Ezekiɛli 29 - Bibeli do fee

Idei ijuukpã si gãmɛi inɛi Ezibiti ŋa

¹ Si adɔ̃ mɛɛwasiai kumui inɛi Izirɛli ŋa, si cukpa mɛɛwasia si ajɔ maateejisiaɛi Aɔ̃ Lafɛ̃ɛ í bam ide ku fɔ í ni,

² awɔ amanɛ, sinda i cɔ ikpa bi Faraɔ̃ ilaalui Ezibitiu nɔ i fɔ idei ijuukpã ŋa iyi an jɔ̀ ku naa siɛ do si ilɛu fei.

³ Aa sɔ̃ɔi i ni amu Aɔ̃ Lafɛ̃ɛ ǹ ni an naa si nŋu Faraɔ̃ ilaalui Ezibitiu, nŋu iyi í yɛi bɛi annyɛi nla nɔ wa sũ si aninii ido nlai Niliu nɔ wa ni idoi Niliu nŋui í nɔɔ, domi nŋui í coo.

⁴ An dasi kootia si cangeɛ ŋai nɔ ǹ jɔ̀ cɛ̃ɛi idoi Nili ŋau a masi anyi ku nɛ kpakaɛu. An faa wai hai si aninii idou do cɛ̃ɛ ŋa iyi à masi anyi ku nɛ kpakaɛu n fitaɛ wa.

⁵ An koo n nyɔɔi si gbaa nŋu do cɛ̃ɛi amaawɔi idoi Nili ŋau fei. Si ilɛ ngbɛ bɛi á ku. Inɛ gɔ kaa soo nɔ inɛ gɔ kaa suu. Ijɛi mɛɛmui sako ŋa do yɛi ŋai an jɔ̀ ku jɛ.

⁶ Waati bɛɛbɛ, inɛi Ezibiti ŋau fei aa mà iyi amui ǹ jɛ Aɔ̃ Lafɛ̃ɛ. Gbugbã iyi í na inɛi Izirɛli ŋau kù re gbugbãi akpa.

⁷ Waati iyi à na gbugbã nŋa siɛ, í cɛi. Nɔ í gagaga kɔngɔ nŋa ŋa fei. Nɔ waati iyi à na gbugbã nŋa siɛ, í jɔ̀ à kua gbugbãi.

⁸ Na ŋɔi í ce amu Aɔ̃ Lafɛ̃ɛ ǹ ni, an jɔ̀ igũ ku naa siɛ nɔ an kpa irii amanɛ do mɛɛmu ŋa feii.

⁹ Ilɛi Ezibitiu á kpɔò bommai nɔ inɛ fei á mà iyi amui ǹ jɛ Aɔ̃ Lafɛ̃ɛ. Í ni idoi Niliu nŋui í nɔɔ, domi nŋui í coo.

¹⁰ Na ŋɔi í ce an dasiɛ awɔ, nŋu do Nili idoɛu. An ce nfei ilɛi Ezibitiui ku baa ku kpɔò gbaa hai Migidɔli ikpa awɔ njɛi kpãai inunu hee ku bɔ ilu nlai Asuãa do adakoi Etiopiu ikpa awɔ cangai kpãai inunu.

¹¹ Isɛi amanɛ walakɔ ti mɛɛmu gɔ kaa lɔ bɛ. Á wɛɛi adɔ̃ ciiji nkãma kaa wa bɛ.

¹² An jɔ̀ ilɛi Ezibitiu ku gbe ngbɛi bɛi ilɛ mmu ŋa iyi à gbe ngbɛu. Nɔ n jɔ̀ iluɛ ŋa a wa si inɔi ilu ŋa iyi à kpɔò bomma ŋau zakai adɔ̃ ciiji. An jɔ̀ inɛi Ezibiti ŋau a fangaa si inɔi dimi mmu ŋa nɔ n jɔ̀ a fangaai si ilɛ ŋa bii fei.

¹³ Amma amu Aɔ̃ Lafɛ̃ɛ ǹ ni, si anyii adɔ̃ ciiji, an tɔtɔɔ inɛi Ezibiti ŋa iyi à fangaa si inɔi dimi mmu ŋau fei wai.

¹⁴ An teese n jilɛ ilɛi Ezibitiu nɔ n baaò inɛɛ ŋa wa si ilɛi Patɔɔsi ilɛ tengi bii à bí ŋa. Bɛi aa ce bomma gɔ iyi kaa nɛ gbugbã.

¹⁵ Bommau kaa nɛ gbugbã ku to ti ilɛ mmu ŋau. An kaye gbugbãɛi ku ba ku maà yɔkɔ ku kãmia dimi mmu ŋa má.

¹⁶ Inɛi Izirɛli ŋa a kaa maa kaaba ŋa má. A kaa bɔ sobi ku tɔɔ bi inɛi Ezibiti ŋa iyi aa dasi ŋa dulum má. Do yaase bɛɛbɛ, inɛ fei á mà iyi amui ǹ jɛ Aɔ̃ Lafɛ̃ɛ.

Ilaalu Nebukanɛsaa á jɛ ilɛi Ezibiti igũ

¹⁷ Si adɔ̃ kɔnfia do mɛɛjesia, si ajɔ sintei cukpa sinteɛ, Aɔ̃ Lafɛ̃ɛ í bam ide ku fɔ í ni,

¹⁸ awɔ amanɛ, gbɔ, ilaalu Nebukanɛsaa í dasi soogeɛ ŋa icɛ kugaabu ku ce si gãmɛi ilui Tii. Irii soogeɛ ŋau kãma kù nɛ nto, nɔ kɔngɔ nŋa ŋa à ba kumɛɛ. Do nŋu fei, nŋu do soogeɛ ŋau a kù ba ribai icɛ iyi à ce si ilui Tiiu.

¹⁹ Na nŋu amu Aɔ̃ Lafɛ̃ɛ ǹ ni an so ilɛi Ezibiti n na Nebukanɛsaa ilaalui Babilɔniui. Á lɛgɛ ilɛui nɔ ku ko amaniɛ fei. Amani ŋa iyi í ko wa hai si igũui á jɛ isãi soogeɛ ŋau.

²⁰ Ilɛi Ezibitii an naa ku jɛ isãi icɛ ŋa iyi í ce, domi amui soogeɛ ŋa à cea icɛ. Amu Aɔ̃ Lafɛ̃ɛi ǹ fɔ bɛɛbɛ.

²¹ Si ajɔ nŋu bɛ, an jɔ̀ gbugbãi inɛi Izirɛli ŋa ku kɔ̃ɔsi nɔ awɔ Ezekiɛli, an muɛ kpãa í fɔ ide si anini nŋa. Do yaase bɛɛbɛ, aa mà iyi amui ǹ jɛ Aɔ̃ Lafɛ̃ɛ.