Ezekiɛli 14 - Bibeli do fee

Izirɛli í nɛ ku fũsi iwɛ̃ ŋa awɔi

¹ Ajɔ nŋu gɔ, inɛ ngboi Izirɛli gɔ ŋa à naa à buba si wajum ku ba a ce kubee.

² Ŋɔi Aɔ̃ Lafɛ̃ɛ í sɔ̃m í ni,

³ awɔ amanɛ, inɛ ŋau bɛ lasabu nŋa fei si iwɛ̃ nŋa ŋai í wa. A ci ya fa iju nŋa hai si mii iyi á jɔ̀ a dasi dulum. À waa tamaa bɛi an jɛsi n jɔ̀ a ce kubeeui?

⁴ Sɔ̃ ŋa iyi amu Aɔ̃ Lafɛ̃ɛ ǹ ni, bii inɛi Izirɛli gɔ í na araɛ si iwɛ̃ ŋa ku tɔɔ hee ci ya fa ijuɛ si mii iyi á jɔ̀ ku dasi dulum, bii í bɔ ku ce kubee bi walii, amu Aɔ̃ Lafɛ̃ɛi an jɛa si bɛi jiai kukpɔi iwɛ̃ ŋa iyi wa tɔɔu í to.

⁵ Ide iyi an jɛa inɛi Izirɛli ŋau á fɔtɔtɔi lasabu nŋa aŋa iyi à jĩim na kubii iwɛ̃ nŋa ŋau.

⁶ Na nŋu, sɔ̃ inɛi Izirɛli ŋa i ni amu Aɔ̃ Lafɛ̃ɛ ǹ ni a kpaasi idɔ nɔ a jɔ̀ iwɛ̃ ŋa ku tɔɔ do laalɔ ku ce nŋa ŋau.

⁷ Ntɔ ntɔ, bii inɛi Izirɛli gɔ walakɔ inɛ njoo gɔ iyi í wa si ilɛi Izirɛli í fũsim awɔ, nɔ í na araɛ si iwɛ̃ ŋa ku tɔɔ nɔ ijuɛ wa kãsi mii iyi á jɔ̀ ku dasi dulum, bii í bɔ ku ce kubee bi walii gɔ ku ba ku mà idɔɔbii amu Aɔ̃ Lafɛ̃ɛ, amu takam nii an jɛaa.

⁸ An kpã lafɛ̃ɛ ijui, nɔ ku jɛ nyinda gɔ iyi inɛ ŋa aa ya so a kpaò mɔnda. An nyaai hai si inɔi inɛm ŋa. Nɔ aa mà ŋa iyi amui ǹ jɛ Aɔ̃ Lafɛ̃ɛ.

⁹ Bii walii gɔ í jɔ̀ à lɛlɛɛ nɔ í jɛa inɛ gɔ ide gɔ, amu Aɔ̃ Lafɛ̃ɛi ǹ talesiɛ kunyɔu, an kpãa ijui nɔ n nyaa hai si inɔi inɛi Izirɛli inɛm ŋa.

¹⁰ Waliiu do inɛ iyi í naa kubee ku ceu, aŋa minji fei dulum nii à ce nɔ aa ba ijuukpãɛi.

¹¹ Do yaase bɛɛbɛ, inɛi Izirɛli ŋau a kaa nyɔ nɔ a kaa jĩim má. Nɔ a kaa dasi ara nŋa riisi má na dulum nkpɔ nkpɔ nŋa ŋau. Amma aa jɛ inɛm ŋa nɔ n jɛ Aɔ̃ Lafɛ̃ɛ nŋa. Amu Aɔ̃ Lafɛ̃ɛi ǹ fɔ bɛɛbɛ.

Nkãma kaa gɛɛ kiitii Ilaaɔ̃

¹² Aɔ̃ Lafɛ̃ɛ í bam ide ku fɔ má í ni,

¹³ awɔ amanɛ, bii inɛi ilɛ gɔ ŋa à ce dulum à ce mii iyi kù jɛ dee dee si gãmɛm, an nyisi ŋa gbugbãm. An jɔ̀ sɔnda kaa wɛɛ nŋa. Arii an jɔ̀ ku naa si ŋa, nɔ n jɔ̀ a ku aŋa do mɛɛmu nŋa ŋa fei.

¹⁴ Baa bii í jɛ inɛ mɛɛta gɔ ŋa à wa si ilɛu iyi kuwɛɛ nŋa í yɛ bɛi ti Nowee do Daniɛli do Zɔɔbu, a kaa yɔkɔ na dee dee ku jɛ nŋa a faaba inɛi ilɛ ŋau. Amu Aɔ̃ Lafɛ̃ɛi ǹ fɔ bɛɛbɛ.

¹⁵ Bii ǹ jɔ̀ mɛɛmu kugaabu ŋa à naa si ilɛu a kpa inɛi ilɛ ŋau fei, ilɛu á gbe ngbɛ nɔ á kpɔò gbaa nɔ inɛ kãma kaa ya too do bɛ má na mɛɛmu kugaabu ŋau.

¹⁶ Amu Aɔ̃ Lafɛ̃ɛ, ǹ wa n fɔɔi do kugbasi iyi baa bii í jɛ amanɛ mɛɛta ŋau bɛ à wa si ilɛu, inɛi ilɛ ŋau a kaa ba faaba. Inɛ mɛɛta ŋau aŋa akãi aa ba faaba, nɔ a kaa yɔkɔ a faaba baa amai aŋa taka nŋa. Nɔ ilɛu á kpɔò bommai.

¹⁷ Bii ǹ jɔ̀ à naa si ŋa igũ, nɔ ǹ jɔ̀ à kpa amanɛ ŋa hee do mɛɛmu ŋa fei si ilɛu,

¹⁸ baa bii í jɛ inɛ mɛɛta ŋa iyi à waa fãa ŋau bɛ à wa si ilɛu, ǹ wa n fɔi do kugbasi iyi a kaa yɔkɔ a faaba baa ama nŋa. Aŋa akãi aa ba faaba.

¹⁹ Bii ǹ jɔ̀ patapoo í naa si ilɛu nɔ ǹ jɔ̀ í ce nfei amanɛ ŋa do mɛɛmu ŋa n nyisiò idɔɔkɔ̃m,

²⁰ baa bii í jɛ inɛ mɛɛta gɔ ŋa à wa bɛ iyi kuwɛɛ nŋa í yɛ bɛi ti Nowee do Daniɛli do Zɔɔbu, ǹ wa n fɔi do kugbasi iyi a kaa yɔkɔ a faaba baa ama nŋa ŋa na dee dee ku jɛ nŋau. Aŋa akã nŋai aa ba faaba.

²¹ Si anyiɛ Aɔ̃ Lafɛ̃ɛ í ni, wahala nla nla mɛɛi ǹ jɔ̀ í naa si Zeruzalɛmu. Wahala ŋau wee. Igũ do ari do mɛɛmu kugaabu ŋa do patapoo ku ba n ce nfei hai amanɛ ŋa hee do mɛɛmu ŋa fei.

²² Do nŋu fei, inɛmɔkɔ do inaabo gɔ ŋa à ba a fita si. Inɛ ŋau aa na a ba ŋɛ ilɛ mmu bɛ. Waati nŋu, bii ì yɛ isɛɛnɛ nŋa do kookoosu nŋa ŋa, aa kpaasi lasabu ŋa na laalɔ nla nla iyi ǹ jɔ̀ í naa si Zeruzalɛmu.

²³ Aŋai aa tũ inɔ nŋɛ, waati iyi aa yɛ isɛɛnɛ nŋa do kookoosu nŋa ŋa nɔ aa mà ŋa iyi kù jɛ si ngbɛi ǹ ceò mii ŋau bɛ fei si iluu ŋa. Amu Aɔ̃ Lafɛ̃ɛi ǹ fɔ bɛɛbɛ.