Ezekiɛli 3 - Bibeli do fee

¹ Inɛ iyi wa bam ide ku fɔu í ni, amanɛ, ŋɔ tia iyi ǹ naɛu. Ŋɔ tiau nɔ i koo i ba inɛi Izirɛli ŋau ide ku fɔ.

² Ŋɔi ǹ la gɛlɛ nɔ í jɔ̀ ǹ ŋɔ tiau.

³ Nɔ í ni, amanɛ, ŋɔ tia iyi ǹ naɛu i muu. Ŋɔi ǹ ŋɔɔ nɔ si gɛlɛm í dɔ̃i bɛi nyikɔ̃.

⁴ Ŋɔi í ni má, amanɛ, bɔ bi inɛi Izirɛli ŋa nɔ i sɔ̃ ŋa idem ŋau.

⁵ N kù wa n bɛɛ bi inɛ ŋa iyi à waa fɔ fee mmu iyi ku gbɔɛ á gaabuɛ, bi inɛi Izirɛli ŋai ǹ wa n bɛɛ.

⁶ Bii í jɛ bi zamaa nkpɔ nkpɔ iyi à waa fɔ fee mmu iyi ku gbɔɛ á gaabuɛi ǹ bɛɛ wo, aa gbɔ ideɛ.

⁷ Amma inɛi Izirɛli ŋau a kaa bi ideɛ ku gbɔ, si na iyi í jɔ̀ a kù bi idem ku gbɔ domi aŋa fei à yika itĩ nɔ idɔ nŋa í le.

⁸ An jɔ̀ awɔ mɔ i yika itĩi bɛi aŋa nɔ idɔɛ ku le bɛi ti aŋa mɔ.

⁹ An jɔ̀ idɔɛ ku lei bɛi kuta, ku nɛ gbugbã ku re baa kuta. Maà jɔ̀ njo ku muɛ nɔ i maà jɔ̀ zigiɛ ku daò ŋa, domi woo yika itĩ ŋai.

¹⁰ Nɔ í ni má, amanɛ, cĩ itĩɛ ŋa i gbɔ nɔ i mu ide ŋa iyi an sɔ̃ɛ fei si idɔɛ.

¹¹ Koo bi inɛɛ ŋa iyi à mu à naaò wa ihɛ̃ ŋau i ba ŋa ide ku fɔ i ni amu Aɔ̃ Lafɛ̃ɛi ǹ ni i naa i sɔ̃ ŋa ide ŋau ihɛ̃. Bii à gbɔi walakɔ bii à kɔ̀ ku gbɔ, awɔ de sɔ̃ ŋa.

¹² Ŋɔi hundei Ilaaɔ̃ í dedem hai ilɛ nɔ do anyim ǹ wa n gbɔ ibai anu ku dɔ̃ nla gɔ wa ni, saabu ku jɛ ti Aɔ̃ Lafɛ̃ɛ tengi bii í wa wa nyisiò amboeɛ.

¹³ Ǹ gbɔ ikpai mii ilu hunde ŋau à ce iba à waa cã si njɛ. Wuruu ŋau mɔ à waa ce iba, nɔ ibau í la ntɔ ntɔ.

¹⁴ Hunde iyi í dedem nɔu í nɛɛm. Ŋɔi gbugbãi Aɔ̃ Lafɛ̃ɛ í naa sim ntɔ ntɔ nɔ ǹ dasi kpãa ǹ wa n nɛ do idɔɔkɔ̃ do inɔ kufɔ.

¹⁵ Ŋɔi ǹ to Tɛli-Avivu, bi aru ŋa iyi à buba kɔkɔi itĩi ido nlai Kebaa tengi bii à wau, ǹ ce bi tu ŋa bɛi ajɔ mɛɛje do biti nla nla.

Ezekiɛlii à jilɛ ku jɛ woo kɛɛma bi inɛi Izirɛli ŋa

¹⁶ Si afei ajɔ meejeu, Aɔ̃ Lafɛ̃ɛ í bam ide ku fɔ í ni,

¹⁷ amanɛ, ǹ soɛi i jɛ bɛi woo kɛɛma bi inɛi Izirɛli ŋa. I ya gbɔ idem ŋa nɔ i ya koo i faò laakaii inɛi Izirɛli ŋau.

¹⁸ Waati iyi ǹ ni, inɛ laalɔ á ku, bii i kù sɔ̃ɔ ku ce laakai si inɔ kukãɛ do si kuce laalɔɛ ku ba i faaba kuwɛɛɛ, inɛ laalɔu á kui na kuraraɛ ŋa. Amma ikuɛ á jɛ idei iriɛ.

¹⁹ Amma bii ì ni ku ce laakai, nɔ kù jɔ̀ inɔ kukãu do kuce laalɔɛu, á kui si kuraraɛ ŋa, nɔ awɔ hundeɛ á ba faabai.

²⁰ Bii inɛ dee dee gɔ í jɔ̀ kpãa jiidaɛ nɔ í koo wa ce laalɔ, bii i kù niaa kai, an jɔ̀ ku koosɛi ku cuku, nɔ á kui si dulum dɛɛ ŋa. A kaa ye gigii baa mii jiida ŋa iyi í ce má. Amma ikuɛ á jɛ idei iriɛ.

²¹ Amma bii ì ni inɛ dee dee ku ce laakai ku ba ku maà ce dulum, nɔ kù ce dulum, á maa wɛɛi si na iyi í jɔ̀ ì sɔ̃ɔ, awɔ mɔ hundeɛ á ba faaba.

Waati iyi Ezekiɛli kaa fɔ ide

²² Ŋɔi Aɔ̃ Lafɛ̃ɛ í jɔ̀ gbugbãɛ í naa sim nɔ í ni, fita i bɔ si lɔɔmau, bɛi an baɛ ide ku fɔ.

²³ Nɔ ǹ fita ǹ bɔ si lɔɔmau. Ŋɔi ǹ yɛ amboei Aɔ̃ Lafɛ̃ɛ bɛi ǹ tako ǹ yɔɔ wo si itĩi idoi Kebaau. Ŋɔi ǹ sɛɛbata ilɛ.

²⁴ Ŋɔi hundei Ilaaɔ̃ í naa sim í jɔ̀ ǹ dede ǹ leekĩ nɔ í ni, bɔ kpasɛ̃ɛ i koo i cĩmbo si araɛ.

²⁵ Inɛ ŋa aa dɛdɛ ikũ ŋai a kpatiɛ do nɔ i kaa yɔkɔ i fita waduude do aŋa má.

²⁶ An jɔ̀ amɛɛ ku masi anu lɛlɛɛ ku ba i dekĩ nɔ i kaa yɔkɔ i yɛ taalei inɛ ŋau domi inɛ ŋai iyi à yika itĩ.

²⁷ Amma waati iyi an baɛ ide ku fɔ, an cĩ gɛlɛɛ ku ba i sɔ̃ ŋa i ni amu Aɔ̃ Lafɛ̃ɛ ǹ ni i naa i sɔ̃ ŋa ide ŋau ihɛ̃. Inɛ iyi í bi ku gbɔ, ku gbɔ, nɔ inɛ iyi kù bi ku gbɔ, ku maà gbɔ, domi inɛ ŋau à yika itĩ.