Ezekiɛli 21 - Bibeli do fee

Laabaau laalɔ gɔ si gãmɛi Izirɛli

¹ Aɔ̃ Lafɛ̃ɛ í bam ide ku fɔ í ni,

² awɔ amanɛ, sinda i cɔ ikpa awɔ cangai kpãai inunui ilɛu, nɔ i sɔ̃ inɛ ŋa iyi à wa agboi awɔ cangai kpãai inunuu idei ijuukpã iyi an jɔ̀ ku naa si ŋa.

³ Sɔ̃ inɛi awɔ cangai kpãai inunu ŋau i ni a gbɔ ide iyi amu Aɔ̃ Lafɛ̃ɛ ǹ wa n fɔ si gãmɛi agbou. Ǹ ni an dasi agbou inai. Inau á jo jĩi tũtũ do jĩi ngbɛ fei, nɔ nkãma kaa yɔkɔ ku kpaa. Á joi hai awɔ cangai kpãai inunu hee ku bɔ awɔ njɛi kpãai inunu, nɔ inɛ fei á joi.

⁴ Inɛ fei á yɛ iyi amui ǹ dasi inyau ina nɔ nkãma kaa yɔkɔ ku kpaa.

⁵ Nɔ amu Ezekiɛli ǹ jɛ ǹ ni, Aɔ̃ Lafɛ̃ɛ, inɛ ŋau à waa ni, alái ǹ wa n kpa.

⁶ Ŋɔi Aɔ̃ Lafɛ̃ɛ í bam ide ku fɔ má í ni,

⁷ awɔ amanɛ, sinda i cɔ ikpa ilui Zeruzalɛmu nɔ i fɔ idei ijuukpã iyi á naa si bi kuweeɛ ŋau. Ce waliii ideu si ilɛi Izirɛli.

⁸ Aa sɔ̃ ŋai i ni amu Aɔ̃ Lafɛ̃ɛ ǹ ni an dede si ŋa wa n yɔ taakubam hai si ankɔ̃ɔɛ n kpaò inɛ dee dee ŋa do inɛ laalɔ ŋa fei si ilɛu.

⁹ Ǹ wa n bi n kpa inɛ jiida ŋa do inɛ laalɔ ŋa feii si ilɛu, hai awɔ cangai kpãai inunu hee ku bɔ awɔ njɛi kpãai inunu. Na ŋɔi í jɔ̀ ǹ nya taakubam hai si ankɔ̃ɔɛ.

¹⁰ Inɛ fei á mà iyi amu Aɔ̃ Lafɛ̃ɛ ǹ nya taakubam hai si ankɔ̃ɔɛ nɔ n kaa n sindoɛ má.

¹¹ Awɔ amanɛ, kakaa, i kɔmba na inɔ kufɔ nla nla. Aa maa kakaai si wajui inɛ fei.

¹² Inɛ ŋa aa beeɛ a ni, na mii í jɔ̀ ì waa kakaa. Aa jɛ nŋa i ni, laabaau laalɔ gɔi ǹ gbɔ iyi á na ku ce. Inɛ ŋa aa wɛɛò inɔ kufɔ nɔ a kua gbugbã. Ilu wɔɔkɔ ŋa aa kua gbugbã, nɔ ilugũ ŋa a kua gbugbã. Mii iyi Aɔ̃ Lafɛ̃ɛ í ni á ceu nŋui í sinti bɛ tã.

Idei taakuba

¹³ Aɔ̃ Lafɛ̃ɛ í bam ide ku fɔ má í ni,

¹⁴ awɔ amanɛ, ba inɛ ŋau ide ku fɔ, sɔ̃ ŋa iyi amu Aɔ̃ Lafɛ̃ɛ ǹ fɔ ǹ ni, taakuba wa naa, taakubau à kpã anuɛ jiida jiida.

¹⁵ À kpãai na a kpaò amanɛ. À kpãai hee wa daana. Na nŋu, aa ka maa wɛɛò inɔ didɔ̃? Goloi ama inɛmɔkɔm wa yaako jĩi fei.

¹⁶ Ǹ ni a teese anuɛi ku ba a ceò icɛ. À kpãai í dɔ̃ anu ku ba a na woo kpa inɛu.

¹⁷ Dɔ̃ anui inɔ kufɔ, awɔ amanɛ, domi taakubau si inɛm ŋa do si ilaalui Izirɛli ŋai á naa. Aa ce nfe nŋai do zamaau fei ajɔ. Dɔ̃ anui inɔ kufɔ.

¹⁸ Ntɔ ntɔ, laakai ku cɔ nla nla gɔi. Aɔ̃ Lafɛ̃ɛ í ni, bɛirei á na ku jɛ, bii golo ku yaako inɛu kù wɛɛ má.

¹⁹ Bɛbɛi, awɔ amanɛ, ce walii. Dakpɛ fii akã, fii minji, fii mɛɛta, domi taakubau ikui á naaò wa. Iku nla nlai á ce bii fei.

²⁰ Inɛ ŋa aa kua gbugbãi nɔ aŋa fei a cuku. Taakuba ku ce nfei inɛu í wa andɛ koofa feii. À kpãa wa daanai a ceò nfei inɛ ŋa.

²¹ Taakuba ku dɔ̃ anu, fĩ do njɛ, fĩ do canga. Bɔ do ikpa bii à to anuɛ fei.

²² Amu takam an maa n cãi do awɔm hee idɔɔkɔ̃m koo sũ. Amu Aɔ̃ Lafɛ̃ɛi ǹ fɔ bɛɛbɛ.

Ilaalui Babilɔni í naa igũ Zeruzalɛmu

²³ Aɔ̃ Lafɛ̃ɛ í bam ide ku fɔ má í ni,

²⁴ awɔ amanɛ, nya kpãa minji bii ilaalui Babilɔni á ba ku too ku naaò wa igũ. Jɔ̀ kpãa minji ŋau fei a fita hai ilɛ akãu. Nɔ hai bii kpãa ŋau à sinti i ce nyinda gɔ iyi á nyisi ilu bii à waa bɔ.

²⁵ Kpãa ŋau akãi soogei inɛi Babilɔni ŋa aa too a bɔò Raba ilu nlai inɛi Amɔɔ ŋa. Akã mɔ ikpa Zeruzalɛmu ilu ku nɛ gbugbãi ilɛi inɛi Zudaa ŋai á bɔ.

²⁶ Ilaalui Babilɔni í wa akonkoi kpãa minji ŋau wa ce kubee. Wa sɔ afa ŋa lele, wa ce kubee bi iwɛ̃ iyi à ya kpe terafimu nɔ wa cɔ idɔi mɛɛmu ŋa.

²⁷ Si kubeeu, afa iyi í so Zeruzalɛmuu, do ikpa awɔ njɛɛi í wa. Á dɔ̃ anui igũi nɔ ku na nyindai kusintii igũu. Aa jilɛ jĩnɛi igũ ŋai si anu koofai Zeruzalɛmu. Aa ce timtim dii sãai bii aa ya gũ a lɔò nɔ a ma geete ŋa.

²⁸ Amma inɛi Zeruzalɛmu ŋa a kù tamaa mà kubeeu í jɛ taale si na iyi í jɔ̀ akabuu í wa gãmɛ nŋa. Amma ilaalui Babilɔniu í ye ŋa gigi iyi kuce nŋa kù jɛ dee dee, nɔ na nŋu bɛi á jɔ̀ a mu ŋa a nɛò ŋa ilɛ mmu.

²⁹ Amu Aɔ̃ Lafɛ̃ɛ ǹ ni, n kù gbɛjɛ laalɔ ŋa iyi ì ya maa ce ŋa si na iyi í jɔ̀ ì waa mɔsi do laalɔ ku ce nŋɛ ŋau ŋa, nɔ ì jɔ̀ à waa fa laakaim ŋa. Na nŋu, aa dasi awɔi mbɛɛ nŋɛ ŋai.

³⁰ Awɔ ilaalui Izirɛli ilu inɔ kukã inɛ laalɔu, awaati wa naa iyi laalɔ ku ceɛ á to kɔɔ.

³¹ Ide iyi amu Aɔ̃ Lafɛ̃ɛ ǹ wa n fɔ wee. Ǹ ni, aa na a nya bɔngɔtɔbɛɛ, do fulai ilaaluɛ. Mii fei á kpaasii. Inɛ iyi à kaye aa soo lele. Nɔ inɛ iyi à so lele aa kayeɛi.

³² Nfe ku ce nŋu akãi í gbe. Zeruzalɛmu á kpɔò bomma. Iluu aa ce nfeɛi mam mam. Inɛ bɛ fei á cei hee inɛ iyi an na gbugbã ku jɔ̀ ijuukpãu ku naa ku maa to wa.

Aa naa si inɛi Amɔɔ ŋa igũ

³³ Aɔ̃ Lafɛ̃ɛ í fɔ má í ni, awɔ amanɛ, sɔ̃ inɛi Amɔɔ ŋa mii iyi á ba ŋa si gãmɛi kuce laalɔ nŋa. Aa ni, à nya taakuba wa hai si ankɔ̃ɔɛ. À kpãa andɛɛ wa daana a kpaò inɛ ŋa.

³⁴ Iŋɛ inɛi Amɔɔ ŋa, kuyɛ ibo nŋɛ ŋa do lasabu ibo nŋɛ ŋa ì waa kaaba ŋa, amma taakuba á bu iri nŋɛi bɛi à bu ti ilu inɔ kukã ŋau waati iyi laalɔ ku ce nŋau í to kɔɔ.

³⁵ Nsɛi, i sindo taakuba nŋɛ ŋau si ankɔ̃ɔ nŋa. An kiiti ŋɛi tengi bii à taka ŋɛ, si ilɛ bii à bí ŋɛ.

³⁶ An jɔ̀ idɔɔkɔ̃m ku naa si ŋɛ. Á naa si ŋɛi bɛi ina. An so ŋɛi n dasi ŋɛ si awɔi inɛ laalɔ ŋa do si awɔi woo taa inɛ ŋa gbugbã ŋa.

³⁷ Inai á jo ŋɛ nɔ njɛ nŋɛ á fangaai si ilɛu fei. Inɛ kãma kaa ye gigi nŋɛ má. Amu Aɔ̃ Lafɛ̃ɛi ǹ fɔ bɛɛbɛ.