Ezekiɛli 31 - Bibeli do fee

À wã ilaalui Ezibiti do jĩi ndii sɛɛdi

¹ Si adɔ̃ maatakãsiai kumui inɛi Izirɛli ŋa, si ajɔ sintei cukpa mɛɛtasiaɛ, Aɔ̃ Lafɛ̃ɛ í bam ide ku fɔ í ni,

² awɔ amanɛ, sɔ̃ ilaalui Ezibiti do zamaaɛ ŋa i ni yooi í jɔ si kulaɛ

³ Jĩi gɔ iyi à ya kpe sɛɛdi si ilɛi Libãai í jɔ. Amaawɔɛ ŋa à sĩa, nɔ à ya ce jĩjĩ jiida. Kugbokaɛ í bɔi hee lele, nɔ imɔɛ í maai si kudũi ijĩ.

⁴ Ijĩi í jɔ̀ í la. Inyii ido iyi í wa lɛlɛi í jɔ̀ í gboka. Inyii í kaako icãɛ ŋa bii fei. Inyiu í ya cãi ku koo si jĩi mmu ŋa si ilɛu fei.

⁵ Na saabui inyiui í jɔ̀ í gboka í re jĩi mmu ŋau. Amaawɔɛ ŋa à kpɔ nɔ à nà bii fei.

⁶ Yɛi ŋa à ya ce antɛ nŋai si amaawɔɛ ŋa. Si abɛɛi mɛɛmui sako ŋa à ya bí ama nŋa ŋa. Inɛi andunya feii í ya wa abɛɛ na jĩjĩɛ.

⁷ Jĩi nɔu í sĩa nɔ í la. Amaawɔɛ ŋa à nài bii fei, domi icãɛ ŋa à mi ilɛi hee si inyi nla.

⁸ Si lamboi Ilaaɔ̃, jĩi ndii sɛɛdi kãma kù wɛɛ iyi aa wãa do. Amaawɔi jĩi ndii sipɛrɛɛsi kãma kù wɛɛ iyi aa wãa do. Nɔ wuai jĩi ndii palatani ŋa a kù sĩa a kù too, jĩi kãma de, kusĩaɛ kù too.

⁹ Ǹ jɔ̀ í sĩai na kukpɔi amaawɔɛ ŋa. Nɔ jĩi ŋa iyi à wa Edɛni lamboi Ilaaɔ̃u fei à waa ce igu do nŋu.

Ilaalui Ezibitiu á cɛi bɛi jĩi ndii sɛɛdiu

¹⁰ Amu Aɔ̃ Lafɛ̃ɛ ǹ ni, jĩi ndii sɛɛdiu í la, í dede í gboka, wuaɛ ŋa à maai si kudũi ijĩ, nɔ wa so araɛ lele.

¹¹ Na nŋu, an fũsiɛ awɔi, n dasiɛ si awɔi ilu gbugbãi ilɛ ŋa. Á sãa laalɔɛi bɛi í to.

¹² Inɛ njoo ŋa, inɛ kugaabui ilɛ mmu ŋa à daa nɔ à jɔ̀ɛ bɛ. Amaawɔɛ ŋa do wuaɛ ŋa à wa si iri kuta ŋau do si lɔɔma ŋau si ilɛu bii fei. Dimii inɛi andunya fei í fa araɛ hai si jĩjĩɛ í jɔ̀ɛ.

¹³ Yɛi ikã ikã ŋa à na à de si amaawɔɛ ŋau. Nɔ mɛɛmui sako ŋa fei à na à ce kolo nŋa si abɛi amaawɔɛ ŋau.

¹⁴ Í ce bɛɛbɛi ku ba jĩi ŋa iyi à wa kɔkɔi inyi ŋau kãma nŋa ku maà gboka hee wua nŋa koo maa lu kudũi ijĩ ŋa nɔ a maa so ara nŋa lele. Ntɔ ntɔ jĩi ŋau do amanɛ ŋau fei aa kui, nɔ aŋa fei aa nɛi hee lɛlɛi ilɛ bi kuwai iku ŋa.

¹⁵ Na ŋɔi í jɔ̀ amu Aɔ̃ Lafɛ̃ɛ ǹ ni, ajɔ iyi ǹ jɔ̀ sɛɛdiu í mile si bi kuwai iku ŋa, inɔ kufɔi í jɛa inɛ ŋa. Inyii ido nlau do tenku ŋau a kù cã má na iriɛ. Ilu kukui í ce si iri kutai Libãa nɔ jĩi ndii inɔ sako ŋa à gbɛi na iriɛ.

¹⁶ Waati iyi ǹ jɔ̀ jĩi nɔu í cuku si bi kuwai iku ŋa hee lɛlɛi ilɛ, bii inɛ ŋa à wau, inɛi ilɛ ŋa à gbɔ ibaɛ, nɔ à waa yayai do njo. Jĩi ndii Edɛni ŋau do jĩi jiidai Libãa ŋau à wɛɛò inɔ didɔ̃i ntɔ ntɔ.

¹⁷ Inɛ ŋau bɛ mɔ à lɔ bi kuwai iku ŋaui do nŋu do inɛ ŋa iyi à ku si igũu. Aŋai à ya maa sobiɛ si igũ ku ceu. À ya maa wai si jĩjĩ nlaɛ, si aninii inɛi ilɛ ŋau.

¹⁸ Si inɔi jĩi ndii Edɛni ŋau, kãma nŋa kù sĩa kù toɛ nɔ kãma nŋa kù la kù toɛ. Do nŋu fei, an jɔ̀ iŋɛò ŋa i bɔ lɛlɛi ilɛ bi kuwai iku ŋa, i koo i sũ bɛ do inɛ ŋa iyi a kù ce bango ŋa, do inɛ ŋa iyi à ku si igũ ŋa. Mii iyi á ba Faraɔ̃ ilaalui Ezibiti do zamaaɛ ŋa fei mbɛ. Amu Aɔ̃ Lafɛ̃ɛi ǹ fɔ bɛɛbɛ.