Ezekiɛli 30 - Bibeli do fee

Aɔ̃ Lafɛ̃ɛ á nyisi Ezibiti idɔɔkɔ̃ɛ

¹ Aɔ̃ Lafɛ̃ɛ í nyi í bam ide ku fɔ má í ni,

² awɔ amanɛ, ce walii i fɔ i ni amu Aɔ̃ Lafɛ̃ɛ ǹ ni a kpata, a dɔ̃ anu na ajɔ si bii laalɔ gɔ á naa.

³ Ajɔu wa naa, ajɔu í maai wa, ajɔi amu Aɔ̃ Lafɛ̃ɛi. Ajɔ nŋu, ilu kuku á ce. Si waatiu bɛi ijuukpã á naa si ilɛ ŋa.

⁴ Igũi á naa si ilɛi Ezibiti, nɔ zigiida á to si ilɛi Etiopi waati iyi iku ŋa aa maa tɛ si ilɛi Ezibitiu. Aa ko amaniɛ ŋa nɔ aa lɛgɛ inya ku nɛ gbugbãɛ ŋa.

⁵ Inɛi Etiopi ŋa do inɛi Puti ŋa do inɛi Ludi ŋa do inɛi Arabi ŋa do inɛi Libii ŋa hee do inɛi Izirɛli inɛm ŋau fei aa kui si igũu.

⁶ Na nŋu, amu Aɔ̃ Lafɛ̃ɛ ǹ ni, hai Migidɔli ikpa awɔ njɛi kpãai inunu hee ku bɔ Asuãa ikpa awɔ cangai kpãai inunu, inɛ ŋa iyi à jɛ gbugbãi Ezibitiu aa kpa ŋai si igũ, nɔ faau nlai Ezibitiu á kpa irii. Amu Aɔ̃ Lafɛ̃ɛi ǹ fɔ bɛɛbɛ.

⁷ Aa lɛgɛ ilɛui bɛi ilɛ ŋa iyi à lɛgɛ à gbe ngbɛu. Iluɛ ŋa aa wa si inɔi ilu ŋa iyi à kpɔò bomma ŋau.

⁸ Waati iyi an dasi Ezibiti ina nɔ n ce nfei inɛ ŋa iyi à jɛ gbugbãɛ ŋau, inɛ ŋa aa mà iyi amui ǹ jɛ Aɔ̃ Lafɛ̃ɛ.

⁹ Si ajɔ iyi an lɛgɛ ilɛi Ezibitiu, amaabɛ ŋa aa cuam do akɔi inyi a bɔ ilɛi Etiopi iyi wa tamaa si nŋu í wɛɛò laakai ku sũu. Inɛɛ ŋau aa maa yayai do njo. Ajɔu í maai wa.

¹⁰ Na nŋu, amu Aɔ̃ Lafɛ̃ɛ ǹ ni, an jɔ̀ Nebukanɛsaa ilaalui Babilɔni ku ce nfei amanii ilɛi Ezibitiui fei.

¹¹ Á naai nŋu do inɛɛ ŋa iyi à gaabu à re dimi mmu ŋa feiu a naa a lɛgɛ ilɛu. Aa kpa inɛ ŋai do taakuba nɔ iku ŋai aa maa tɛ bii fei.

¹² An jɔ̀ inyii amaawɔi idoi Niliu ku gbe ngbɛ. An taa inɛ laalɔ ŋa ilɛu. An jɔ̀ inɛ njoo ŋa a lɛgɛ ilɛui nɔ a ko amaniɛ fei. Amu Aɔ̃ Lafɛ̃ɛi ǹ fɔ bɛɛbɛ.

¹³ Ide iyi ǹ wa n fɔ má wee. Amu Aɔ̃ Lafɛ̃ɛ an ce nfei iwɛ̃ ŋai mam mam, nɔ si ilui Nɔfu iwɛ̃ kãma kaa wɛɛ má. Amanlu kãma kaa wɛɛ Ezibiti bɛ má nɔ zigiidai á wa si ilɛu fei.

¹⁴ An ce nfei ilɛi Patɔɔsi, nɔ n dasi Soãa ina nɔ n kiiti ilui Noo.

¹⁵ An naa si ilui Sini iyi wa jɛ gbugbãi ilɛi Ezibitiu do idɔɔkɔ̃ nla nla. Nɔ an ce nfei mii nkpɔ nkpɔi si ilui Noo.

¹⁶ An dasi Ezibiti inai nɔ Sini ku wɛɛò zigiida. Aa lu bindii ilui Nooi bii fei, nɔ mbɛɛ ŋai aa faata si ilui Nɔfu wa dasã nkpa.

¹⁷ Awaasũi ilui Ɔ̃ɔ ŋa do ti ilui Pi-Besɛti ŋa aa kpa ŋai si igũ nɔ inɛi iluɛ ŋa iyi aa gbe ŋau aa mu ŋa arui a nɛò ŋa.

¹⁸ Ilu kukui á ce si ilui Tapanɛzi waati iyi an lɛgɛ gbugbãi Ezibiti nɔ n kɛkɛ faau nlaɛu. Kudũi ijĩ gɔi á bii Tapanɛzi nɔ aa mu ama inaaboɛ ŋa arui a nɛò ŋa.

¹⁹ An kiiti Ezibitii nɔ do yaase bɛɛbɛ aa mà iyi amui ǹ jɛ Aɔ̃ Lafɛ̃ɛ.

Ilaalui Babilɔnii í jɛ jĩnɛi icɛi Ilaaɔ̃

²⁰ Si adɔ̃ maatakãsiai kumui inɛi Izirɛli ŋa, si ajɔ mɛɛjei cukpa sinteɛ, Aɔ̃ Lafɛ̃ɛ í bam ide ku fɔ í ni,

²¹ awɔ amanɛ, cɔ mii iyi ǹ ce. Ǹ cɛ ikpai Faraɔ̃ ilaalui Ezibiti, nɔ inɛ kãma kù daa si iwɔ hee ku ba iri. Inɛ kãma kù wiɛ nɔ a kù dũu hee ku mɔ ku ba ku yɔkɔ ku ce igũ.

²² Amu Aɔ̃ Lafɛ̃ɛ ǹ ni, an naa si ilaalui Ezibitiu. An cɛ ikpaɛ ŋai, hai iyi í wɛɛ ncɛɛ do iyi ǹ tako ǹ cɛu fei nɔ taakubaɛ á cukui hai si awɔɛ.

²³ An fangaa inɛi Ezibiti ŋai si inɔi dimi mmu ŋa si ilɛ ŋa bii fei.

²⁴ An jɔ̀ ikpai ilaalui Babilɔni ku ba gbugbã nɔ an daa taakubam si awɔɛ. Faraɔ̃ iyi an jɔ̀ ikpaɛ ku cɛu, á dɔ̃ anui ku maa kakaa ku kuò si wajuɛ.

²⁵ An jɔ̀ ikpai ilaalui Babilɔni ku ba gbugbã nɔ ti Faraɔ̃ ku kua gbugbã. An daa ilaalui Babilɔni taakubam si awɔ ku kooò si inɛi Ezibiti ŋa. Waati bɛɛbɛi inɛ ŋa aa mà iyi amui ǹ jɛ Aɔ̃ Lafɛ̃ɛ.

²⁶ An jɔ̀ inɛi Ezibiti ŋa a fangaai si inɔi dimi mmu ŋa si andunyau fei nɔ do yaase bɛɛbɛ aa mà iyi amui ǹ jɛ Aɔ̃ Lafɛ̃ɛ.