Ezekiɛli 16 - Bibeli do fee

Zeruzalɛmu í yɛi bɛi ama iyi à nyɔ

¹ Aɔ̃ Lafɛ̃ɛ í bam ide ku fɔ í ni,

² awɔ amanɛ, sinda i cɔ ikpa Zeruzalɛmu i nyisiɛ laalɔ ŋa iyi í ce.

³ Sɔ̃ɔ i ni amu Aɔ̃ Lafɛ̃ɛ ǹ ni, awɔ Zeruzalɛmu, ilɛi Kanaãi í jɛ idei balaɛ ŋa. Tengi bɛi à bíɛ. Baaɛ inɛi Amɔrei nɔ iyeɛ mɔ inɛi Hɛtii.

⁴ Waati iyi à bíɛu, a kù bu iwɔɛ, a kù wɛɛ do inyi, a kù sisaɛ do imu hee i maaju, nɔ a kù woɛ do acɔ.

⁵ Inɛ gɔ kù cɔɛ hee araare ku muu ku ceɛ mii ŋau bɛ baa akã. Amma si na iyi í jɔ̀ a kù biɛ, à nyɔɛi ilɛ ajɔ iyi à bíɛ.

⁶ Iyi amu Aɔ̃ Lafɛ̃ɛ ǹ na ǹ wa n lɔ kɔkɔɛ Zeruzalɛmu, ǹ hɔ̃nnɛɛ ì waa bimbili si njɛ. Nɔ ǹ ni, wɛɛ, wɛɛ, baa do iyi ì waa bimbili si njɛ fei.

⁷ Ǹ jɔ̀ ì dede ì la bɛi jĩi si inɔ iko. Ì waa nɛ baani nɔ ì baa ì sĩa ì re inɛ fei. Amɔɛ ŋa à la nɔ ntoɛ ŋa à waa la, amma basĩi ì wɛɛ popoopo.

⁸ Ŋɔi ǹ nyi wa má ǹ lɔ kɔkɔɛ nɔ ǹ ba wee ì to awaati bii à nɛ a nɛ kubiɛ. Ŋɔi ǹ fũ ibɔ nlam ǹ bii basĩɛ nɔ ǹ ceɛ kuwã ǹ dĩ akabuu do awɔ. Si bɛɛbɛi amu Aɔ̃ Lafɛ̃ɛ ǹ fɔ ǹ ni ì baa ì jɛ tom.

⁹ Ǹ wɛɛ do inyi. Ǹ nya njɛ iyi wa masiɛu, nɔ ǹ jɔɔɛ ikpo ku dɔ̃ inunu.

¹⁰ Ǹ daaɛ si jĩnɛ ku nɛ booda, do baatai bata, do kungbã ku nɛ gbugbã, do ibɔ nla ku nɛ sisima.

¹¹ Jĩnɛ kusĩa ŋai ǹ biiɛ do, nɔ ǹ daaɛ si isɔi awɔ ŋa do saba.

¹² Ǹ daaɛ si mii bɛi lɛlɛawɔ gɔ si imɔɛ, ǹ daaɛ si hanlaga si itĩɛ ŋa, nɔ ǹ daaɛ si fula kusĩa gɔ si iriɛ.

¹³ Boodaɛ ŋau mɔ, à ce ŋai do wura do isɔ fũfũ. Jĩnɛɛ ŋau mɔ à ce ŋai do ikũ ku nɛ gbugbã, do acɔ ku nɛ sisima, do acɔ ku nɛ booda. Sɔndai iyafũ jiidai ì ya jɛ, do nyikɔ̃ do ikpoi olivi. Nɔ ì sĩa ntɔ ntɔ hee ì to i jɛ aboi ilaalu.

¹⁴ Nɔ iriɛ í bɔ si andunya fei na kusĩaɛu domi í jɛ dee dee, ì waa daana do bɛɛrɛ iyi ǹ naɛ. Amu Aɔ̃ Lafɛ̃ɛi ǹ fɔ bɛɛbɛ.

Zeruzalɛmu í ce sakara

¹⁵ Amma kusĩaɛi ì ya maa kaaba i maa ceò sakara, do na bɛɛrɛi iriɛ. Ì na araɛi si sakarau, ì ya maa sũ do inɛ baa yooma iyi wa lɔ fei.

¹⁶ Ì so jĩnɛ jiidaɛ ŋa ì koo ì ceò boodai ilei iwɛ̃ɛ ŋa ì bɛi ì waa ceò si sakaraɛ. Mii iyi ì ceu bɛ, a kù yɛ dimiɛ nɔ kaa ce má ajɔ kãma.

¹⁷ Ì so jĩnɛi wura do isɔ fũfũ ŋa iyi ǹ naɛu ì ceò iwɛ̃ akɔ ŋa nɔ ì ya maa ce sakara do ŋa.

¹⁸ Jĩnɛ ku nɛ boodaɛ ŋaui ì koo ì biiò iwɛ̃ɛ ŋau. Nɔ ì so ikpom do tuae ku dɔ̃ inunum nɔu ì koo ì na ŋa.

¹⁹ Ǹ naɛ pɛ̃ɛm do iyafũ jiida, do ikpoi olivi do nyikɔ̃ í jɛ sɔndaɛ. Amma ì so fei ndɛɛ ì koo ceaò iwɛ̃ɛ ŋau kuwee iyi í nɛ inunu jiida. Bɛɛbɛi ì ce. Amu Aɔ̃ Lafɛ̃ɛi ǹ fɔ bɛɛbɛ.

²⁰ Ama inɛmɔkɔɛ ŋa do ama inaaboɛ ŋa iyi ì bíim ŋaui ì so ì ceaò iwɛ̃ɛ ŋa kuwee í jɛ sɔnda nŋa. Sakara iyi ì waa ceu kù toɛ?

²¹ Amam ŋai ì sakaa iwɛ̃ɛ ŋau nɔ ì jo ŋa na iri nŋa.

²² Si inɔi laalɔ ku ceɛ ŋa do sakara ku ceɛ ŋau fei, i kù ye gigii waatii mudɛ̃ɛu. I kù ye gigii waati iyi ì wɛɛ basĩ popoopo, nɔ ì waa bimbili si njɛɛu.

²³ Inɔ kufɔi á jɛ titɛɛ si anyii laalɔ ŋa iyi ì ceu fei. Amu Aɔ̃ Lafɛ̃ɛi ǹ fɔ bɛɛbɛ.

²⁴ Ì maa araɛ inya kugboka ŋa si bantuma ŋa bii fei.

²⁵ Si kpãa koko fei ì maa araɛ inya kugboka gɔ ŋa. Kusĩaɛi ì bɛɛgɛ si ì naò araɛ si laalɔ ŋa ku ce, nɔ inɛ iyi wa lɔ fei ì ya naa araɛi, nɔ sakaraɛu í ba gbugbã wa koo.

²⁶ Ì ce sakara do inɛi Ezibiti ŋa iyi à jɛ inɛi kɔkɔɛ ŋa nɔ à nɛ ara kusĩau. Ì dede idɔɔkɔ̃m na sakara nkpɔ nkpɔ ku ceɛ ŋau.

²⁷ Ǹ nyisiɛ gbugbãm, ǹ kaye tubuɛ, ǹ soɛ ǹ daa mbɛɛɛ ŋa si awɔ. Inɛi ilui Filisi ŋai à jɛ mbɛɛɛ ŋau nɔ à biti na daa laalɔɛ ŋa.

²⁸ Amma kɔdɛɛɛ kù sũ, ì koo ì ce sakara do inɛi Asiri ŋa. Do nŋu fei kù toɛ.

²⁹ Ì koo ì ce sakara nkpɔ nkpɔ do woo nya sĩai ilɛi Kaladee ŋa. Do nŋu fei, kɔdɛɛɛ kù sũ.

³⁰ Amu Aɔ̃ Lafɛ̃ɛ ǹ ni, lasabu laalɔɛ iyi ì nɛi í jɔ̀ ì ce mii ŋau bɛ fei. Icu ku taɛ iyi í caai í jɔ̀ ì ce mii ŋau bɛ.

³¹ Ì maa araɛ inya kugboka ŋa si kpãa koko ŋa do si bantuma ŋa bii fei. Amma i kù ce baa bɛi inaabo à ta icu, i ci ya bee fia.

³² Ì cei bɛi inaabo à ce sakara iyi í ya gba isɛ mmu ŋa si agbɛi mɔkɔɛ.

³³ Inaabo à ta icu ŋa fei à ya sã nŋa fiai. Amma awɔ ì ya cea mɔkɔ kaafeɛ ŋa amuai ku ba ì fa ŋa si sakaraɛu hai do bii fei.

³⁴ Si sakara ku ceɛu, iyi abo à ta icu ŋa a ci ya ce nŋui ì ce bɛ. A ci ya dɛdɛɛ nɔ a ci ya sãɛ fia, amma awɔi ì ya sãa ngu ŋa. Do yaase bɛɛbɛ, iyi a ci ya cei ì ce.

³⁵ Na nŋu, awɔ abo à ta icu, gbɔ idei Aɔ̃ Lafɛ̃ɛ.

³⁶ Aɔ̃ Lafɛ̃ɛ í ni, ì fangaa amaniɛ ŋa, ì nyisi basĩi araɛ si sakara ku ceɛ do mɔkɔ kaafe ŋa do iwɛ̃ ŋa. Ì ce laalɔ nla nla, ì dikãa iwɛ̃ɛ ŋa njɛi amaɛ ŋa.

³⁷ Na nŋu, an tɔtɔɔ mɔkɔ kaafeɛ ŋau wa aŋa iyi ì nɛ si inɔ didɔ̃ nɔ ì bi ŋau, hee do iyi ì cé ŋau fei. An tɔtɔɔ aŋa fei wai hai bii fei a naa bi tɛɛ n nyisi ŋa basĩɛ nɔ aŋa fei a yɛ basĩɛu.

³⁸ An kpãɛ ijui bɛi à ya kpã inaabo à ce sakara ŋa do woo kpa inɛ ŋa iju. Si idɔɔkɔ̃m do si igu ku jam, an biiɛ do njɛ.

³⁹ An soɛi n daa mɔkɔ kaafeɛ ŋau si awɔ. Aa lɛgɛ inya kugboka ŋa iyi ì maui. Aa bɔ jĩnɛ ŋa iyi ì waa dasiui. Aa ko booda kusĩaɛ ŋaui, nɔ aa jɔ̀ɛi basĩ popoopo.

⁴⁰ Aa tɔtɔɔi a dede siɛ wa. Aa taɛ kutai, nɔ aa gũɛi do taakuba.

⁴¹ Aa dasi kpasɛ̃ɛ ŋa inai nɔ aa kiitiɛ a yɛ taaleɛ si wajui inaabo nkpɔ nkpɔ. An leekĩ sakara ku ceɛu, nɔ bɛbɛi i kaa sãa mɔkɔ kaafe kãma fia má.

⁴² An jɔ̀ idɔɔkɔ̃m ku ce siɛ icɛi hee kɔɔ. Si anyiɛ idɔɔkɔ̃m nɔu á sũi nɔ n kaa n ce igu do awɔ má.

⁴³ Zeruzalɛmu, si na iyi í jɔ̀ i kù ye gigii mii iyi ǹ ceɛ waatii mudɛ̃ɛɛ, í gbe ì dedeò ide ku kɔ̀, mii iyi amu mɔ an ceɛ wee. An jɔ̀ isɛɛnɛ laalɔɛu ku cuku si iriɛi. Amu Aɔ̃ Lafɛ̃ɛi ǹ fɔ bɛɛbɛ. Mà i kù ce laalɔ ŋa si antaii iwɛ̃ ku tɔɔɛu bɛi.

Zeruzalɛmu í ce laalɔ í re ilu mmu ŋa

⁴⁴ Inɛ ŋa aa kpa mɔnda si gãmɛɛ a maa ni, bɛi iye í yɛ, bɛɛbɛi ama inaaboɛ í ya yɛ.

⁴⁵ Awɔ ama inaaboi iyeɛ iyi í cé mɔkɔɛ do amaɛ ŋai. Ì yɛi bɛi igbãɛ do ifɔɛ iyi à cé mɔkɔ nŋa ŋa do ama nŋa ŋa. Iye nŋɛ inɛi Hɛtii, nɔ baa nŋɛ mɔ inɛi Amɔrei.

⁴⁶ Igbãɛ iyi í wa ikpa awɔ cangaɛ, Samarii do ama inaaboɛ ŋai, nɔ ifɔɛ iyi í wa ikpa awɔ njɛɛ, Sodomu do ama inaaboɛ ŋai.

⁴⁷ I kù too si kuce nŋa do daa laalɔ nŋa nŋu akã. Laalɔ iyi ì ce si isɛɛnɛɛ í re tu ŋa.

⁴⁸ Amu Aɔ̃ Lafɛ̃ɛ, ǹ wa n fɔi do kugbasi iyi Sodomu ifɔɛ do ama inaaboɛ ŋa a kù ce mii iyi ì ce awɔ do ama inaaboɛ ŋa.

⁴⁹ Kurara ŋa iyi Sodomu ifɔɛ í nɛ wee. Í nɛ faau, í nɛ sɔnda wa kɔ̃aa, nɔ baa do iyi í nɛ laakai ku sũ, nŋu do ama inaaboɛ ŋa a ci ya sobi hai nɛ gbugbã ŋa do ilu are.

⁵⁰ À baa à jɛ ilu faau ŋa nɔ à ce laalɔ nla nla si wajum. Waati iyi ǹ yɛ mii iyi à ceu ŋɔi ǹ kpa ŋa.

⁵¹ Samari kù ce baa bubui dulum dɛɛ, laalɔɛ ŋa iyi ì ce à kpɔ à re titɛɛ. Bii à cɔ laalɔ ŋa iyi Sodomu ifɔɛ do Samari igbãɛ à ce, a kù jɛ ilu taale ŋa do iyi ì ce.

⁵² Awɔ iyi ì ya maa yɛ taalei igbãɛ do ifɔɛ, yɔkɔ temua si anyɔ iyi ì wa si na dulum dɛɛ ŋau. Ntɔ ntɔ, laalɔ ku ceɛ ŋa í re ti igbãɛ do ti ifɔɛ. Iyi bɛi í jɔ̀ ngu ŋa a kù nɛ taale bɛi awɔ. Anyɔ do bitii í jɛ titɛɛ si na iyi í jɔ̀ bii à cɔ laalɔ ŋa iyi ì ce, í yɛi bɛi ngu ŋa a kù jɛ ilu taale ŋa.

⁵³ An jɔ̀ kuwɛɛi Sodomu do ama inaaboɛ ŋa do ti Samari do ama inaaboɛ ŋa ku baa si agbɛɛ. Nɔ an jɔ̀ kuwɛɛi awɔ mɔ ku baa si agbɛɛi.

⁵⁴ Do yaase bɛɛbɛ awɔi aa wa si anyɔ do biti na mii ŋa iyi ì ce fei. Nɔ iyi bɛi á tũ inɔi igbãɛ do ifɔɛ.

⁵⁵ Sodomu ifɔɛ do Samari igbãɛ do ama inaabo nŋa ŋa aa baai si kuwɛɛi tako nŋa má. Nɔ awɔ mɔ Zeruzalɛmu do ama inaaboɛ ŋa, aa baa si kuwɛɛi tako nŋɛ má.

⁵⁶ Ì ya maa fɔ laalɔi Sodomui waati iyi ì ya maa so araɛ leleu.

⁵⁷ Waati bɛɛbɛ, laalɔ ku ceɛ ŋau kù fita gbugbãa. Nsɛi bɛbɛi, awɔi inɛi ilui Edɔmu ŋa do ilu ŋa iyi à wa kɔkɔ nŋa ŋau aa maa yaako. Nɔ inɛi ilui Filisi ŋa aa maa buɛi bii fei a maa yaakoɛò.

⁵⁸ Awɔi aa so asoi daai anyɔ do daa sãmiɛ ŋa iyi ì ceu. Amu Aɔ̃ Lafɛ̃ɛi ǹ fɔ bɛɛbɛ.

⁵⁹ Amu Aɔ̃ Lafɛ̃ɛ ǹ ni, kugbasi iyi ì ceu i kù ceò icɛ. Ì fũ akabuu iyi í wa si gãmɛi awaɛi. Na nŋu, mii iyi ì ce, an sãaɛi.

⁶⁰ Amma amu ǹ wa n ye gigii akabuu iyi ǹ dĩ do awɔ hai mudɛ̃ɛɛ nɔ an kpaasiɛi ku jɛ akabuu iyi á maa wɛɛ do ajɔ fei.

⁶¹ Aa ye gigii isɛɛnɛɛ nɔ anyɔ á muɛ waati iyi igbãɛ do ifɔɛ aa naa bi tɛɛ. Si awɔɛi aa wa bɛi ama inaaboɛ ŋa, amma kaa jɛ na akabuu iyi awaɛ à dĩ.

⁶² An teese n dĩ akabuu do awɔ, nɔ aa mà iyi amui ǹ jɛ Aɔ̃ Lafɛ̃ɛ.

⁶³ Aa ye gigii mii iyi ì ce wo nɔ anyɔ á muɛ. I kaa yɔkɔ i fɔ ide na anyɔu waati iyi an ceɛ suurui mii iyi ì ceu. Amu Aɔ̃ Lafɛ̃ɛi ǹ fɔ bɛɛbɛ.