Ezekiɛli 18 - Bibeli do fee

Ilaaɔ̃ á kiiti inɛ baa yooma feii si yaasei isɛɛnɛɛ

¹ Aɔ̃ Lafɛ̃ɛ í bam ide ku fɔ í ni,

² Ezekiɛli, na mii í jɔ̀ si ilɛi Izirɛli inɛ ŋa à ya maa kpa mɔndau ihɛ̃ a maa ni, baa ŋa à jɛ isoi rezɛ̃ɛ iko nɔ gɛlɛi amu ŋa í bɔ.

³ Amu Aɔ̃ Lafɛ̃ɛ ǹ wa n fɔɔi do kugbasi, i kaa gbɔ mɔndau ihɛ̃ má ŋa si ilɛi Izirɛli.

⁴ Amui ǹ wa n mu kuwɛɛi inɛ baa yooma fei. Kuwɛɛi ama do ti baa fei bi tom nii í wa. Inɛ nŋa iyi í ce dulum lafɛ̃ɛi á ku.

⁵ Ka so yaase si gãmɛi inɛ gɔ iyi wa ce mii iyi í jɛ jiida iyi wa nɛ si dee dee ku jɛ do si ntɔ.

⁶ Lafɛ̃ɛ ci ya jɛ ijɛi kuwee ŋa si iri kuta ŋa nɔ ci ya gulɛ ku tɔɔ iwɛ̃i inɛi Izirɛli ŋa. Ci ya dasi aboi ngu ŋa anyɔ, nɔ ci ya tɔtɔɔ sɛ̃ɛ do inaabo gɔ waati iyi wa ce awɔ ku mu.

⁷ Inɛɛu ci ya takii inɛ ŋa, nɔ tɔɔma iyi í gba, í ya sindoi. Ci ya ce ile. Inɛ iyi ari wa kpa, í ya muaa sɔndai. Inɛ iyi í wɛɛ basĩ, í ya muaa jĩnɛi.

⁸ Ci ya wɛ̃a inɛ ŋa fia do inyi, nɔ ci ya maa dɛdɛ si riba. Ci ya nɛ baa si mii iyi kù jɛ dee dee, nɔ í ya kiitii si ntɔ si gãmɛi amanɛ minji.

⁹ Í ya jirima ikɔm ŋai do woodam ŋa, nɔ ku maa nɛ si ntɔ. Amu Aɔ̃ Lafɛ̃ɛ ǹ wa n fɔi iyi inɛ dimi bɛɛbɛ, inɛ dee deei, nɔ á maa wɛɛi.

¹⁰ Bii í jɛ inɛɛu í nɛ ama inɛmɔkɔ, nɔ í jɛ woo bata ku gba do woo kpa inɛ walakɔ í ce kurara ŋau akãɛ gɔ,

¹¹ baa do iyi baaɛu kù ce baa akãi kurara ŋau bɛ, bii amaɛu wa jɛ ijɛi kuwee ŋa si iri kuta ŋa, bii wa dasi aboi ngu ŋa anyɔ,

¹² bii wa takii ilu are ŋa do hai nɛ gbugbã ŋa, nɔ wa ce ile, bii ci ya sindo tɔɔma, nɔ ijuɛ si iwɛ̃ ŋa ku tɔɔ do laalɔ ŋa ku cei í ya wa,

¹³ bii wa wɛ̃a inɛ ŋa fia do inyi nɔ ku maa dɛdɛ si riba, amau bɛ á maa wɛɛ mbɛ? Aawo, kaa wɛɛ, domi laalɔ nla nlai wa ce. Aa kpaai, nɔ ikuɛ á jɛ idei iriɛ.

¹⁴ Amma bii í na í bí ama inɛmɔkɔ, bii amau í dede í yɛ dulum ŋa iyi baaɛ í ce nɔ kù ce bɛɛbɛ,

¹⁵ nɔ ci ya jɛ ijɛi kuwee ŋa si iri kuta ŋau, nɔ ijuɛ ci ya wa si iwɛ̃ ŋau ku tɔɔ, nɔ ci ya dasi aboi kpaasiɛ anyɔ,

¹⁶ nɔ ci ya takii inɛ gɔ, nɔ ci ya gba tɔɔmai inɛ gɔ, nɔ ci ya ce ile, nɔ inɛ gɔ iyi ari wa kpa, í ya muaa sɔnda, nɔ í ya bii anyii inɛ iyi í wɛɛ basĩ,

¹⁷ nɔ ci ya taa ilu are gbugbã, nɔ ci ya wɛ̃a inɛ fia do inyi walakɔ ku maa dɛdɛ siɛ riba, nɔ wa jirima ikɔm ŋa do woodam ŋa, amau kaa ku na kurarai baaɛ. Ntɔ ntɔ, á maa wɛɛi.

¹⁸ Baaɛ iyi í taa inɛ mmu ŋa gbugbã, í ce inɛ ŋa ile, í cea inɛɛ ŋa mii iyi kù sĩa, nŋui á ku na kuraraɛ.

¹⁹ Aa maa bee ara nŋɛ ide ŋa i maa ni, na mii í ce amau kù so kurarai baaɛ ŋau. Amau kù sooi si na iyi í jɔ̀ í jɛ kuwɛɛɛ si dee dee kú jɛ, nɔ í jirima woodam ŋa í ceò ŋa icɛ, na ŋɔi í jɔ̀ á wɛɛ.

²⁰ Inɛ iyi í ce dulum, lafɛ̃ɛi á ku. Ama kaa so asoi dulum dii baaɛ, nɔ bɛɛbɛ mɔi baa mɔ kaa so asoi dulum dii amaɛ. Inɛ dee dee, ribai dee dee kú jɛɛi á ba. Inɛ laalɔ mɔ ribai laalɔɛi á ba.

Ikɔ si gãmɛi kuce jiida

²¹ Bii inɛ laalɔ í jɔ̀ laalɔ ku ceɛ, bii wa jirima woodam, nɔ wa ce mii iyi í jɛ dee dee do iyi í tɛ, á maa wɛɛi kaa ku.

²² Laalɔ ŋa iyi í ce fei, aa gbɛjɛ ideɛi, nɔ á maa wɛɛi na dee dee ku jɛɛu.

²³ Amu Aɔ̃ Lafɛ̃ɛ n kù bi ilu dulum ku ku si dulum dɛɛ. Ǹ bi ku jɔ̀ɔi nɔ ku ba kuwɛɛ.

²⁴ Bii í jɛ inɛ dee dee gɔ í jɔ̀ dee dee ku ce nɔ í lɔ si kpãai laalɔ bɛi inɛ laalɔ ŋa, ì tamaa á wɛɛi ŋa? Aawo, mii jiida ŋa iyi í tako í ceu bɛ fei aa gbɛjɛɛi. Laalɔ iyi í lɔsi ku ceu, nŋui á jɔ̀ ku ku.

²⁵ Ì ya fɔ i maa ni ŋa lasabui amu Aɔ̃ Lafɛ̃ɛ kù jɛ dee dee. I sotĩ i gbɔ, iŋɛ inɛi Izirɛli ŋa, lasabum nii kù jɛ dee dee? Mà lasabu nŋɛ ŋa.

²⁶ Bii inɛ dee dee gɔ í jɔ̀ jiida ku ceɛ nɔ í lɔsi laalɔ ku ce, nɔ í ku si bɛ, laalɔɛu bɛi í kpaa bɛ.

²⁷ Bii inɛ laalɔ gɔ í fũsi laalɔ iyi wa ce awɔ, nɔ wa ce mii iyi í tɛ do iyi í jɛ dee dee, hundeɛ á maa wɛɛi.

²⁸ Bii í yɛ laalɔ ŋa iyi nŋu wa ce nɔ í jɔ̀ɔ fei, ntɔ ntɔ á wɛɛi kaa ku má.

²⁹ Iŋɛ inɛi Izirɛli ŋa ì ya fɔ i maa ni ŋa lasabui amu Aɔ̃ Lafɛ̃ɛi kù jɛ dee dee. Lasabum nii kù jɛ dee dee? Aawo, lasabu nŋɛi kù jɛ dee dee.

³⁰ Na nŋu, an kiiti ŋɛi iŋɛ inɛi Izirɛli ŋa fei akã akã si kuce nŋɛ ŋa. Amu Aɔ̃ Lafɛ̃ɛi ǹ fɔ bɛɛbɛ. Debɛi i sinda wa, i sinda i toa kurara nŋɛ ŋau anyi ŋa ku ba kurara nŋɛ ŋau a maà jɛ bi ku koosɛ nŋɛ.

³¹ Ì nyɔ kurara nŋɛ ŋa iyi à waa dasi ŋɛ dulum nɔu, i kpaasi idɔ nŋɛ nɔ i kpaasi lasabu nŋɛ. Na mii í jɔ̀ aa maa bi i ku ŋa iŋɛ inɛi Izirɛli ŋa.

³² Ntɔ ntɔ amu Aɔ̃ Lafɛ̃ɛ ǹ wa n fɔi, n kù bi inɛ gɔ ku ku. I sinda wa bi tom nɔ i wɛɛ ŋa.