Ezekiɛli 10 - Bibeli do fee

Aɔ̃ Lafɛ̃ɛ í naa si Ezekiɛli má

¹ Ŋɔi ǹ cɔ afe iyi í wa si antaii irii serubɛ̃ɛ ŋau, nɔ ǹ yɛ kuta gɔ í wa bɛ iyi à ya kpe safira. Kutau í jɔ kitãi bomma gɔ.

² Ŋɔi Ilaaɔ̃ í sɔ̃ inɛ iyi wa dasi jĩnɛi acɔ ku nɛ gbugbãu í ni ku lɔ si inɔi wuruu ŋa iyi à wa si abɛi serubɛ̃ɛ ŋau ku bu ina nyɛnyɛ si awɔɛ ŋa ku kɔ̃ koo fangaaɛ si iluu. Nɔ ǹ yɛ inɛɛu í nɛ.

³ Serubɛ̃ɛ ŋau à waa leekĩi do awɔ njɛi kpasɛ̃u waati iyi inɛɛu wa lɔ, nɔ kudũi ijĩ í bii bantumai kpasɛ̃u.

⁴ Ŋɔi amboei Aɔ̃ Lafɛ̃ɛ í dede hai si antaii serubɛ̃ɛ ŋau í nɛ do ikpa anu koofai kpasɛ̃u. Kudũi ijĩ í bii kpasɛ̃u, nɔ amboei Aɔ̃ Lafɛ̃ɛ í má inya si bantumai kpasɛ̃u ntɔ ntɔ.

⁵ À waa gbɔ ibai ikpai serubɛ̃ɛ ŋau wa hee do anyii bantumau. Ibau í yɛi bɛi imui Ilaaɔ̃ ilu gbugbã waati iyi wa fɔ ide.

⁶ Ŋɔi inɛ iyi wa dasi jĩnɛi acɔ ku nɛ gbugbãu í koo í leekĩ kɔkɔi wuruu akã. Í bɔ bɛ waati iyi Ilaaɔ̃ í naa wooda í ni koo bu ina wa hai si inɔi wuruuu si aninii serubɛ̃ɛ ŋau.

⁷ Serubɛ̃ɛ ŋau inɛ akã í yɔ awɔɛ ikpa bi inau si aninii aŋa serubɛ̃ɛ ŋau í bu inau í daa inɛɛu si awɔ í nɛò.

⁸ Si abɛi ikpai serubɛ̃ɛ ŋau, ngɔgɔ í fita wa bɛi awɔi amanɛ.

⁹ Ǹ cɔ, nɔ ǹ ba wee wuruu mɛɛi í wa kɔkɔi serubɛ̃ɛ ŋau. Wuruu akã fei í wa kɔkɔi serubɛ̃ɛ akã nɔ wa daana bɛi kuta gɔ iyi à ya kpe kisoliti.

¹⁰ Wuruu ŋau à jɔ njɛi nɔ à ya maa bibii si njɛ.

¹¹ Waati iyi à waa nɛ, à ya maa nɛi si cingaa mɛɛu amma a ci ya yaa. À ya maa nɛi do ikpa bii iri nŋa wa cɔu.

¹² Arai serubɛ̃ɛ ŋau do anyi nŋa do awɔ nŋa do ikpa nŋa ŋau à nɛ ijui bii fei, aŋa mɔ bɛi wuruu mɛɛ ŋaui à yɛ.

¹³ Ŋɔi ǹ gbɔ à waa kpe wuruu ŋau fufu dabii.

¹⁴ Inɛ akã nŋa fei waju mɛɛi í nɛ. Waju sinteu í jɔ ti serubɛ̃ɛ, minjisiau í jɔ ti amanɛ, mɛɛtasiau í jɔ ti muusu nla, mɛɛsiau í jɔ ti kungbã.

¹⁵ Serubɛ̃ɛ ŋau à waa nɛ ikpa lele. Mii ilu hunde ŋa iyi ǹ tako ǹ yɛ itĩi idoi Kebaaui.

¹⁶ Waati iyi serubɛ̃ɛ ŋau à waa nɛ, à ya maa nɛi do wuruu ŋau ajɔ. Bii serubɛ̃ɛ ŋau à wu ikpa nŋa lele wuruu ŋau à ya wa cingaa nŋa bɛi.

¹⁷ Waati iyi serubɛ̃ɛ ŋau à leekĩ, aŋa mɔ à ya leekĩi, bii à dede lele, aŋa mɔ à ya dedei, domi idɔɔbii mii ilu hunde ŋaui à waa too.

Amboei Aɔ̃ Lafɛ̃ɛ í sɛkɛɛ hai si kpasɛ̃u

¹⁸ Ŋɔi amboei Aɔ̃ Lafɛ̃ɛ í sɛkɛɛ hai andɛ koofau í koo í wa si antaii serubɛ̃ɛ ŋau.

¹⁹ Ǹ yɛ serubɛ̃ɛ ŋau à dede hai ilɛ à nɛ lele do wuruu ŋau ajɔ. À koo à leekĩ si andɛ koofai kpasɛ̃i Aɔ̃ Lafɛ̃ɛu do ikpa nunui daakɔ. Nɔ amboei Aɔ̃ Lafɛ̃ɛi inɛi Izirɛli ŋau mɔ í wa si antaii serubɛ̃ɛ ŋau.

²⁰ Si itĩi idoi Kebaau ǹ tako ǹ yɛ mii ilu hunde gɔ ŋa bɛ wo à waa leekĩ si abɛi Aɔ̃ Lafɛ̃ɛi inɛi Izirɛli ŋau, nɔ ǹ mà kãm kãm iyi serubɛ̃ɛ ŋai.

²¹ Inɛ akã nŋa fei í nɛ waju mɛɛ do ikpa mɛɛ. Si abɛi ikpa ŋau, à nɛ ngɔgɔ í jɔ awɔi amanɛ.

²² Waju nŋau dimi akãi do ti mii ilu hunde ŋa iyi ǹ yɛ itĩi idoi Kebaau. Aŋa fei à waa nɛi suusuu do ikpa waju nŋa.