Ezai 66 - Bibeli do fee

Woo tɔɔ Ilaaɔ̃ do ntɔ do woo tɔɔ Ilaaɔ̃ si ibo ŋa

¹ Aɔ̃ Lafɛ̃ɛ í ni, lelei Aɔ̃i í jɛ batai bommam, nɔ ilɛ mɔi í jɛ bi ku lesi kutɛm. Debɛi, dimii ile yoomai aa yɔkɔ i maam ŋa. Tengi iwoi á jɛ inya bi kusĩmim.

² Mii ŋa iyi ì waa yɛ ŋau bɛ fei ŋa, awɔm nii í ce ŋa. Do yaase bɛɛbɛi aŋa fei à wɛɛò. Amu Aɔ̃ Lafɛ̃ɛi ǹ wa n sɔ̃ ŋɛ. Si inɛ iyi ijum ŋa í ya wa wee. Ijum í ya wai si ilu are do si hai nɛ gbugbã iyi wa gbɔ idem do jirima nla nla.

³ Amma bii inɛ ŋa à waa ce kuwee, kɛtɛ komboi à ya saka, nɔ à ya kpa amanɛ mɔ má. Inɛ iyi wa ce kuwee do angudã walakɔ do iwo, í ya lɛgɛ kpakɔi aja mɔ má. Inɛ iyi wa ce kuwee do iyafũ, í ya kooò njɛi kuusɔɔ mɔ má. Inɛ iyi wa ce kuwee do tuae iyi í jɛ ti gigi ku ye, í ya maa weea iwɛ̃ ŋai. Inɛ ŋau bɛ fei, à cica kpãa nŋai, nɔ à ya nɛ inɔ didɔ̃i si laalɔ nŋau.

⁴ Amu mɔ, an jɔ̀ laalɔ ku ba ŋai. Nɔ mii iyi í ya jɔ̀ njo ku maa mu ŋau, an jɔ̀ ku naa si ŋai, si na iyi í jɔ̀ ǹ kpe ŋa, nɔ inɛ kãma nŋa kù jɛɛm, si na iyi í jɔ̀ ǹ fɔ ide, nɔ a kù gbɔ, amma mii iyi í jɛ laalɔ do iyi kù waa dɔ̃ɔm sii à ya maa ce.

Aɔ̃ Lafɛ̃ɛ á mua inɛɛ ŋa gbugbã nɔ ku kiiti inɛ ŋa

⁵ I sotĩ i gbɔ bɛi Aɔ̃ Lafɛ̃ɛ í fɔ ŋa iŋɛ iyi ì waa jirima ideɛu. Ide iyi inɛ nŋɛ ŋa à fɔ wee, aŋa iyi à cé ŋɛ nɔ à kɔ̀si ŋɛ na irim, à waa ni, Aɔ̃ Lafɛ̃ɛ ku nyisi amboeɛ nɔ ka yɛ inɔ didɔ̃ nŋɛ. Amma inɛ ŋau, aŋai aa yɛ anyɔ.

⁶ Wakata gɔ wa naa hai inɔ ilu, nɔ anu ku dɔ̃ ŋa wa naa hai inɔ kpasɛ̃i Aɔ̃ Lafɛ̃ɛ. Aɔ̃ Lafɛ̃ɛi wa sãa mbɛɛɛ ŋa mii iyi í nɛ ku ba ŋa.

⁷ Zeruzalɛmu í bí hee ara kuroi kubí ku maa dede siɛ. Í bí ama inɛmɔkɔ hee ara kuroi kubí ku maa naa siɛ.

⁸ Yooi í gbɔ ide dimi bɛɛbɛ ajɔ gɔ. Yooi í yɛ mii dimi bɛɛbɛ ajɔ gɔ. Aa yɔkɔ a bí ilɛ gɔ si ajɔ akã? Aa yɔkɔ a bí dimi gɔ si andunya anu akã? Iyi ara kurou í sinti gbakã, Siɔ̃ɔ í bí ama inɛmɔkɔɛ ŋai.

⁹ Ŋɔi Aɔ̃ Lafɛ̃ɛɛ í nyi í ni má, bii ǹ degbe inaabo bãasĩ hee ajɔi kubí í koo í to, an nyi n ganji ku bí amau wa mái? Amu iyi ǹ ya n jɔ̀ inɛ ku bí, an nyi n ganji ku bí mái?

¹⁰ I jɔ̀ i ba Zeruzalɛmu inɔ didɔ̃ ku kpɛ̃ ŋa. I jɔ̀ Zeruzalɛmu ku jɛ icui inɔ didɔ̃ nŋɛ ŋa, iŋɛ iyi ì buu fei. I baa inɔ didɔ̃u ku kpɛ̃ ŋa, iŋɛ iyi ì tako ì wɛɛò inɔ kufɔi iku wo na laalɔ iyi í baa.

¹¹ Do yaase bɛɛbɛ, Zeruzalɛmu á tũ idɔ nŋɛ do amboeɛ nɔ á jɔ̀ i yo ŋa bɛi iyei ama í ya jɔ̀ amaɛ ŋa a mɔmɔ hee a yo ku ba a gbɔ didɔ̃i amɔu.

¹² Nɔ Aɔ̃ Lafɛ̃ɛ í fɔ má í ni, an jɔ̀ laakai ku sũ ku naa si Zeruzalɛmui bɛi inyii ido nla nla, nɔ amanii ilɛ mmu ŋa mɔ a naa siɛ bɛi acãi inyi iyi í nɛ gbugbã. An so ŋɛi n na ŋɛ amɔ, nɔ n kpã ŋɛ nɔ n lesi ŋɛ si ilugũ n maa n mɔɔmɔɔ ŋɛ.

¹³ Do yaase bɛi iyei ama í ya maa lɛlɛ amaɛ, bɛɛbɛ mɔi amu mɔ an maa n lɛlɛ ŋɛ si ilui Zeruzalɛmu.

¹⁴ Ntɔ ntɔ, aa yɔɔ nɔ i wɛɛò inɔ didɔ̃ ŋa, nɔ ikɔ̃ nŋɛ ŋa aa nyi a teese a ba gbugbã mái bɛi fɔfɔ. Inɛ ŋa iyi à jɛ inɛi Aɔ̃ Lafɛ̃ɛ ŋau aa yɛ gbugbãɛ, nɔ mbɛɛɛ ŋau mɔ aa yɛ idɔɔkɔ̃ɛ.

¹⁵ Aɔ̃ Lafɛ̃ɛu wee í nɛ wa naa do ina, nɔ sarɛtii igũɛ ŋa mɔ à yɛi bɛi fufu nla nla. Wa naa ku nyisi idɔɔkɔ̃ nla nlaɛi, nɔ do ijuukpã iyi í yɛ bɛi amɛi ina ŋai á jɛ.

¹⁶ Aɔ̃ Lafɛ̃ɛ á ce kiitii do ina. Á cooi do taakubaɛ si gãmɛi inɛ fei. Nɔ inɛ nkpɔ nkpɔi á ku si kiitiɛu.

¹⁷ Inɛ gɔ ŋa à ya nya ara nŋa ikãi, nɔ a ce bukii ara ku maaju a bɛi a lɔ inɔ lambo gɔ ŋa. À ya koo a maa lɔ si aninii lambo ŋaui akã akã. À ya maa ŋɔ iŋai kuusɔɔ do iŋai boli do mii laalɔ ŋa. Aɔ̃ Lafɛ̃ɛ í ni inɛ ŋau bɛ aa na a kpa irii anu akã.

Kutɔtɔɔ nla nlai ankãanyi

¹⁸ Ŋɔi Aɔ̃ Lafɛ̃ɛ í ni má, amu ǹ mà kuce nŋa do lasabu nŋa. Waati í to mbɛ bɛi bii an tɔtɔɔ inɛi ilɛ ŋa fei do fee ŋa fei. Aa naa, nɔ aa yɛ amboem.

¹⁹ An jilɛ nyinda gɔ si anini nŋa. An jɔ̀ inɛ gɔ nŋa ŋa iyi à fita si a nɛ ikpa ilɛ gɔ ŋa. Inɛ gɔ ŋa aa nɛ ikpa Taasi, inɛ gɔ ŋa ikpa Pulu, inɛ gɔ ŋa mɔ ikpa Ludu tengi bii inɛ ŋa à jɛ woo ta afa ŋa. Inɛ gɔ ŋa mɔ, ikpa Tubalii aa nɛ, inɛ gɔ ŋa mɔ do ikpa Gɛrɛsi hee ikpa gũngũm ŋa iyi à wa hee jĩijĩ tengi bii a kù gbɔ bii à fɔ idem ajɔ kãma, nɔ a kù yɛ amboem. Aŋai aa koo a fɔ idei amboem nɔu bi inɛi ilɛ ŋau bɛ.

²⁰ Waati bɛɛbɛ, aa baaò inɛ nŋɛ ŋau wa hai ilɛ mmu ŋa. Acĩ ŋai aa gũ wa, do sarɛti ŋa, do sarɛti ŋa iyi aa bii do acɔ ŋa, do mulee ŋa, do kpookpo ŋa. Zeruzalɛmui aa baa si iri kuta kumám nɔu. Aŋai aa jɛ bɛi kuwee iyi à waa naam wa, nɔ an gbaai bɛi dimi iyi inɛi Izirɛli ŋau à ya naaò wa si kpasɛ̃m si pɛrɛnti ŋa iyi à maajuu. Aɔ̃ Lafɛ̃ɛi í fɔ bɛɛbɛ.

²¹ Nɔ Aɔ̃ Lafɛ̃ɛ í ni má, hai si inɛi ilɛ ŋau bɛi an cica woo wee ŋa do inɛi Levii ŋa.

²² Ntɔ ntɔ, bɛi lele titɔ̃ do ilɛ titɔ̃ iyi an ceu aa maa wa si wajum hee do ajɔ fei, bɛɛbɛ mɔi tɔku nŋɛ ŋa do iri nŋɛ aa maa wa si wajum hee do ajɔ fei.

²³ Ŋɔi Aɔ̃ Lafɛ̃ɛ í ni má, si cukpa titɔ̃ do cukpa titɔ̃, do si ajɔi kusĩmi do ajɔi kusĩmi, inɛ fei á ya naa ku sɛɛbatai si wajum.

²⁴ Nɔ waati iyi aa ya na a fita, aa ya yɛ ikui inɛ ŋa iyi a kù jɛ ku jirimam ŋaui, nɔ kokoo ŋa iyi aa lɔ si ara nŋa ŋa a maa ŋɔ ŋa ŋau a kaa ku, nɔ ina iyi á maa jo ŋa ŋau mɔ, kaa ku. Inɛ ŋau, mii laalɔi aa jɛ bi inɛ fei.