Ezekiɛli 17 - Bibeli do fee

Kungbã minji do jĩi ndii rezɛ̃ɛ

¹ Aɔ̃ Lafɛ̃ɛ í bam ide ku fɔ í ni,

² awɔ amanɛ, kpaa inɛi Izirɛli ŋa mɔnda.

³ Sɔ̃ ŋa i ni amu Aɔ̃ Lafɛ̃ɛi ǹ ni i sɔ̃ ŋa iyi kungbã nla iyi í nɛ ikpa sisɔ do nto sisɔ ku nɛ ila ikã ikãu, í bɔ hee Libãa nɔ í gũ iri kutaɛ ŋau í koo í cɛ imɔi jĩi ndii sɛɛdi wa.

⁴ Í nya amaawɔ iyi í gboka í reu, í nɛò ilɛ bii à ya nya sĩa, nɔ í koo í jilɔɔ si ilu gɔ bii woo nya sĩa ŋa à wa.

⁵ Í so ama jĩi mmu gɔ hai ilɛu í koo í jilɔɔ tengi bii ama jĩi ŋa à wa. Nɔ í na í koo í lɔɔ itĩi ido nɔ í lɔɔ bɛi jĩi gɔ iyi à ya kpe saulu.

⁶ Jĩi nɔu í dede í la bɛi jĩi ndii rezɛ̃ɛ, amma kù gboka. Amaawɔɛ ŋa à waa cɔ ikpa bi kungbãu. Icãɛ ŋa à mi ilɛ. Nɔ í ya maa ce amaawɔ ŋai waati kãma fei.

⁷ Kungbã nla mmu gɔ í wa bɛ. Ikpaɛ ŋa à la nɔ í nɛ nto nkpɔ nkpɔ. Jĩi ndii rezɛ̃ɛu í sinda icãɛ do amaawɔɛ ŋa ikpa bi kungbãu ku ba kungbãu ku maa muaa inyi.

⁸ Si ilɛ ncɛɛi à lɔɔ kɔkɔi inyi nla. Do yaase bɛɛbɛi á ce amaawɔ ŋa ku ba ku so nɔ ku ce jĩi ndii rezɛ̃ɛ nla nla.

⁹ Sɔ̃ ŋa i ni amu Aɔ̃ Lafɛ̃ɛ ǹ ni, jĩi nɔu á la mbɛ? Kungbãu kaa wu icãɛ ŋa? Kaa bɛjɛ isoɛ ŋa? Jĩi nɔu kaa gbɛ? Wua kpɔtɔɔ ŋa iyi á wu ŋau a kaa gbɛ? Kaa nɛ bukaatai gbugbã nla nla walakɔ zamaa a bɛi a wu icãɛ.

¹⁰ Jĩi nɔu wee à lɔɔ í ce jiida. Á la mbɛ? Bii fufui nunui daakɔ í dede siɛ wa, kaa gbɛ mam mam? Á gbɛi si ilɛ tengi bii à lɔɔu bɛ.

Kutusɛi mɔndau

¹¹ Aɔ̃ Lafɛ̃ɛ í bam ide ku fɔ má í ni

¹² n koo n bee inɛ ŋa iyi à yika itĩ ŋau n ni, ì gbɔ yaasei ideu ihɛ̃ mbɛ ŋa? Nɔ í ni n ye ŋa gigi iyi ilaalui Babilɔni í bɔ Zeruzalɛmu í mu ilaaluu do inɛ ngbo mmu ŋa í naaò ŋa wa si ilɛi Babilɔni.

¹³ Í so inɛ akã gɔ si dimii ilaaluu, í dĩ akabuu do nŋu. Nɔ ilaaluu í mu inɛ ngbo ilu bɛɛrɛ ŋa iyi à wa si ilɛu í nɛò ideɛ,

¹⁴ ku ba ilɛu ku nyi do anyi ku maà yɔkɔ ku bɔ waju má, nɔ ku maa jirima akabuu iyi à jilɛau dee dee.

¹⁵ Amma ilaalu titɔ̃u í dedeò ide ku kɔ̀ si gãmɛi ilaalui Babilɔniu. Ŋɔi í bɛ inɛɛ ŋa ilɛi Ezibiti a koo a dɛ acĩ ŋa do sooge ŋa wa nkpɔ nkpɔ. Inɛ iyi í ce bɛɛbɛu á yɔkɔ ku fita si mbɛ? Aawo. Kaa yɔkɔ, domi í fũ akabuu mbɛ.

¹⁶ Ntɔ ntɔ amu Aɔ̃ Lafɛ̃ɛ ǹ wa n fɔɔi do kugbasi iyi ilaaluu bɛ á kui si ilɛi ilaalu iyi í naa bommau, domi kù jirima akabuuɛ nɔ í dede si ide iyi à fɔ à jilɛu. Babilɔni bɛi á ku.

¹⁷ Faraɔ̃ ilaalui Ezibiti, baa do woo ja igũ nkpɔ nkpɔ ku nɛ gbugbãɛ ŋau, kaa yɔkɔ ku sobiɛ ku kɔ̀òɛ si igũu. Si waatii igũu inɛi Babilɔni ŋa aa ma idĩ bii aa gũ a maa ceò igũ nɔ a tu isa nla nla ku ba a kpa zamaa nkpɔ nkpɔ.

¹⁸ Ilaalui Zudaau kù ceò kugbasiɛu icɛ nɔ kù jirima akabuu. Si bɛi í ce bɛɛbɛ, kaa fita si.

¹⁹ Na ŋɔi í ce amu Aɔ̃ Lafɛ̃ɛ ǹ fɔ do kugbasi ǹ ni, akabuu iyi ilaaluu í fɔ do kugbasi si wajum í ni nŋu á ceò icɛu, kù jirimaɛ. An jɔ̀ ku ba ijuukpãɛi.

²⁰ An leea cɛkũm nii nɔ n muu n nɛòɛ Babilɔni. Bɛi an kiitia n yɛ taaleɛ si laalɔ iyi í ce bi tom.

²¹ Si wuaai soogeɛ ŋa inɛ ŋa iyi à mà igũ fei aa kpa ŋai si igũu. Nɔ inɛ ŋa iyi aa ba a gbeu aa fangaai bii fei. Do yaase bɛɛbɛ, aa mà ŋa iyi amu Aɔ̃ Lafɛ̃ɛi ǹ ba ŋɛ ide ku fɔ.

Kuwãi Aɔ̃ Lafɛ̃ɛ ŋa

²² Iyi bɛi í jɔ̀ amu Aɔ̃ Lafɛ̃ɛ ǹ fɔ ǹ ni, amu takam nii an ga amaawɔ kpɔtɔɔi sɛɛdi iyi í kpa iri lelei jĩi nɔu wa nɔ n koo n lɔɔ si antaii iri kuta kugboka gɔ.

²³ An koo n lɔɔi si iri kuta iyi í gboka í re si ilɛi Izirɛliu. Á yɔ amaawɔ ŋa, á so iso, á ce jĩi ndii sɛɛdi nla nla. Yɛi dimi ikã ikã feii á ya ce antɛɛ si amaawɔɛ ŋa nɔ aa ya wa si abɛ jĩjĩɛ.

²⁴ Si bɛɛbɛ jĩi ndii inɔ sako ŋa fei aa mà iyi amui ǹ jɛ Aɔ̃ Lafɛ̃ɛ. Jĩi iyi í gboka an jɔ̀ ku baa ilɛ nɔ iyi kù gboka n jɔ̀ ku bɔ lele. An jɔ̀ jĩi tũtũ ku gbɛ nɔ n jɔ̀ jĩi ngbɛ ku da koko. Amu Aɔ̃ Lafɛ̃ɛi ǹ fɔ ide nɔ bɛɛbɛi an ce.