋa. Nɔ balɛi sooge ŋau à kaako ti ilaaluui. Aŋa fei si igũi à ku, aŋa iyi à ya maa da zigii inɛ ŋa si andunya wo.

²⁴ Ihɛ̃i ilaalui Elamu do woo ja igũɛ ŋa fei à sũ. Balɛi woo ja igũɛ ŋau à kaako titɛɛ. Aŋa fei à kui si igũ. Hai ce bango ŋa iyi à ya maa da zigii inɛ ŋa si andunyau à bɔi hee lɛlɛ bi kuwai iku ŋau. À wa si anyɔ do inɛ ŋa iyi à wa bi kuwai iku ŋau.

²⁵ Ilaalui Elamuu wa sũi do woo ja igũɛ ŋa do inɛ ŋa iyi à ku si igũu. Balɛi soogeɛ ŋaui à kaako titɛɛ. Hai ce bango ŋau fei à ku si igũ. Aŋa iyi à ya maa da zigii inɛ ŋa si andunya wo, nsɛi wee à waa sũ do anyɔ do inɛ mmu ŋa iyi à kpa si igũu.

²⁶ Bɛi ilaalu Mesɛki do Tubali do woo ja igũ nŋa ŋa à sũ. Balɛi woo ja igũ nŋa ŋai à kaako tu ŋau. Hai ce bango ŋau fei à kui si igũu. Aŋai à ya maa da zigii inɛ ŋa si andunya wo.

²⁷ A kù si ŋa do sooge kaasãanɛi tako ŋa iyi à ya maa ce igũu. Hai ce bango ŋa iyi à ya maa da zigii inɛ ŋa si andunyau, à kui nɔ à bɔò ŋa bi kuwai iku ŋa do jĩnɛi igũ nŋa ŋa. À wu iri nŋa ŋa à le nŋa si taakuba nŋa, ara nŋa ŋa mɔ si tɛli nŋa ŋa, domi aŋai à ya maa da zigii inɛ ŋa si andunyau wo.

²⁸ Iŋɛ inɛi Ezibiti ŋa, aa ku ŋai nɔ a si ŋɛ do hai ce bango ŋa. Aa sũ ŋai do inɛ ŋa iyi à ku si igũu.

²⁹ Inɛi Edɔmu ŋau, ilaalu nŋa ŋa do inɛ ngbo nŋa ŋau mɔ à wa bɛ. Baa do iyi à jɛ inɛ nla ŋa fei, à ce nŋai bɛi inɛ mmu ŋa mɔ iyi à ku si igũu. À sũi do hai ce bango ŋau bi kuwai iku ŋa.

³⁰ Inɛ ngboi inɛi awɔ njɛi kpãai inunu ŋau do inɛi ilui Sidɔ̃ɔ ŋau fei à wa bi kuwai iku ŋau. Inɛ ŋau à wa si anyɔ baa do iyi à ya maa da zigii inɛ ŋa wo si andunya. Hai ce bango ŋau à sũi do inɛ ŋa iyi à ku si igũu. Nɔ à wa si anyɔ do inɛ ŋa iyi à wa bi kuwai iku ŋau.

³¹ Waati iyi Faraɔ̃ á yɛ woo ja igũ ŋau fei, inɔ kufɔɛ á kaye na zamaaɛu. Ntɔ ntɔ, nŋu do woo ja igũɛ ŋau aa kui si igũ. Amu Aɔ̃ Lafɛ̃ɛi ǹ fɔ bɛɛbɛ.

³² Ǹ jɔ̀ Faraɔ̃ í da zigii inɛ ŋa si andunya wo. Amma nsɛi, nŋu takaɛ do woo ja igũɛ ŋa, aa si ŋai do hai ce bango ŋa iyi à kpa si igũu. Amu Aɔ̃ Lafɛ̃ɛi ǹ fɔ bɛɛbɛ.