Ezekiɛli 19 - Bibeli do fee

Kukpatai akũi ilaalui Izirɛli ŋa

¹ Aɔ̃ Lafɛ̃ɛ í ni n kɔ̃ irii akũ ti ilaalui inɛi Izirɛli ŋa.

² Iye nŋɛ muusu nlai. Wa sũ si inɔi muusu nla ŋa, amaɛ ŋa à kaakoɛ nɔ wa na ŋa amɔ.

³ Si amaɛ ŋau í kɔ inɛ akã nŋa í baa í jɛ muusu nla awaasũ, í kɔɔ si bɛi à ya ŋɔ iŋa, nɔ nŋui á ce nfei amanɛ ŋa.

⁴ Dimi mmu ŋa à gbɔ baauɛ, nɔ à jɔ̀ í dasi inɔ lumbu gɔ. Ŋɔi à lu imɔɛ à daa si isɔ gɔ bɛi lɛlɛawɔ, nɔ à muu à nɛòɛ ilɛi Ezibiti.

⁵ Waati iyi muusu nla iyei ama wa degbe, nɔ í na í mɔngɔ temua, í ya so amaɛ akãi ku jɔ̀ ku jɛ ilu gbugbã.

⁶ Í ya maa dabii si inɔi muusu nla ŋau ku baa ku jɛ ilu gbugbã. Í ya kɔkɔ iŋa ku ŋɔi nɔ ku maa ce nfei amanɛ ŋa.

⁷ Í mu jaaɔ̃ ŋau í nɛò ŋa nɔ í ce nfei iluu. Inɛi ilɛ ŋau do mii iyi í wa si fei njo í ya mu ŋai na ibai anu ku dɔ̃ɛu.

⁸ Dimi mmu ŋa à naa hai do bii fei a na a tɔtɔɔ siɛ. À leea taa nɔ à jɔ̀ í dasi lumbu nŋa.

⁹ Ŋɔi à lu imɔɛ à daa si isɔ gɔ bɛi lɛlɛawɔ, à bɔòɛ bi ilaalui Babilɔni à koo à dasiɛ piisɔ̃ɔ ku ba a maà gbɔ anu ku dɔ̃ɛ má si iri kutai Izirɛli ŋau.

Kukpatai inɔ kufɔ si gãmɛi jĩi ndii rezɛ̃ɛ

¹⁰ Iyeɛ í yɛi bɛi jĩi ndii rezɛ̃ɛ iyi à lɔ kɔkɔi itĩi ido. Í so nɔ í nɛ wua ŋa na inyi iyi wa ba.

¹¹ Í nɛ amaawɔ ŋa iyi à nɛ gbugbã iyi à na à jɛ goloi ilaalu ŋa. Kugbokaɛ í re ama jĩi ŋa iyi à wa bɛ fei. À ya maa yɔɔi na kugbokaɛu do na amaawɔ nkpɔɛ ŋa.

¹² Amma à tuu do idɔɔkɔ̃ nɔ à nyɔɔ ilɛ. Fufui nunui daakɔ í jɔ̀ isoɛ ŋa à gbɛ. Amaawɔ ku nɛ gbugbãɛ ŋau à gbɛ nɔ ina í jo ŋa.

¹³ Nɔ nsɛi à koo à lɔɔ si gbaa si ilɛ ngbɛ tengi bii inyi kù wa.

¹⁴ Ina í na í fita wa hai si icuɛ í jo amaawɔɛ ŋa do isoɛ ŋa. Jĩi nla nlau kù nɛ amaawɔ ku nɛ gbugbã ŋa iyi aa na a jɛ goloi ilaalu ŋa má. À nɛ a ya maa kɔ̃ iriu ihɛ̃i bɛi irii akũ.