Ezekiɛli 1 - Bibeli do fee

Aɔ̃ Lafɛ̃ɛ í nyisi Ezekiɛli araɛ

^1-2 Si adɔ̃ kuntaasia iyi ǹ nɛ si cukpa mɛɛsiaɛ si ajɔ miiusia, waati iyi à mu ilaalu Zoakɛ̃ɛ à nɛòɛ ilɛ mmu í ce adɔ̃ miiu, amu Ezekiɛli ǹ wa si inɔi aru ŋa iyi à mu à nɛò itĩi idoi Kebaa. Ŋɔi ǹ ce kuyɛ. Si kuyɛu ǹ yɛ lelei Aɔ̃ í cĩ nɔ Aɔ̃ Lafɛ̃ɛ wa bam ide ku fɔ.

³ Ntɔ ntɔ Aɔ̃ Lafɛ̃ɛ í ba amu Ezekiɛli amai Buzii woo weeu ide ku fɔ si ilɛi inɛi Kaladee ŋa kɔkɔi idoi Kebaa. Bɛi Aɔ̃ Lafɛ̃ɛ í jɔ̀ gbugbãɛ í naa sim.

⁴ Mii iyi ǹ yɛ wee. Ǹ yɛ fufu nla gɔ wa naa hai do ikpa awɔ njɛi kpãai inunu, do kudũi ijĩ nla gɔ do ina jugula. Inya kumá gɔ í kaakoɛ. Inya kumáu wa fita wai hai si inɔɛ bɛi ina.

⁵ Si aniniɛ, mii ilu hunde mɛɛ gɔ ŋa à wa bɛ iyi à jɔ amanɛ.

⁶ Inɛ akã nŋa fei í nɛ waju mɛɛ do ikpa bɛi ti yɛi ŋa ara mɛɛ.

⁷ Bancaka nŋa ŋa à tɛi, nɔ kutɛ nŋa ŋau à yɛ bɛi ti kɔwei ama kɛtɛ nɔ à waa daanai bɛi isɔ nkpa iyi à ce si icɛ.

⁸ Ikpa akã nŋa fei í nɛ awɔi amanɛi si abɛ si cingaa mɛɛu. Awɔ nŋa ŋau do waju nŋa ŋau do ikpa nŋa ŋau, cingaa mɛɛ ŋaui à waa cɔ.

⁹ Ikpa nŋa ŋau à waa gusi njɛi. Waati iyi à waa nɛ, a ci ya sinda ara nŋa. Inɛ baa yooma nŋa fei í ya maa nɛi suusuu do ikpa wajuɛ.

¹⁰ Waju nŋau í jɔ wajui amanɛ, do ikpa awɔ njɛ wajui muusu nlai à nɛ, do ikpa awɔ canga wajui kɛtɛ kombo, nɔ à nɛ waju má bɛi ti kungbã.

¹¹ Inɛ akã nŋa fei í wu ikpa minjii do lele nɔ ikpa ŋau à koo à waa lu njɛ. Ikpa minji minji mɔ í biiò araɛ.

¹² Inɛ baa yooma nŋa fei wa nɛi suusuu do ikpa wajuɛ. À ya maa nɛi do ikpa bii fufuu wa bɔ nɔ waati iyi à waa nɛ a ci ya sinda ara nŋa.

¹³ Si afei mii ilu hunde ŋau à yɛ ngɔgɔ bɛi ina nyɛnyɛ iyi wa jo wa kaako ŋa. Inau wa ce inya kumá nla nla. Nɔ inya kumá iyi wa fita hai si inau í yɛi bɛi kuŋɔi ijĩ.

¹⁴ Nɔ mii ilu hunde ŋau à sɛi à koo à waa baai bɛi dagba lele.

¹⁵ Ŋɔi ǹ cɔ mii ilu hunde ŋau nɔ ǹ ba wee wuruu gɔ wa lu ilɛ kɔkɔ nŋa si waju nŋa.

¹⁶ Wuruu ŋau à waa daanai bɛi kuta ilu bɛɛrɛ gɔ. Aŋa fei à jɔ njɛi, nɔ yaase dimi akãi à ce ŋa, à ya maa bibii si antaii njɛ.

¹⁷ Waati iyi à waa nɛ, à ya maa nɛi si cingaa mɛɛu amma a ci ya yaa.

¹⁸ Wuruu ŋau à cĩ ntɔ ntɔ nɔ à nɛ ijui bii fei.

¹⁹ Bii mii ilu hunde ŋau à waa nɛ, aŋa mɔ à ya maa nɛi do cingaa bii fei. Nɔ bii à dede hai ilɛ, aŋa mɔ à ya dedei.

²⁰ Mii ilu hunde ŋau à ya maa nɛi do wuruu ŋau ajɔ, domi à ya maa nɛi do ikpa bii fufuu wa bɔ.

²¹ Bii à waa nɛ aŋa mɔ à ya maa nɛi. Bii à leekĩ à ya leekĩi. Bii à dede lele, à ya dedei aŋaò ŋa domi à ya maa nɛi do ikpa bii fufuu wa bɔ.

²² Si antaii irii mii ilu hunde ŋau afe í ce. Afeu í nɛ inya kumá. Inya kumáu wa daanai bɛi dimii kuta fũfũ nla nla gɔ.

²³ Si afe iyi í ceu, mii ilu hunde ŋau à fũ ikpa nŋa ŋa minji minji wa lu njɛ. Nɔ à nɛ ikpa minji minji má iyi à biiò ara nŋa.

²⁴ Waati iyi à waa nɛ, ǹ ya n maa n gbɔ ibai ikpa nŋa ŋai bɛi ibai inyi nla walakɔ bɛi imui Ilaaɔ̃ ilu gbugbã, ibau í ya lai bɛi ti wuaai sooge ŋa. Waati iyi à leekĩ, à ya ka ikpa nŋai.

²⁵ Si antaii afe iyi í wa si antaii iri nŋau ǹ wa n gbɔ iba gɔ wa ce. Waati iyi à leekĩ, à ya ka ikpa nŋai.

²⁶ Si antaii afe iyi í wa si antaii iri nŋau, ǹ yɛ dimii kuta boogu gɔ bɛ í jɔ kitãi bommau, si antaii mii iyi í jɔ kitãi bommau ǹ yɛ mii gɔ bɛ í jɔ amanɛ.

²⁷ Ǹ yɛ inya kumá gɔ má í yɛ bɛi ina, wa má inya bii fei. Nɔ ǹ yɛ ngɔgɔ bɛi ina do inya kumá gɔ í kaakoɛ hai bi gbankiliɛ hee ku bɔ lele do hai bi gbankiliɛ hee ku bɔ ilɛ.

²⁸ Inya kumáu í yɛi bɛi ti njoi Aɔ̃ iyi wa daana si kudũi ijĩ. Í yɛ bɛi amboei Aɔ̃ Lafɛ̃ɛ. Waati iyi ǹ yɔɔ, ǹ sɛɛbata nɔ ǹ gbɔ imui inɛ gɔ wa bam ide ku fɔ.