Ezekiɛli 15 - Bibeli do fee

À dasi jĩi ndii rezɛ̃ɛu ina

¹ Aɔ̃ Lafɛ̃ɛ í bam ide ku fɔ má í ni,

² awɔ amanɛ, ì waa tamaa iyi jĩi ndii rezɛ̃ɛu í nɛ bɛɛrɛ í re jĩi mmu ŋa iyi à wa inɔ agbo fei? Amaawɔɛ ŋa à nɛ bɛɛrɛ à re amaawɔi jĩi mmu ŋa iyi à gbei?

³ Aa yɔkɔ a soo a ceò icɛ gɔ? Aa yɔkɔ a ceò bi ku kɔa jĩnɛ gɔ?

⁴ Aawo, inai à ya kòo, inau í ya jo imɔu do icuui do aniniu fei. To, icɛ yoomai aa yɔkɔ a ceò má.

⁵ Bii í wɛɛ bũmdũm a ci ya ceò icɛ kãma, aa fɔ idei bii ina í joo? Waati bɛɛbɛ, a kaa yɔkɔ a ceò nkãma má.

⁶ Na nŋu, Aɔ̃ Lafɛ̃ɛ í ni, bɛi à ya jo jĩi ndii rezɛ̃ɛ, bɛɛbɛi an jo inɛi ilui Zeruzalɛmu ŋa.

⁷ An kpã ŋa iju. Aa tamaa bɛi aŋa à fita si inaui, amma inau á jo ŋai fei. Waati bɛɛbɛ, aa mà ŋa iyi amui ǹ jɛ Aɔ̃ Lafɛ̃ɛ waati iyi an kpã ŋa ijuu.

⁸ An jɔ̀ ilɛu ku kpɔò gbaa si na iyi í jɔ̀ si mii iyi kù jɛ dee deei à na ara nŋa si. Amu Aɔ̃ Lafɛ̃ɛi ǹ fɔ bɛɛbɛ.