Ezekiɛli 12 - Bibeli do fee

Ezekiɛli wa fɔ iyi aa na a mu inɛi Zeruzalɛmu ŋa aru má

¹ Aɔ̃ Lafɛ̃ɛ í ba amu Ezekiɛli ide ku fɔ í ni,

² awɔ amanɛ, jɔ̀ i mà iyi ì wai si inɔi woo kɔ̀ ide ŋa. Inɛ ŋau à nɛ iju nɔ a kù bi a yɛò ilu, à nɛ itĩ nɔ a kù bi a gbɔò ide. Ntɔ ntɔ woo kɔ̀ ide ŋai.

³ Na nŋu, ce sɔɔlu i fita dasã nkpa hai bii ì wau si wajui aŋa fei i nɛ inya mmu. Á yɔkɔ ku jɛ aa mà iyi aŋa à jɛ woo kɔ̀ ide ŋa.

⁴ Fitaò jĩnɛɛ ŋa wa hai dasã nkpa si waju nŋa. Alɛ nɔ i fita i nɛ si waju nŋa bɛi inɛ iyi à waa tilasiɛ ku fita.

⁵ Lu bindiu i fitaò jĩnɛɛ ŋa hai bɛ si waju nŋa.

⁶ Aa so jĩnɛɛ ŋau si kɔngɔ si waju nŋa i fitaò si ilu kuku. Aa bii wajuɛi i maà cɔ ilɛu. Ntɔ ntɔ, awɔi ǹ bi i jɛ nyinda gɔ iyi an faò laakaii inɛi Izirɛli ŋau wa.

⁷ Ŋɔi ǹ ce bɛi Aɔ̃ Lafɛ̃ɛ í sɔ̃m nɔu. Ǹ fitaò jĩnɛm ŋa wa dasã nkpa bɛi inɛ iyi à mu aru à waa nɛò. Iyi alɛ í lɛ, ǹ lu bindiu do awɔ nɔ idũu ǹ fitaò jĩnɛm ŋa nɔ ǹ soo si kɔngɔ si ijui aŋa fei.

⁸ Iyi iju í má daakɔ, Aɔ̃ Lafɛ̃ɛ í bam ide ku fɔ í ni,

⁹ awɔ amanɛ, inɛi Izirɛli woo kɔ̀ ide ŋau à beeɛ à ni, mii ì waa ce bɛ.

¹⁰ Jɛ nŋa i ni amu Aɔ̃ Lafɛ̃ɛ ǹ ni, ideu ihɛ̃, inɛ ngbo iyi í wa Zeruzalɛmu do inɛi Izirɛli ŋa iyi à wa bɛ feii í kã.

¹¹ Sɔ̃ ŋa iyi mii iyi ì ceò bɛ, nyinda gɔi iyi wa nyisi iyi aa mu ŋa aru a nɛò ŋa.

¹² Inɛ ngbo iyi wa mu ilɛu, á so jĩnɛɛ ŋai si kɔngɔ si ilu kuku ku fita. Aa lu bindiui nɔ do hai bɛi á fitaò. Á bii wajuɛi ku ba ku maà cɔ ilɛu.

¹³ Amu Aɔ̃ Lafɛ̃ɛ, an lea cɛkũm nii nɔ koo dasi. An bɔòɛ Babilɔnii si ilɛi inɛi Kaladee ŋa. Amma kaa yɛ ilɛu, nɔ bɛi á ku.

¹⁴ Inɛ ŋa iyi à waa kaakoɛ ŋa, do woo degbeɛ ŋa do soogeɛ ŋa fei, an fangaa ŋai bii fei nɔ n maa n lele ŋa do taakuba.

¹⁵ Aa mà iyi amui ǹ jɛ Aɔ̃ Lafɛ̃ɛ waati iyi an jɔ̀ a fangaa si inɔi dimi mmu ŋa do si ilɛ mmu ŋa.

¹⁶ Amma si inɔ nŋa an jɔ̀ inɛ gɔ ŋa a fita si igũu do si ariu do si patapoou, ku ba a jɛa inɛi ilɛ ŋa bii aa koo a waò sɛɛdai mii laalɔ ŋa iyi aŋa à ce. Nɔ do yaase bɛɛbɛ, aŋa mɔ aa mà iyi amui ǹ jɛ Aɔ̃ Lafɛ̃ɛ.

¹⁷ Aɔ̃ Lafɛ̃ɛ í bam ide ku fɔ má í ni,

¹⁸ awɔ amanɛ, jɛ sɔndaɛ do kuyaya, mɔ inyiɛ do njo do zigiida nla nla.

¹⁹ Nɔ i sɔ̃ inɛi ilɛ ŋau i ni amu Aɔ̃ Lafɛ̃ɛ ǹ wa n fɔ ide si gãmɛi inɛi Zeruzalɛmu ŋa iyi à gbe si ilɛi Zudaau ǹ ni aa jɛ sɔnda nŋa do zigiida nɔ a mɔ inyi nŋa do njo nla nla. Aa lɛgɛ ilɛ nŋaui nɔ a ko mii iyi í wa bɛ fei na gbugbã ku taa njɛ iyi inɛ ŋa à waa cea njɛu.

²⁰ Ilu ŋau do ilɛu fei aa kpɔò bommai. Do yaase bɛɛbɛ, aa mà ŋa iyi amui ǹ jɛ Aɔ̃ Lafɛ̃ɛ.

Idei Aɔ̃ Lafɛ̃ɛ á kɔ̃i

²¹ Aɔ̃ Lafɛ̃ɛ í bam ide ku fɔ má í ni,

²² awɔ amanɛ, na mii í ce inɛi Izirɛli ŋa à ya maa fɔ ide do mɔnda a maa ni, ajɔ ŋa wa lɔ nɔ kuyɛ kãma kù waa kɔ̃.

²³ Na nŋu, sɔ̃ inɛi Izirɛli ŋau i ni amu Aɔ̃ Lafɛ̃ɛ ǹ ni an leekĩ mɔndau. Inɛ gɔ kaa fɔɔ má si ilɛi Izirɛli. Sɔ̃ ŋa bɛbɛi iyi kaa kpɛ má kuyɛ ŋau fei a kɔ̃.

²⁴ Kuyɛ ibo do idei zamba kãma kaa wɛɛ má bi inɛi Izirɛli ŋau.

²⁵ Amu Aɔ̃ Lafɛ̃ɛi ǹ wa n fɔ ide nɔ ide iyi ǹ fɔ á cei kaa kpɛ. Ntɔ ntɔ, iŋɛ woo kɔ̀ ide ŋau, si waati nŋɛi idei ijuukpã ŋa iyi ǹ fɔ ideɛu á ce.

²⁶ Aɔ̃ Lafɛ̃ɛ í bam ide ku fɔ má í ni,

²⁷ awɔ amanɛ, inɛi Izirɛli ŋa à waa ni, kuyɛ ŋa iyi ì waa fɔ ideɛu, kaa ce nsɛi. Á kpɛi ku bɛi ku ce.

²⁸ Na nŋu, sɔ̃ ŋa iyi amu Aɔ̃ Lafɛ̃ɛ ǹ ni, idei ijuukpã ŋa iyi ǹ fɔ ideɛu fei á cei kaa kpɛ. Amu Aɔ̃ Lafɛ̃ɛi ǹ fɔ bɛɛbɛ.