Ezekiɛli 13 - Bibeli do fee

Idei ijuukpã si gãmɛi walii ilu ibo ŋa

¹ Aɔ̃ Lafɛ̃ɛ í bam ide ku fɔ í ni,

² awɔ amanɛ, koo i sɔ̃ inɛ ŋa iyi à waa jilɛ si aŋa à jɛ walii si ilɛi Izirɛli nɔ à waa ce walii do lasabui idɔ nŋa, a de itĩ a gbɔ idem ŋa.

³ Sɔ̃ ŋa iyi amu Aɔ̃ Lafɛ̃ɛ ǹ ni, laalɔi á ba aŋa walii hai nɛ yaase ŋau. Aŋa iyi lasabui idɔ nŋai à ya maa ceò icɛ, a ci ya yɛ nkãma.

⁴ Waliii Izirɛli ŋau, à yɛi bɛi akã ŋa iyi à wa si inya kumbulu ŋa.

⁵ Inɛ ŋau a kù koo a kù dĩ iwoi bindi ŋau, a kù nɔ a kù ma bindii Izirɛliu má iyi á jɛ bii aa ba a manji si ajɔ iyi idɔɔkɔ̃i amu Aɔ̃ Lafɛ̃ɛ á naa si ŋau.

⁶ Kuyɛ ŋa iyi à ya maa ceu, lasabui idɔ nŋai nɔ ide nŋa fei iboi. À ya maa ni amu Aɔ̃ Lafɛ̃ɛi ǹ ba aŋa ide ku fɔ wa. Wee kù jɛ amui ǹ bɛ ŋa. Do nŋu fei, à waa cɔ kpãai n jɔ̀ ide nŋa ŋau ku ce.

⁷ Kuyɛ nŋa iyi à waa ce fei lasabui aŋa taka nŋai. Ǹ wa n sɔ̃ ŋa ǹ ni, ide nŋɛ ŋau iboi, nɔ ì waa ni ŋa, idei Aɔ̃ Lafɛ̃ɛi. Wee n kù ba ŋɛ ide ku fɔ mɔm.

⁸ Na nŋu, amu Aɔ̃ Lafɛ̃ɛ ǹ sɔ̃ ŋa ǹ ni, si na iyi í jɔ̀ ì waa fɔ ide ŋa iyi a kù jɛ ntɔ nɔ ì waa ce kuyɛ ibo ŋa, iyi bɛi í jɔ̀ amu Aɔ̃ Lafɛ̃ɛ an kpã ŋɛ iju.

⁹ Amu Aɔ̃ Lafɛ̃ɛ, an nyisi gbugbãm si gãmɛi walii ŋa iyi à waa fɔ ide ŋa iyi a kù jɛ ntɔ nɔ à waa ce kuyɛ ibo ŋau. A kaa ba inya tengi bii inɛm ŋa à ya tɔtɔɔu. A kaa kɔ iri nŋa si tuubai inɛi Izirɛli ŋa. A kaa baa ilɛi Izirɛli má. Nɔ aa mà ŋa iyi amui ǹ jɛ Aɔ̃ Lafɛ̃ɛ.

¹⁰ Walii ŋau à ya maa sɔa inɛm ŋa iboi à maa ni mii fei wa nɛ dee dee baa bii nkãma kù waa nɛ dee dee. Inɛm ŋa à waa ma idĩ nɔ walii ŋau à waa jɔsi ila fũfũ.

¹¹ Sɔ̃ woo jɔsi ila fũfũ ŋau iyi idĩu á cuku. Ijĩ nla gɔ á wɔ do kuta wa nɔ fufu nla gɔ á ce ku fangaa mii fei.

¹² Waati iyi idĩu á cuku, inɛ ŋa aa bee ŋɛ a ni, ila fũfũ iyi ì jɔsiu ŋa, icɛ yoomai í ce.

¹³ Na nŋu, iyi ǹ wa n fɔ wee amu Aɔ̃ Lafɛ̃ɛ, gbugbãm á naa bɛi fufu nla, idɔɔkɔ̃m á naai bɛi ijĩ nla iyi wa wɔ do kuta. Si idɔɔkɔ̃m, an kpa irii mii feii.

¹⁴ An kɛkɛ idĩ iyi ì jɔsi ila fũfũu ŋai hee ilɛ nɔ icuɛ ŋau a fita gbugbãa. Nɔ si inɔɛ bɛi aa mile ŋa. Do yaase bɛɛbɛ, aa mà ŋa iyi amui ǹ jɛ Aɔ̃ Lafɛ̃ɛ.

¹⁵ An nyisi gbugbãm nii n bɔò hee kɔɔ si gãmɛi idĩu do si gãmɛi inɛ ŋa iyi à jɔsi ila fũfũu. An sɔ̃ ŋa iyi idĩu kaa gbe, nɔ inɛ gɔ mɔ kaa gbe si inɔi inɛ ŋa iyi à jɔɔa si ila fũfũ.

¹⁶ Walii ŋa iyi à ya maa ce walii ibo si gãmɛi ilui Zeruzalɛmu a maa ni mii fei wa nɛ dee dee baa bii nkãma kù waa nɛ dee deeu a kaa wɛɛ má. Amu Aɔ̃ Lafɛ̃ɛi ǹ fɔ bɛɛbɛ.

Ijuukpã si gãmɛi walii inaabo ilu ibo ŋa

¹⁷ Awɔ amanɛ, koo ba inaaboi Izirɛli ŋa iyi à waa ce walii do lasabui idɔ nŋau ide ku fɔ i sɔ̃ ŋa laalɔ iyi à waa ce.

¹⁸ Sɔ̃ ŋa iyi amu Aɔ̃ Lafɛ̃ɛ ǹ ni, inɔ kufɔi á jɛ tu ŋɛ, iŋɛ iyi ì ya maa cea hai ama keeke do inɛ ngbo ŋa fei ikũi ikɔ̃i awɔ ŋa do mango ŋa iyi à ya maa we si iri nŋa ku ba i nɛ si kuwɛɛ nŋa gbugbã ŋa. Ì ya bi i kpa irii kuwɛɛi inɛm ŋaui nɔ i bii anyii ti iŋɛ taka nŋɛ.

¹⁹ Ì waa bɛjɛ irim ŋai si wajui inɛm ŋa na sɔnda keeke. Ì ya maa sɔa inɛm ŋau ibo ŋai nɔ à ya dasi ŋɛ naanɛ. Ì ya kpa inɛ ŋa iyi i kù nɛ i kpa ŋai nɔ i jɔ̀ inɛ ŋa iyi i kù nɛ i jɔ̀ a wɛɛ ŋa.

²⁰ Na ŋɔi í ce amu Aɔ̃ Lafɛ̃ɛ ǹ ni, an da ikũi ikɔ̃i awɔ ŋa iyi í ya jɔ̀ i nɛ gbugbã si kuwɛɛi inɛ ŋau. An da ikũ ŋaui n nya ŋa nɔ n faaba inɛ ŋa iyi ì mu ŋau hai si awɔ nŋɛ.

²¹ An ga mango ŋau mɔi nɔ n faaba inɛm ŋa hai si awɔ nŋɛ. A kaa dasi cɛkũm du ŋɛ ŋa má. Do yaase bɛɛbɛ, aa mà ŋa iyi amui ǹ jɛ Aɔ̃ Lafɛ̃ɛ.

²² Do ibo nŋɛ ŋaui ì jɔ̀ inɛ dee dee ŋa à dasi inɔ kufɔ. Nɔ inɛ ŋau amu n kù bi inɔ kufɔ nŋa. Ì muaa ilu inɔ kukã ŋa gbugbã ŋa ì jɔ̀ à waa mɔsi do laalɔ ku ce nŋa ŋa. Do yaase bɛɛbɛ, aa jɔ̀ kuwɛɛ nŋa ku dasi nfe ku ce ŋai.

²³ Na nŋu, fei ndɛɛ í tã mbɛ. I kaa ce kuyɛ ibo kãma má ŋa nɔ i kaa na ara nŋɛ si alisi ku ce má. An faaba inɛm ŋai hai si awɔ nŋɛ nɔ aa mà ŋa iyi amui ǹ jɛ Aɔ̃ Lafɛ̃ɛ.