Ezekiɛli 2 - Bibeli do fee

Ilaaɔ̃ í bɛ Ezekiɛli bi inɛi Izirɛli ŋa

¹ Ŋɔi í sɔ̃m í ni, awɔ amanɛ, dede i leekĩ nɔ n baɛ ide ku fɔ.

² Hai wa sɔ̃m ide ŋau gbakã, hundeɛ í lɔ sim nɔ í jɔ̀ ǹ dede ǹ leekĩ, ǹ wa n gbɔ imui inɛ iyi wa bam ide ku fɔu.

³ Ŋɔi í ni, amanɛ, amui ǹ wa n bɛɛ bi inɛi Izirɛli ŋa, aŋa dimii woo kɔ̀ ide ŋa iyi à dedeò ide ku kɔ̀ sim. Bɛi bala nŋa ŋa à ce ide ku kɔ̀u, bɛɛbɛi aŋa mɔ à waa ce hee ku baa nnyiu ihɛ̃.

⁴ Inɛ ŋau à gaabu nɔ idɔ nŋa í le. Ǹ wa n bɛɛi bi tu ŋa nɔ aa sɔ̃ ŋa ide ŋa iyi amu Aɔ̃ Lafɛ̃ɛ ǹ fɔ.

⁵ Bii à gbɔ ideɛ walakɔ bii à kɔ̀ ku gbɔ si na iyi í jɔ̀ à jɛ woo yika itĩ ŋa, aa mà iyi walii gɔ í wa si inɔi aŋa.

⁶ Awɔ amanɛ, maà jɔ̀ njo ku muɛ si ŋa, maà jɔ̀ njo ku muɛ si ide ku fɔ nŋa. Á yɛ bɛi aa koo wa si inɔi agũ ŋai nɔ aa koo buba si antaii cencee ŋai. Do nŋu fei maà jɔ̀ zigiɛ ku daò ide nŋa, nɔ i maà maa yaya do njo si waju nŋa si na iyi í jɔ̀ à jɛ inɛ ŋa iyi à yika itĩ.

⁷ Ide iyi ǹ sɔ̃ɛi aa koo i sɔ̃ ŋa. Á yɔkɔ ku jɛ aa gbɔ ideɛ walakɔ a kɔ̀ ku gbɔ si na iyi í jɔ̀ à jɛ inɛ ŋa iyi à yika itĩ.

⁸ Amma awɔ amanɛ, gbɔ iyi ǹ wa n sɔ̃ɛ. Maà ce bɛi aŋa iyi à yika itĩ ŋau. La gɛlɛɛ i jɛ mii iyi an naɛ.

⁹ Ŋɔi ǹ yɛ awɔ gɔ í naa sim wa mu tia gɔ iyi à ka.

¹⁰ Í fũ tiaui si wajum nɔ ǹ yɛ à kɔɔi anyiò waju. Ide iyi à kɔ siu wa ni, kukpata do weewea do kukakaa.