Ezai 7 - Bibeli do fee

Laabaau iyi aa sɔ̃ ilaalu Ahazi

¹ Si waati iyi Ahazi amai Yotamu iyi wa jɛ tɔkui Oziasiu wa jɛ ilaalui Zudaa, waati bɛɛbɛi Resɛ̃ɛ ilaalui Siri do Peka amai Remalia ilaalui Izirɛli à naa igũ si inɛi Zeruzalɛmu ŋa. Amma mii iyi à naa ku ceu í bi ku haata wo.

² Inɛ ŋa à koo à sɔ̃ Ahazi tɔkui Davidi do inɛi kpasɛ̃ɛ ŋau à ni, inɛi Siri ŋa à na à ce asɔ si ilɛi Efaraimu. Iyi ilaaluu do inɛɛ ŋa à gbɔ ideu, ŋɔi à yaya bɛi jĩi ndii inɔ agbo ŋa iyi fufu wa yaga.

³ Ŋɔi Aɔ̃ Lafɛ̃ɛ í sɔ̃ Ezai í ni, gbã amaɛ Seaa-Yakubu iŋɛò i bɔ bi Ahazi. Ahaziu í wai kɔkɔi bi ku jilɛ inyi iyi í wa leleu do ikpa kpãa iyi wa bɔ ikoi woo mu icĩu.

⁴ Bii ì to bɛ, sɔ̃ɔ i ni ku wɛɛ si laakaiɛ. Ku maà jɔ̀ njo ku muu, nɔ ku maà jɔ̀ idɔɛ ku dede na idɔɔkɔ̃i Resɛ̃ɛ ilaalui Siriu do ti amai Remaliau. Inɛ bɛ ŋa à yɛi bɛi sɔmbɔ minji iyi wa ce cua.

⁵ Ǹ mà iyi inɛi Siri ŋa do Peka do soogei Efaraimu ŋa à nɛ lasabui laalɔ ku ceɛ. Aŋa taka nŋa à ni,

⁶ ka koo si inɛi Zudaa ŋa kaa da zigi nŋa, ka lɛgɛ iluu, nɔ ka tilasi ŋa a nyi wa bi tu wa. Ka jilɛ nŋa amai Tabeɛli ku jɛ ilaalu nŋa.

⁷ Amma amu Aɔ̃ Lafɛ̃ɛ ǹ ni, iyi bɛ kaa jɛ ku ce,

⁸ domi Damasii í jɛ ilu nlai Siri, nɔ Resɛ̃ɛi í jɛ ilaaluɛ. Si afei adɔ̃ kita do miiu, aa kpa irii Efaraimui mam mam, kaa wɛɛ má.

⁹ Ilu nlai ilɛi Efaraimu mɔi í jɛ Samari, nɔ ilaalui Samariu mɔi í jɛ amai Remalia. I kaa yɔkɔ i leekĩ dim dim ŋa bii naanɛ nŋɛ kù wa si Aɔ̃ Lafɛ̃ɛ.

Emanuɛli

¹⁰ Ŋɔi Aɔ̃ Lafɛ̃ɛ í nyi í sɔ̃ Ahazi má í ni,

¹¹ tɔɔ amu Aɔ̃ Lafɛ̃ɛɛ n nyisiɛ nyinda gɔ iyi á jɔ̀ i mà iyi amui ǹ jɛ gbugbãɛ. Á yɔkɔ ku ce si bi kuwai iku ŋa, walakɔ lelei Aɔ̃.

¹² Amma Ahazi í jɛ í ni, aawo n kaa n tɔɔ. N kù bi n sii Aɔ̃ Lafɛ̃ɛ.

¹³ Ŋɔi Ezai í ni, i sotĩ i gbɔ ŋa iŋɛ inɛi kpasɛ̃i Davidi ŋa. Yaase bɛi ì waa gbɛɛji amanɛ ŋa si temua nŋau kù to ŋɛ má í gbe ì nyi ì waa bi i gbɛɛji Ilaaɔ̃ takaɛ mɔ má ŋa?

¹⁴ Na nŋu, Aɔ̃ Lafɛ̃ɛ takaɛ á na ŋɛ nyinda gɔ. Nyindau wee. Ama mudɛ̃ɛ gɔ á nɛ asĩ nɔ ku bí ama inɛmɔkɔ. Waati iyi á na ku bí amau, Emanuɛlii á kpoo, waatɔ Ilaaɔ̃ í wɛɛ do awa.

¹⁵ Sɔndai ikpoi amɔ do nyikɔ̃i aa ya na amau ku jɛ hee koo to waati iyi nŋu takaɛ á yɔkɔ ku kɔ̀si iyi í jɛ laalɔ nɔ ku cica iyi í jɛ jiida.

¹⁶ Hee ku maa to waati iyi ama inɛmɔkɔu á mà mii ŋa ku wũaa bɛɛbɛ, ilɛi ilaalu minji ŋa iyi à jɔ̀ zigiɛ wa dau, inɛi ilɛ ŋau aa sa a nyɔ ilɛui.

¹⁷ Amma awɔ, Aɔ̃ Lafɛ̃ɛ á jɔ̀ wahala gɔ ku naa siɛ do si zamaaɛ ŋa do si bommaɛ. Wahalau, a kù yɛ dimiɛ ajɔ kãma hai waati iyi bommai Izirɛli do ti Zudaa ŋau à kpɛ̃. Iyi bɛ á cei hai do bi ilaalui Asiri.

Wahala iyi inɛi Asiri ŋa à naaò wa

¹⁸ Si waati nŋu bɛ, Aɔ̃ Lafɛ̃ɛ á fã fooi ku jɔ̀ cĩcĩ ŋa a fita wa hai bi amaawɔi idoi Nili ŋau si ilɛi Ezibiti, nɔ nyikɔ̃ ŋa mɔ iyi à wa ilɛi Asiri,

¹⁹ aŋa fei aa naai a naa a de si lɔɔma ŋau do si isai kuta ŋau, do si wua tũtũ ŋa hee do si tengi bi ku jɛi mɛɛmu ŋau fei.

²⁰ Nɔ ajɔ akã Ilaaɔ̃ á wa nŋɛ irii do abɛ iyi á haya wa hai icei idoi Efarata. Ilaalui Asirii á jɛ abɛu. Aa yɛ anyɔ ŋa, domi aa wa ntoi iri nŋɛ ŋai do ntoi bancaka nŋɛ ŋa hee do agbã nŋɛ ŋa fei.

²¹ Si waati nŋu bɛ, kɛtɛ zãu do iwo minjii inɛ fei á maa sɛ̃,

²² nɔ aa ya ba amɔ nkpɔ nkpɔ do ikpoi amɔ a maa jɛ. Inɛ ŋa iyi aa na a gbe si ilɛu, ikpoi amɔ ŋau do nyikɔ̃i aa ya maa jɛ.

²³ Nɔ si waati nŋu bɛ má, ikoi jĩi ndii rezɛ̃ɛ icu dubu iyi á jɛ sikilii isɔ fũfũ dubu, aa sa a jɔ̀a agũ ŋa bɛi.

²⁴ Inɛ ŋa aa lɔ si ilɛu wai do bioo do afa ŋa, domi agũ ŋai aa na a gbe si ilɛu fei.

²⁵ Nɔ si lɔɔmai geete ŋa bii inɛ ŋa à ya logoo do kaako ŋau, inɛ kãma kaa jɛ ku bɔ bɛ má na agũ ŋau. Bi ku jɛi kɛtɛ ŋa do angudã ŋai ilɛu á baa ku jɛ.