Ezekiɛli 22 - Bibeli do fee

Daa laalɔi Zeruzalɛmu ŋa

¹ Aɔ̃ Lafɛ̃ɛ í bam ide ku fɔ í ni,

² awɔ amanɛ, ce sɔɔlu i kiiti ilui woo kpa inɛ ŋau. Nyisiɛ iyi kuceɛ ŋa kù sĩa.

³ Sɔ̃ inɛi ilu ŋau i ni amu Aɔ̃ Lafɛ̃ɛ ǹ ni, ì jɛ woo kpa inɛ ŋa nɔ ì waa ce sɔɔlui nfei ilu nŋɛ ku ce ŋa. Iŋɛ ì ce iwɛ̃ ŋa ì riisiò iluu.

⁴ Ì jɛ ilu taale ŋa na njɛi inɛ ŋa iyi ì nikã nɔ ì riisi ara nŋɛ do iwɛ̃ ŋa iyi ì cea ara nŋɛ ŋa. Ì kaye ajɔi kuwɛɛ nŋɛ ŋa mbɛ nɔ nfe ku ce nŋɛi í to wa bɛ. Na ŋɔi í ce an jɔ̀ anyɔ ku mu nŋɛ nɔ i baa i jɛ yaakoi dimi mmu ŋa.

⁵ Inɛ ŋa iyi à wa kɔkɔ nŋɛ ŋa do inɛ ŋa iyi à wa hee jĩijĩ ŋa fei, aa maa nyaanyi ŋɛi domi irii ilu nŋɛ í bɛjɛ nɔ laalɔ nŋɛ í la í caa.

⁶ Bi tu ŋɛ si ilui Zeruzalɛmu, inɛ ngbo baa yooma fei í ya maa nyisi gbugbãɛi nɔ ku maa kpa inɛ ŋa.

⁷ Bi tu ŋɛ, inɛ ŋa à donda iyeò baa nŋa ŋa. Inɛ ŋa à ya maa takii inɛ njoo ŋa, nɔ à ya maa taa kɔyɔ ŋa do jaaɔ̃ ŋa gbugbãi.

⁸ A kù waa saalu mii iyi à nya ikã í jɛ titom. A kù mà bɛɛrɛi ajɔi kusĩmim ŋa.

⁹ Irii inɛ ŋa ku sɔ í ya jɔ̀ a maa kpa inɛ ŋai. À ya maa jɛ sɔndai kuwee ŋai si iri kuta ŋa. À ya maa jɛ kuwɛɛ nŋai si sakara.

¹⁰ Inɛ gɔ ŋa à ya maa sũò aboi baa nŋa ŋai nɔ à ya maa bata inaabo ŋa iyi à wa si awaatii awɔ ku mu nŋa.

¹¹ Daa iyi kù sĩai inɛ ŋa à waa ce do aboi kpaasi nŋa ŋa. Inɛ ŋa à ya maa sũò aboi ama nŋa ŋa. Inɛ gɔ ŋa mɔ wecĩ hai jɛ iye akã nŋa ŋa.

¹² Bi tu ŋɛ, inɛ ŋa à ya gba amua ŋai a bɛi a kpa inɛ gɔ. Inɛ ŋa à ya maa wɛ̃a inɛ ŋa fiai do inyi nɔ a maa dɛ si riba. Inɛ ŋa à ya maa taa kpaasi nŋa ŋa gbugbãi ku ba a ba fia. Amma amu, à ya gbɛjɛ idem nii mam mam. Amu Aɔ̃ Lafɛ̃ɛi ǹ fɔ bɛɛbɛ.

¹³ Na nŋu, iŋɛ inɛi Zeruzalɛmu ŋa, an kpã ŋɛ ijui na fia iyi ì ba do yaase iyi kù jɛ dee dee do na inɛ ŋa iyi ì kpau ŋa.

¹⁴ Aa nɛ wɔɔkɔ do gbugbã i temuaò ijuukpãu ŋa waati iyi an dede si ŋɛ wa? Amu Aɔ̃ Lafɛ̃ɛi ǹ wa n fɔ ide, bɛi ǹ nɔ ǹ fɔ bɛɛbɛi ǹ ya n ce.

¹⁵ An fangaa ŋɛi si inɔi dimi mmu ŋa si ilɛ mmu ŋa nɔ an leekĩ kuce hai jɛ dee dee iyi wa dasi ŋɛ riisiu.

¹⁶ Bɛɛrɛ nŋɛ á kayei bi inɛi ilɛ mmu ŋau na kurara nŋɛ ŋa. Nɔ do yaase bɛɛbɛ aa mà ŋa iyi amui ǹ jɛ Aɔ̃ Lafɛ̃ɛ.

¹⁷ Ŋɔi Aɔ̃ Lafɛ̃ɛ í bam ide ku fɔ má í ni,

¹⁸ awɔ amanɛ, inɛi Izirɛli ŋau à yɛi bɛi imii isɔ ŋa. À yɛi bɛi imii isɔ fũfũ, do bɛi lolo iyi à yɔ, do bɛi dimii isɔ kurɔ gɔ, do bɛi isɔ alala gɔ do bɛi isɔ nkpa.

¹⁹ Na ŋɔi í jɔ̀ amu Aɔ̃ Lafɛ̃ɛ ǹ ni, si na iyi í jɔ̀ iŋɛ fei ì baa ì jɛ bɛi imii isɔ ŋa, an tɔtɔɔ ŋɛ wai si inɔ ilu Zeruzalɛmu.

²⁰ Bɛi à ya tɔtɔɔ isɔ fũfũ do isɔ nkpa do isɔ alala, do lolo do isɔ kurɔ a dasi ŋa inɔ caka a bɛi a yɔ ŋa do ina, do yaase bɛɛbɛi, si idɔɔkɔ̃ nlam, an tɔtɔɔ ŋɛ nɔ n yɔ ŋɛ do ina.

²¹ Zeruzalɛmu bɛi an tɔtɔɔ ŋɛ nɔ n jɔ̀ idɔɔkɔ̃m ku naa si ŋɛ bɛi ina, nɔ ku yɔ ŋɛ bɛi isɔ í ya yɔ.

²² Bɛi isɔ fũfũ í ya yɔ si inɔ caka, bɛɛbɛi iŋɛ mɔ aa yɔ ŋa si inɔ ilu Zeruzalɛmu. Do yaase bɛɛbɛ aa mà ŋa iyi amui ǹ jɛ Aɔ̃ Lafɛ̃ɛ iyi í jɔ̀ idɔɔkɔ̃ɛ í naa si ŋɛ.

²³ Aɔ̃ Lafɛ̃ɛ í bam ide ku fɔ má í ni,

²⁴ awɔ amanɛ, sɔ̃ inɛi Zeruzalɛmu ŋa iyi ilɛ nŋa í yɛi bɛi ilɛ iyi ijĩ ci ya wɔ si. An jɔ̀ a ce nfei si ajɔi idɔɔkɔ̃m bɛi ilɛ ngbɛ hai nɛ mandi.

²⁵ Waliiɛ ŋa à yɛi bɛi muusu nla iyi wa dɔ̃ anu wa ŋɔò mɛɛmu iyi í mu. À waa kpa inɛ ŋa, à waa ko fia nŋa ŋa do mii jiida nŋa ŋa, nɔ à jɔ̀ jaaɔ̃ ŋa à waa kɔ̃ si inɔ iluu.

²⁶ Woo weeɛ ŋa a kù waa jirima woodam nɔ a kù mà bɛɛrɛi inya ŋa iyi à nya ikã à jɛ titom. A kù waa fɛɛfɛ mii iyi í má do iyi kù má. A kù waa kɔ inɛ ŋa bɛi aa mà mii iyi í riisi do iyi kù riisi. A kù waa saalu ajɔi kusĩmim ŋa, nɔ si anini nŋa à bɛjɛ irim.

²⁷ Inɛ ngbo ŋau à ya maa kpa inɛ ŋai bɛi mɛɛmui sako ŋa. À ya nya hunde ŋai a bɛi a ko fia nŋa ŋa.

²⁸ Walii nŋa ŋau à waa dĩ iju nŋai bɛi mii gɔ iyi à jɔsi ila fũfũ à biiɛ. Lasabui aŋa taka nŋai à waa sisi nŋa do kuyɛ ibo ŋa. À ya ni idem nii aŋa à waa fɔ, nɔ wee n kù sɔ̃ ŋa ide kãma.

²⁹ Si ilɛu bii fei inɛ ŋa à waa taa inɛ ŋa gbugbãi à waa gba mii ndii ilu are ŋa do hai nɛ gbugbã ŋa. À waa takii inɛ njoo ŋa nɔ à waa kɔ̀ ŋa ntɔ.

³⁰ Ǹ dɛdɛ inɛ gɔ si inɔ nŋa iyi á ma bindiu ku kaakoɛ nɔ ku maa leekĩ bi foo ku ba n maà n naa n ce nfei ilɛu, amma n kù ba.

³¹ Na ŋɔi í ce ǹ jɔ̀ idɔɔkɔ̃ nlam í naa si ŋa do gbugbã. An jo ŋai do ina nla nla. Kuce laalɔ iyi à ce fei si iri nŋai á cuku si. Amu Aɔ̃ Lafɛ̃ɛi ǹ fɔ bɛɛbɛ.