Ezekiɛli 27 - Bibeli do fee

Irii inɔ kufɔ na nfe ku cei ilui Tii

¹ Aɔ̃ Lafɛ̃ɛ í bam ide ku fɔ í ni,

² awɔ amanɛ, kɔ̃ irii inɔ kufɔ gɔ si gãmɛi ilui Tii,

³ nŋu iyi wa buba si itĩi tenkuu nɔ í jɛ woo nya sĩa do inɛ ŋa iyi à wa itĩi tenku nla ŋau. Sɔ̃ɔ i ni, ide iyi amu Aɔ̃ Lafɛ̃ɛ ǹ wa n fɔ si gãmɛi awɔ Tii wee. Tii awɔi ì ya maa ni awɔ ì jɛ ilu iyi í sĩa ntɔ ntɔ.

⁴ Kɔɔɛ í bɔi hee si inɔ tenku. Inɛ ŋa iyi à maɛu à jɔ̀ ì sĩai ntɔ ntɔ.

⁵ À ce araɛi do jĩi ŋa iyi à ya kpe sipɛrɛɛsi iyi wa naa hai ilɛi Senii. Jĩi ndii sɛɛdi iyi wa naa hai ilɛi Libãai à ceɛò akpai tuuta.

⁶ À ce falafiliɛ ŋai do jĩi ndii sɛnii Basãa ŋa. Kitãɛ ŋa iyi à masi boodai inyíi jua ŋau à waa naai hai ilɛi Asiri do hai gũngũm dii Kitimu.

⁷ Tuutaɛ ŋa iyi à ce do acɔ ku nɛ gbugbãi Ezibiti ŋa iyi à ce si booda ŋaui à ya jɔ̀ a màɛ hai jĩijĩ. Acɔ ku nɛ ila bulam bulam do nkpa, iyi wa naa hai gũngũm dii Kitimui í ya maa bii iwoɛ ŋa.

⁸ Inɛi Sidɔ̃ɔ do inɛi Aavadi ŋai à jɛ waakɔɛ ŋa. Nɔ inɛi Tii ŋai à jɛ woo ce icɛ jiidaɛ ŋa si akɔu.

⁹ Inɛi Gebali ŋa iyi à kpɛ bi titɛɛ si icɛu do ilu laakai ŋaui à jɛ woo teese akɔɛ ŋau. Akɔi inyi ŋau do inɛ ŋa iyi à ya wa inɔɛ ŋau, à ya leekĩ bi tɛɛi ku ba a ra iwoɛ ŋa.

¹⁰ Inɛi Pɛɛsi ŋa do inɛi Ludi ŋa do inɛi Puti ŋai à jɛ sooge ku ja igũɛ ŋa. À ya kɔa tɛli nŋa ŋa do fulai isɔ nŋa ŋai bi titɛɛ nɔ à ya jɔ̀ i nɛ bɛɛrɛ nla nla.

¹¹ Inɛi Aavadi do soogei awɔ takaɛ ŋai à ya kaako bindiɛ ŋa bii fei a maa degbeɛ. Inɛi Gamadi ŋai à ya maa degbe ile kugbokaɛ ŋa. À ya kɔa tɛli nŋa ŋai bii fei si bindiɛ ŋau nɔ à jɔ̀ ì nɛ bɛɛrɛ ntɔ ntɔ.

Tii í jɛ ilu nla bi ku ce sĩa

¹² Inɛi Taasi ŋa à ya maa ce sĩa si ilɛɛ na amani ikã ikã nkpɔ nkpɔ iyi ì nɛ. À ya naa a ra iwoɛ ŋai do isɔ fũfũ, do isɔ do isɔ fũfũ kurɔ do lolo.

¹³ Inɛi Gɛrɛsi ŋa do inɛi Tubali ŋa do inɛi Mesɛki ŋa à waa ce sĩa do awɔ. Aru ŋa do isɔ nkpa ŋai à ya naaɛ wa, a na a kpaasi do iwoɛ ŋa.

¹⁴ Inɛi Bɛti-Togaama ŋa, acĩ ku ce icɛ do acĩ ku ce igũ do mulee ŋai à ya naa a kpaasiò iwoɛ ŋa.

¹⁵ Awɔ do inɛi Dedãa ŋa do inɛ ŋa iyi à wa gũngũm ŋau fei ì ya maa ce sĩa ŋa. À ya sãaɛ fiaɛi bɛi í to do inyíi jua do jĩi ndii kango.

¹⁶ Inɛi Edɔmu ŋa à ya ra jĩnɛɛ ŋa nkpɔ nkpɔ. À ya kpaasiɛi do kuta jiida ku nɛ ila wua wua ŋa do jĩnɛ ku nɛ ila nkpa ku yɔgɛɛò boogu do acɔ ŋa iyi à ce si booda do acɔ iyi à ce do ikũ ku nɛ gbugbã ŋa do dimii kuta gɔ iyi à ya kpe korayi do kuta jiida ku nɛ ila nkpa gɔ.

¹⁷ Inɛi Zudaa ŋa do inɛi Izirɛli ŋai à ya maa ce sĩa do awɔ. À ya naa a kpaasi iwoɛ ŋai do bileei ilui Miniti do iya do nyikɔ̃ do ikpoi olivi do isoi jĩi ku nɛ inunu jiida ŋa.

¹⁸ Inɛi Damasi ŋa à ya maa ce sĩa do awɔi na amani nla ikã ikã iyi ì nɛ. Vɛ̃ɛi ilui Helibɔ̃ɔ do jĩnɛ ŋa iyi à wɔ̃ do nto fũfũi angudã ŋai à ya naa a kpaasiò iwoɛ ŋa.

¹⁹ Hai ilui Uzalii dimii Vedãa do dimii Yavãa ŋa à ya tooò wa a naa a ra iwoɛ ŋa. À ya naa a kpaasi iwoɛ ŋa do jĩnɛ ŋa iyi gbɛdɛ ŋa à ce, do isoi jĩi do amaawɔi jĩi ku nɛ inunu jiida ŋa.

²⁰ Inɛi Dedãa ŋai à ya naa a taɛ jĩnɛ ku gũ acĩ ŋa.

²¹ Inɛi Arabi ŋa do amanlui Kedaa ŋau mɔ à ya maa ce sĩai do awɔ. À ya naa a kpaasi iwoɛ ŋai do ama angudã ŋa do angudã nla ŋa do iwo ŋa.

²² Iŋɛò inɛi Seba ŋa do inɛi Rama ŋa ì ya ce sĩa ŋa. Tuae ku nɛ inunu jiida ŋa, do kuta jiida ŋa do wurai à ya naa a kpaasiò iwoɛ ŋa.

²³ Inɛi ilui Harãa ŋa do inɛi ilui Kanee ŋa do inɛi ilui Edɛni ŋa à ya maa ce sĩai do awɔ, bɛi woo ce sĩai ilui Saba ŋa do Asuu ŋa do Kilimaa ŋa mɔ à ya maa ce.

²⁴ Jĩnɛ ku caada ŋai à ya naaò wa si ajaɛu. Jĩnɛ ku dasi ku nɛ ila nkpa ku yɔgɛɛò boogu, do iyi à ce si booda ŋa, do acɔ ku nɛ ila ikã ikã ŋa, do ikũ ku nɛ gbugbã ŋa iyi à ba.

²⁵ Akɔi inyii Taasi ŋaui à ya maa so jĩnɛ ku taɛ ŋau wa. Tii, ì kɔ̃i do iwòi aja ŋa, nɔ amani wa tɛɛ, bɛi akɔi inyi iyi í wa si aninii tenku.

Irii inɔ kufɔi ilui Tii wa mɔsi

²⁶ Waakɔɛ ŋau à bɔòɛ hee si aninii inyii tenkuu nɔ fufui nunui daakɔ í ce nfeɛ.

²⁷ Amaniɛ do iwòi ajaɛ ŋa, do waakɔ ŋau, do woo teese akɔɛ ŋau, do woo ce itai iwoɛ ŋau do soogeɛ ŋau do zamaa iyi í wa si akɔu fei, si ajɔi kucukuɛu bɛ, aŋa fei aa cukui si aninii tenkuu.

²⁸ Anu ku dɔ̃i inɛ ŋa iyi à wa si inɔi akɔu á jɔ̀ zigii inɛ ŋa iyi à wa kɔkɔi tenkuu ku da a maa yaya.

²⁹ Nɔ inɛ ŋa iyi à jɛ waakɔ ŋau do inɛ ŋa iyi à wa si inɔɛ ŋau fei aa kita ilɛi.

³⁰ Inɛ ŋau aa maa dɔ̃ anui inɔ kufɔi na iriɛ nɔ a kpata a maa cã buubuu. Aa kosi iri nŋa sãa nɔ a maa bimbili si ilúlu.

³¹ Aa wa iri nŋa na iriɛ nɔ a we saaki a maa nyisiò inɔ kufɔ nŋa. Aa maa kpatai jiida jiida na iriɛ a maa nyisiò inɔ kufɔ nŋa ntɔ ntɔ.

³² Si ara kuro nŋa aa maa kɔ̃ irii inɔ kufɔi na iriɛ. Aa maa kpatai a maa ni, yooi í yɛ bɛi Tii, bɛi ilu nla iyi í ce nfe si inɔ tenkuu.

³³ Waati iyi à ya naa a kita iwoɛ ŋa hai si akɔi inyi ŋau, bi tɛɛi zamaa nkpɔ nkpɔ í ya naa ku ra iwo. Amani nla nlaɛ do iwòɛ ŋaui í jɔ̀ ilaalui ilɛ nkpɔ í ba amani.

³⁴ Nɔ waati iyi kutãngãm dii inyii tenkuu í lɛgɛɛ, iwòɛ ŋa do inɛ ŋa iyi à wa si inɔi akɔu fei, à milei hee lɛlɛi inyii tenkuu.

³⁵ Inɛi gũngũm ŋau fei, à wɛɛò zigiida na iriɛ. Ilaalu nŋa ŋa à waa yaya do njo, waju nŋa í yuguu.

³⁶ Woo nya sĩai ilɛ mmu ŋa iyi à waa lɔ, à ya bitii a maa fã foo na iriɛ. Zigii inɛ ŋa í ya maa dai na iriɛ. Ì ce nfe mbɛ hee do ajɔ fei.