Ezekiɛli 26 - Bibeli do fee

Idei ijuukpã si gãmɛi inɛi Tii ŋa

¹ Si anyii adɔ̃ maatakãsia iyi à mu inɛi Izirɛli ŋa aru, si ajɔ sintei cukpau, Aɔ̃ Lafɛ̃ɛ í bam ide ku fɔ í ni,

² awɔ amanɛ, gbɔ bɛi inɛi Tii ŋa à waa yaako Zeruzalɛmu à waa ni, mbɛɛ ŋa à ce nfeɛ nɔ à lɛgɛ ilu bii inɛ ŋa à ya too a maa lɔòu. Nsɛi bi tu wai inɛ ŋa à sinda wa nɔ awa aa ka ba fia, domi Zeruzalɛmu í kpɔò bomma.

³ Na nŋu, Aɔ̃ Lafɛ̃ɛ í ni, an jɔ̀ dimi nkpɔ nkpɔ ku dede si inɛi Tii ŋa wa bɛi kutãngãm dii inyii tenku í ya dede.

⁴ Inɛ ŋa aa naa a lɛgɛ bindii Tii ŋa do ile kugbokaɛ ŋau. Aa lɛgɛɛi baa kanga akã kaa gbe bɛ, í gbe kutai icuɛ ŋau.

⁵ Tii á koo wai si inɔ tenku ku baa ku jɛ tengi bii sɔɔkɔ ŋa aa ya koo a sa taao nŋa. Bɛɛbɛi amu Aɔ̃ Lafɛ̃ɛ ǹ fɔ. Inɛi ilɛ mmu ŋai aa ko mii ndɛɛ ŋa.

⁶ Inɛi ilu ŋa iyi à wa kɔkɔɛ ŋau, aa kpa ŋai do taakuba. Do yaase bɛɛbɛ, aa mà iyi amui ǹ jɛ Aɔ̃ Lafɛ̃ɛ.

⁷ Ntɔ ntɔ, amu Aɔ̃ Lafɛ̃ɛ ǹ wa n fɔi si gãmɛi inɛi Tii ŋa iyi an jɔ̀ Nebukanɛsaa ilaalui Babilɔni iyi í re ilaalu ŋa fei ku naa siɛ wa hai do ikpa awɔi njɛi kpãai inunu. Á naai do acĩ ŋa do sarɛtii igũ ŋa do masa ŋa do sooge ŋa nkpɔ nkpɔ.

⁸ Aa lɛgɛ ilu ŋa iyi à wa kɔkɔi Tii ŋaui fei mam mam. Si anyiɛ, sooge ŋau aa tu lumbu ŋai nɔ a ce timtim ŋa na iriɛ nɔ a jɔ̀ tɛli nŋa ŋa a gusi njɛ ku yɛ bɛi bindi.

⁹ Sooge ŋau aa lɛgɛ bindii Tii do ile kugbokaɛ ŋaui do jĩnɛ ku ja igũ nŋa ŋa.

¹⁰ Ilului acĩ nkpɔ nkpɔ nŋa ŋau á bii ilui Tii. Bindiɛ ŋau aa maa yayai na ibai masa ŋa do na ti sarɛtii igũ ŋau. Aa lɔ hai do bi koofaɛ ŋaui bɛi à ya lɔ si ilu iyi à lu bindiɛ ŋa.

¹¹ Aa wai bii fei si kpãai ilu ŋau do acĩ nŋa ŋa. Aa kpa inɛɛ ŋai do taakuba nɔ aa lɛgɛ nyinda ku nɛ gbugbã ŋa iyi à ma ti iwɛ̃ɛ ŋau mam mam.

¹² Aa ko amaniɛ ŋai do iwo ku ta ŋa iyi inɛɛ ŋa à jilɛ. Aa lɛgɛ bindiɛ ŋai do kpasɛ̃ jiidaɛ ŋa. Aa so kutaɛ ŋa do jĩi ndɛɛ ŋa nɔ kanga ŋa iyi à gbe fei a koo a kosi inɔ tenku.

¹³ An jɔ̀ iri ku kɔ̃ɛ ŋau a leekĩ, nɔ a kaa gbɔ imui mɔɔlɔɛ ŋa má.

¹⁴ An jɔ̀ ilui Tii ku yɛi bɛi kuta iyi í wa gbugbãa si bii sɔɔkɔ ŋa aa ya naa a sa taao nŋa, nɔ i jɛ ilu iyi a kaa teese a maa má. Bɛɛbɛi amu Aɔ̃ Lafɛ̃ɛ ǹ fɔ.

¹⁵ Ide iyi amu Aɔ̃ Lafɛ̃ɛ ǹ fɔ si gãmɛi awɔ ilui Tii wee. Ǹ ni, waati iyi iba á maa ce na kucukuɛ do waati iyi inɛ ŋa aa kakaa a maa ku, do waati iyi iku á maa ce si inɔɛ, inɛ ŋa iyi à wa itĩi ido nlau, aa maa yayai do njo.

¹⁶ Amanlui inɛi itĩi ido nla ŋau fei aa kitai hai si kitãi bomma nŋau. Aa bɔ ibɔ nla nŋa ŋai do ibɔ ŋa iyi à ce si icɛ ŋau. Zigiidai aa wɛɛò, nɔ ilɛi aa buba. Aa maa yayai hai nɛ kɔɔ nɔ aa wɛɛò zigiidai na mii iyi í baɛ.

¹⁷ Inɛ ŋa aa kɔ̃òɛ iri à maa ni, ilu ku nɛ bɛɛrɛu à ce nfeɛ, nŋu do inɛɛ ŋa iyi à kãmia inɛi kɔkɔi tenku ŋa a jɔ̀ a maa wɛɛò zigiida wo, inɛɛ ŋa a ci ya bɔ inɔ tenku má.

¹⁸ Nsɛi, inɛi itĩi tenku nla ŋau aa maa yayai si ajɔi nfe ku ceɛu. Inɛi ilɛ jĩijĩ ŋau fei aa wɛɛò zigiida na nfe ku ceɛu.

¹⁹ Amu Aɔ̃ Lafɛ̃ɛ ǹ ni, an jɔ̀ awɔ ilui Tii i kpɔò bomma nɔ inɛ kãma kaa wa bi tɛɛ má. Waati bɛɛbɛi an jɔ̀ hai tengi bii tenku í jĩisau inyi ku kɔ̃ ku biiɛ.

²⁰ An jɔ̀ i bɔ si bi kuwai iku ŋa inɔ balɛ, i koo i ba inɛ ŋa iyi à tako à wa bɛ. An jɔ̀ i bɔi hee lɛlɛi ilɛ nɔ i yɛ bɛi kutai tako ŋa iyi à ce nfeu awɔ do inɛ ŋa iyi à cuaɛ ŋau. I kaa yɔkɔ i fita wa, nɔ i kaa nɛ bi kuwa si andunya ihɛ̃ má.

²¹ Inɛ fei á maa yayai do njo na laalɔ iyi í baɛ, domi i kaa wɛɛ má. Aa dɛdɛɛ, amma a kaa yɛɛ má ajɔ kãma. Amu Aɔ̃ Lafɛ̃ɛi ǹ fɔ bɛɛbɛ.