Ezekiɛli 11 - Bibeli do fee

Ilaaɔ̃ á kiiti Zeruzalɛmu na kuraraɛ ŋa

¹ Ŋɔi hundei Ilaaɔ̃ í dedem hai ilɛ í bɔɔm anu koofai kpasɛ̃i Aɔ̃ Lafɛ̃ɛ iyi wa cɔ ikpa nunui daakɔu. Ŋɔi ǹ ba wee kɔkɔi anu koofai kpasɛ̃u, amanɛ kɔnfia do miiu gɔ ŋa à wa bɛ. Si inɔ nŋa ǹ yɛ Yaazania amai Azuu do Pelatia amai Benaya. Aŋai à jɛ inɛ ngbo ŋau.

² Nɔ hundeu í sɔ̃m í ni, amanɛ, inɛ ŋau bɛi à jɛ woo ce lasabu laalɔ ŋa do woo na inɛ ŋa ikɔ laalɔ si inɔ iluu.

³ À ya ni, kù jɛ nsɛii aa ma ile ŋa. Iluu í yɛi bɛi caka nɔ awa mɔi à jɛ bɛi iŋa si inɔɛ.

⁴ Awɔ amanɛ, koo i ba ŋa ide ku fɔ bɛi walii.

⁵ Ŋɔi hundei Aɔ̃ Lafɛ̃ɛ í naa sim í ni, koo ba inɛi Izirɛli ŋa ide ku fɔ i ni amu Aɔ̃ Lafɛ̃ɛ ǹ ni, ǹ mà ide ku fɔi iŋɛ inɛi Izirɛli ŋa nɔ ǹ mà lasabu nŋɛ.

⁶ Ì kpa inɛ ŋa nkpɔ nkpɔ si iluu ŋa nɔ iku ŋa à waa kɔ̃ si kpãa ŋa.

⁷ Na nŋu amu Aɔ̃ Lafɛ̃ɛ ǹ ni, inɛ ŋa iyi ì kpa si anini nŋɛ ŋaui à jɛ iŋa. Nɔ iluui í jɛ caka. Amma iŋɛ aa lele ŋɛi a fitaò ŋɛ.

⁸ Ì waa ce njoi igũ ŋa, an nɔ n jɔ̀ igũu ku naa si ŋɛ. Amu Aɔ̃ Lafɛ̃ɛi ǹ fɔ bɛɛbɛ.

⁹ An jɔ̀ i fita hai inɔ iluui ŋa. An jɔ̀ i koo i dasi awɔi inɛ njoo ŋa. Nɔ do yaase bɛɛbɛi an kiiti ŋɛ.

¹⁰ An kiiti ŋɛi si kɔɔi ilɛi Izirɛli nɔ n jɔ̀ a kpa ŋɛ si igũ. Do yaase bɛɛbɛi aa mà ŋa iyi amui ǹ jɛ Aɔ̃ Lafɛ̃ɛ.

¹¹ Iluu kaa jɛ nŋɛ bɛi caka nɔ i kaa jɛ bɛi iŋa iyi í wa si inɔɛ ŋa. Amma an kiiti ŋɛi si kɔɔi ilɛi Izirɛliu.

¹² Nɔ aa mà ŋa iyi amui ǹ jɛ Aɔ̃ Lafɛ̃ɛ iyi i kù jirima ideɛ ŋau nɔ i kù ceò woodaɛ ŋa icɛ ŋa. Amma ì ce isɛɛnɛ ŋai bɛi dimi mmu ŋa iyi à waa kaako ŋɛ ŋau.

¹³ Waati iyi amu Ezekiɛli ǹ wa n fɔ idei Aɔ̃ Lafɛ̃ɛu ŋɔi Pelatia amai Benayau í cuku í ku. Ŋɔi ǹ sɛɛbata ilɛ ǹ dɔ̃ anu ǹ ni, waiyooi Aɔ̃ Lafɛ̃ɛ, ì waa bi i kpa inɛi Izirɛli ŋa iyi à gbe ŋau fei?

Ilaaɔ̃ á tɔtɔɔ inɛi Izirɛli ŋa iyi à fangaa ŋau wa

¹⁴ Ŋɔi Aɔ̃ Lafɛ̃ɛ í bam ide ku fɔ í ni,

¹⁵ awɔ amanɛ, ide ŋa iyi ǹ wa n sɔ̃ɛ si gãmɛi inɛi ilɛɛ ŋa, inɛ ŋa iyi à jɛ nyaanzeɛ ŋa hee do inɛi Izirɛli ŋa iyi à mu aru à nɛò ilɛ mmu ŋau fei wee, aŋa iyi inɛi Zeruzalɛmu ŋa à sɔ̃ ŋa à ni, i jɔ̀ i jĩò Aɔ̃ Lafɛ̃ɛ ŋa, domi awai í muaa ilɛu ku jɛ tubu nwa.

¹⁶ Na nŋu koo sɔ̃ inɛɛ ŋa iyi à mu à nɛò ŋau i ni amu Aɔ̃ Lafɛ̃ɛ ǹ ni, ǹ jɔ̀ ì fangaa si ilɛ jĩijĩ si inɔi dimi mmu ŋa. Amma baa tengi bɛ ǹ wɛɛ do iŋɛ bɛi ǹ ya n wɛɛ do ŋɛ si inɔ kpasɛ̃m nɔu.

¹⁷ Na nŋu sɔ̃ ŋa i ni amu Aɔ̃ Lafɛ̃ɛ ǹ ni an tɔtɔɔ ŋa wai hai si inɔi dimi mmu ŋa si ilɛ ŋa bii à koo à wau, nɔ n na ŋa ilɛi Izirɛliu má.

¹⁸ Bii à baa, aa leekĩ iwɛ̃ ŋa ku tɔɔ do laalɔ ŋa iyi inɛi ilɛ ŋau à waa cei.

¹⁹ An jɔ̀ a nɛ lasabu akã, nɔ n mu nŋa idɔ titɔ̃. An nya idɔ nŋa iyi í le bɛi kuta, nɔ n da nŋa si idɔ iyi í yɛ bɛi ara baasĩ.

²⁰ Do yaase bɛɛbɛ, aa too si ikɔm ŋa nɔ aa ceò woodam ŋa icɛ. Aa jɛ inɛm ŋa nɔ amu mɔ an jɛ Ilaaɔ̃ Lafɛ̃ɛ nŋa.

²¹ Amma inɛ ŋa iyi à ya nɛ inɔ didɔ̃ si iwɛ̃ ŋa ku tɔɔ nɔ idɔ nŋa í bi laalɔ, an jɔ̀ kuce nŋa ku cuku si iri nŋai. Amu Aɔ̃ Lafɛ̃ɛi ǹ fɔ bɛɛbɛ.

Aɔ̃ Lafɛ̃ɛ í fũsi Zeruzalɛmu awɔ

²² Ŋɔi serubɛ̃ɛ ŋau à fũ ikpa nŋa ŋa nɔ aŋaò wuruu ŋau à waa nɛ ajɔ. Ŋɔi amboei Ilaaɔ̃ Lafɛ̃ɛi inɛi Izirɛli ŋau wa too ŋa lele bɛ.

²³ Amboei Aɔ̃ Lafɛ̃ɛu í dede hai inɔ iluu í koo leekĩ si iri kuta do ikpa nunui daakɔi iluu.

²⁴ Ŋɔi si kuyɛu hundeu í som í bɔɔm ikpa ilui Kaladee tengi bii inɛi Zudaa aru ŋau à wa. Nɔ waati bɛɛbɛ kuyɛu í leekĩ.

²⁵ Nɔ ǹ sɔ̃ aru ŋau ide iyi Aɔ̃ Lafɛ̃ɛ í sɔ̃m si kuyɛu fei.