Ezekiɛli 24 - Bibeli do fee

Zeruzalɛmu í yɛi bɛi caka iyi í mu atɛ

¹ Si adɔ̃ mɛɛsãsiai kumui inɛi Izirɛli ŋa si cukpa mɛɛwasia si ajɔ mɛɛwasiaɛ, Aɔ̃ Lafɛ̃ɛ í bam ide ku fɔ í ni,

² awɔ amanɛ, kɔ ajɔi nnyiu ihɛ̃, domi nnyii ilaalui Babilɔni á naa si Zeruzalɛmu igũ.

³ Kpaa woo yika itĩ ŋau mɔnda i sɔ̃ ŋa i ni amu Aɔ̃ Lafɛ̃ɛ ǹ ni, i dɛdɛ caka nɔ i dasi inyi si inɔɛ.

⁴ Dasi iŋa koko ŋa, iŋa koko jiida ŋa, itãu do bangau nɔ i kɔ̃ɔ do kũkũ jiida ŋa.

⁵ So iŋai angudã kusĩa ŋau nɔ i dasi kũkũ ŋau hee lɛlɛi cakau. Jɔ̀ ku gba ntɔ ntɔ ku ba kũkũ ŋa iyi à wa inɔ cakau a kà a jĩa.

⁶ Ntɔ ntɔ, amu Aɔ̃ Lafɛ̃ɛ ǹ ni, inɔ kufɔi í jɛ ti ilu iyi inɛɛ ŋa à ya maa kpa inɛ ŋau. Í yɛ bɛi caka iyi í mu atɛ nɔ a kaa yɔkɔ a wiɛ. Wa iŋau koko do koko i maà jɔ̀ baa koko akã.

⁷ Njɛi inɛ ŋa iyi à nikã si inɔ iluu, à nikãɛ má si kuta gɔ. Ilɛ kù mɔɔ, nɔ inɛ kãma kù biiɛ do sãa.

⁸ Ǹ jɔ̀ njɛu í wa si antaii kutau tengi bii kaa manji ku ba ku dede idɔɔkɔ̃m, nɔ ku jɔ̀ n sã gbese.

⁹ Ntɔ ntɔ, amu Aɔ̃ Lafɛ̃ɛ ǹ ni, inɔ kufɔi í jɛ ti ilu iyi inɛɛ ŋa à ya maa kpa inɛ ŋau. domi an ko ina nla nla.

¹⁰ Tɔtɔɔ jĩi ŋa nɔ i dasi ina i teese i se iŋau ku jĩa. Dasi jĩnɛi ayɛ ŋa nɔ i jɔ̀ kũkũ ŋau a jo mam mam.

¹¹ Si anyiɛ, lesi caka ngbɛu si ina nyɛnyɛ ku ba ku gbãa hee ku kpã ku ba riisi iyi í wa siu ku nya, nɔ atɛ iyi í muu ku wɔ.

¹² Amma kookaaiu fei ngbɛi. Riisiu í la í caa hee inau kù yɔkɔ kù nyaa.

¹³ Zeruzalɛmu, kuraraɛi í jɔ̀ ì riisi. Ǹ bi ǹ wɛɛ i maajui wo, amma ì kɔ̀. Nsɛi, i bɛi i maaju, í gbe bii idɔɔkɔ̃m í naa siɛ.

¹⁴ Amu Aɔ̃ Lafɛ̃ɛi ǹ fɔɔ, nɔ bɛɛbɛi an coo. N kaa n jɔ̀ nkãma. N kaa n ce araare, nɔ n kaa n ni bii ǹ mà. Aa kiitiɛi si yaasei isɛɛnɛɛ do kuceɛ ŋa. Amu Aɔ̃ Lafɛ̃ɛi ǹ fɔ bɛɛbɛ.

Inɔ kufɔi Ezekiɛli

¹⁵ Aɔ̃ Lafɛ̃ɛ í bam ide ku fɔ í ni,

¹⁶ awɔ amanɛ, an nya abo iyi í ya jɔ̀ i maa nɛ inɔ didɔ̃u anu akã. Amma maà ce weewea, maà ce akũɛ, nɔ i maà kpata na iriɛ.

¹⁷ Temuaò bitandiɛ, maà ce bɛi inɛ ŋa à ya ce bii inɛ kù wɛɛ. Amma dĩ bɔngɔtɔbɛɛɛ nɔ i dasi baataɛ bɛi ì nɛ dɔ̃ɔnɛɛ. Maà bii wajuɛ, maà jɛ sɔnda iyi à ya cea inɛ ŋa si akũ.

¹⁸ Ŋɔi ǹ ba zamaau ide ku fɔ daadaakɔu, nɔ alɛ gbakã abom í ku. Iju kumáɛ daadaakɔu, ŋɔi ǹ ce bɛi Aɔ̃ Lafɛ̃ɛ í sɔ̃m nɔu.

¹⁹ Ŋɔi inɛ ŋa à na à beem à ni n sisia aŋa yaasei mii iyi ǹ wa n ce.

²⁰ Ŋɔi ǹ jɛ nŋa ǹ ni Aɔ̃ Lafɛ̃ɛ í bam ide ku fɔ í ni,

²¹ sɔ̃ inɛi Izirɛli ŋau i ni amu Aɔ̃ Lafɛ̃ɛ ǹ ni, an jɔ̀ a riisi kpasɛ̃m iyi wa jɛ gbugbãi fufu ku tɔɔ nŋɛ, do inɔ didɔ̃ nŋɛ, do kpãa ku cɔ si kuwɛɛ nŋɛu. Si anyiɛ, ama inɛmɔkɔ nŋɛ ŋa do ama inaabo nŋɛ ŋa iyi ì jɔ̀ Zeruzalɛmu ŋau aa kpa ŋai do taakuba.

²² Aa ce ŋai bɛi Ezekiɛli í ce. I maà bii waju nŋɛ ŋa, nɔ i maà jɛ sɔndai akũ ŋau ŋa.

²³ I dĩ bɔngɔtɔbɛɛ nŋɛ ŋa, i dasi baata nŋɛ ŋa nɔ i maà kpata ŋa. Amma kurara nŋɛ ŋai á jɔ̀ i gbɛ ŋa nɔ i maa weewea si njɛ ŋa.

²⁴ Ezekiɛlii á jɛ nŋɛ bɛi sɛɛda. Aa ce ŋai dee dee bɛi í ce. Bii mii ŋa iyi à fɔ ideɛu í na wa ce, aa mà ŋa iyi amui ǹ jɛ Aɔ̃ Lafɛ̃ɛ.

²⁵ Iyi í jɛ ti awɔ amanɛ, sotĩ i gbɔ. Ntɔ ntɔ, ajɔ iyi an jɔ̀ a kua kpasɛ̃ iyi wa jɛ gbugbã nŋa si bii fufu ku tɔɔ nŋa í wa, do inɔ didɔ̃ nŋa do kpãa ku cɔ si kuwɛɛ nŋa, ajɔ nŋu bɛi an jɔ̀ a kpa ama inɛmɔkɔ nŋa ŋa do ama inaabo nŋa ŋa.

²⁶ Ajɔ nŋu bɛ, inɛ gɔ iyi í ba í fita si wahalaui á na ku sɔ̃ɛ laabaauu.

²⁷ Ajɔ nŋu bɛ, i kaa jɛ dekĩ má, aa gbɔ ide, nɔ aa yɔkɔ í fɔ ide do inɛɛu. Awɔi aa jɛ nŋa sɛɛda, nɔ inɛ ŋa aa mà iyi amui ǹ jɛ Aɔ̃ Lafɛ̃ɛ.