Ezai 65 - Bibeli do fee

Kiiti iyi á na ku naa

¹ Ŋɔi Aɔ̃ Lafɛ̃ɛ í ni, inɛ ŋa iyi a kù waa beem ide kãma, ǹ jɔ̀ à waa dɛdɛɛm. Nɔ inɛ ŋa iyi a kù waa dɛdɛɛm, ǹ jɔ̀ à yɛm. Inɛ ŋau, inɛi ilɛ gɔ ŋai iyi a kù waa kpem, amma do nŋu fei, ǹ sɔ̃ ŋa ǹ ni, amu wee ihɛ̃, amu wee ihɛ̃.

² Ǹ to awɔm ŋai ikpa bi zamaa kugaabu gɔ iyi wa too kpãa laalɔ si lasabui idɔɔbiɛ ŋa, nɔ n kù fa awɔm ŋau.

³ Zamaau í ya dɛdɛ anum nii ijuò iju waati kãma fei. À ya maa ce kuwee ŋa si lambo nŋa ŋa, nɔ à ya maa joa iwɛ̃ nŋa ŋa tuae si antaii bi ku ce kuwee nŋa iyi à ma do biiki ŋau.

⁴ Inɛ ŋau à ya maa wai si aninii balɛ ŋa, nɔ idũ, à ya koo a sũi si inɔ isai kuta ŋa. Iŋai kuusɔɔ ŋai à ya maa ŋɔ, nɔ sɔnda iyi kù maajui í ya wa si jɛɛ nŋa ŋa.

⁵ À ya fɔ a ni, fà araɛ, maà naa kɔkɔm, domi à nyam ikã. Kuce dimi bɛɛbɛ ŋau bɛ fei, í yɛi bɛi cua si imɔm ŋa do bɛi ina iyi wa jo hai maà tã.

⁶ Kukɔi fei ndɛɛ í wai si wajum, nɔ n kaa n coko. Nɔ kù nɛ sika kãma, an sã nŋa gbesei mii ŋa iyi à waa ce feii.

⁷ Aɔ̃ Lafɛ̃ɛ í ni, an sã gbesei kurarai iŋɛ taka nŋɛi hee do ti bala nŋɛ ŋa fei, aŋa iyi à joa iwɛ̃ nŋa ŋa tuae ku dɔ̃ inunu ŋa si iri kuta ŋa, nɔ à dede idɔɔkɔ̃m si geete ŋa. Kucei tako nŋa ŋaui an wã n bɛi n sã nŋa. An sã nŋa mii iyi í wa si gãmɛi awaò ŋaui.

⁸ Bii si jĩi ndii rezɛ̃ɛ inɛ í yɛ iso ŋa si saa akã iyi à nɛ inyi jiida, í ya fɔi ku ni, ka jɔ̀ɔ bɛ sɛ̃ɛ, domi aa ka na ka ba siɛ vɛ̃ɛ jiida jiida. Ŋɔi Aɔ̃ Lafɛ̃ɛ í ni, bɛɛbɛi mɔi á jɛ si gãmɛi woo ce icɛm ŋau ku ba n maà n ce nfe nŋa fei mam mam.

⁹ An mua inɛi Zakɔbu ŋa do inɛi Zudaa ŋa tɔku ŋa nɔ aŋai aa jɛ tubui iri kutam ŋau. Aŋai ǹ cica nɔ aŋai aa buba si ku jɛ tu ŋa. Woo ce icɛm ŋaui aa buba tengi bɛ.

¹⁰ Inɛm ŋa iyi à sinda à nyi wa bi titom ŋau, lɔɔmai iri kutai Saaɔ̃i á jɛ bi ku jɛi angudã do iwo nŋa ŋa, nɔ lɔɔmai Akɔɔ mɔi á jɛ bi ku sũi kɛtɛ nŋa ŋa.

¹¹ Amma iŋɛ iyi ì fũsi amu Aɔ̃ Lafɛ̃ɛ awɔ ŋa, iŋɛ iyi ì gbɛjɛ iri kuta kumám nɔu, iŋɛ iyi ì ya maa cea iwɛ̃ iyi à ya kpe Gadi sɔnda, nɔ ì ya maa buãa iwɛ̃ iyi à ya kpe Meni atɛ̃ ŋa,

¹² an jɔ̀ i ku ŋai si igũ. Iŋɛ fei aa koo i gulɛ ŋai a saka ŋɛ, domi ǹ kpe ŋɛ, nɔ i kù jɛ ŋa. Ǹ fɔ ide, nɔ i kù gbɔ ŋa. Mii iyi kù dɔ̃ɔm sii ì ce ŋa. Mii iyi n kù nɛ si inɔ didɔ̃ kãmai ì cica i ce ŋa.

¹³ Ŋɔi Aɔ̃ Lafɛ̃ɛ í ni, na nŋu bɛ, woo ce icɛm ŋa aa jɛ, amma iŋɛ, ari á kpa ŋɛi. Woo ce icɛm ŋa aa mɔ, amma iŋɛ, agbɛ á kpa ŋɛi. Woo ce icɛm ŋa aa wɛɛò inɔ didɔ̃, amma iŋɛ, si anyɔi aa maa wa ŋa.

¹⁴ Woo ce icɛm ŋa aa maa dɔ̃ anui do inɔ didɔ̃. Aa wɛɛò inɔ didɔ̃, amma iŋɛ, aa maa dɔ̃ anui do ara kuro hee si idɔ nŋɛ. Aa maa weewea ŋai nɔ i maa wa si inɔ kufɔ ŋa.

¹⁵ Inɛ ŋa iyi ǹ cica ŋau, iri nŋɛi aa ya so a ceekpeò a ni, Aɔ̃ Lafɛ̃ɛ ku jɔ̀ i ku bɛi wãanɛ, walakɔ bɛi wãanɛ kasa. Amma ti inɛ ngu ŋa iyi à jɛ woo ce icɛm ŋau, an kpe ŋai do iri mmu.

¹⁶ Si ilɛu, inɛ ŋa iyi à waa bi a weea inɛ mmu ŋa fei, aa ya cooi do irii Ilaaɔ̃ nŋu iyi inɛ á yɔkɔ ku na si gbugbã. Inɛ ŋa mɔ iyi à waa bi a ce kugbasi gɔ fei, aa ya cooi do irii Ilaaɔ̃ nŋu iyi inɛ á yɔkɔ ku na si gbugbã. Ntɔ ntɔ, inɔ kufɔi tako ŋau fei aa lɔi nɔ a gbɛjɛ ide nŋa. Fei ndɛɛ á lɔi, kaa maa wa si wajum má. Aɔ̃ Lafɛ̃ɛi í fɔ bɛɛbɛ.

Lele titɔ̃ do ilɛ titɔ̃

¹⁷ Nɔ í fɔ í ni, an ce lele titɔ̃i do ilɛ titɔ̃, nɔ a kaa ya ye gigii lele nwou do ilɛ nwou má. Kaa ya naa si lasabui inɛ ŋa má.

¹⁸ Na nŋu, i jɔ̀ inɔ nŋɛ ku dɔ̃, nɔ i ya wɛɛò inɔ didɔ̃ ntɔ ntɔ ŋa waati kãma fei na mii iyi an ceu. An ce Zeruzalɛmui ku jɛ ti inɔ didɔ̃, nɔ inɛɛ ŋau mɔ a wa si inɔ didɔ̃.

¹⁹ An wɛɛò inɔ didɔ̃ na irii Zeruzalɛmu, nɔ inɛɛ ŋau mɔ, aa jɔ̀ n nɛ inɔ didɔ̃ nla nla, nɔ inɛ kãma kaa gbɔ kukpata do anu ku dɔ̃ ŋa bɛ má.

²⁰ Amu ŋa a kaa ya ku hai keeke nŋa má, nɔ inɛ ngbo ŋa mɔ a kaa ya ku hai a kù ce mɔkɔ ngbo. Waati bɛɛbɛ, awaasũ iyi í ku do njumai á jɛ adɔ̃ cĩɔ. Inɛ iyi í ku, nɔ kù to adɔ̃ cĩɔ, aa ya ni à ceekpeɛi.

²¹ Inɛm ŋau aa ma kpasɛ̃ ŋa nɔ a lɔ a sũ si. Aa ce ikoi jĩi ŋa nɔ aa ba iso nŋa a jɛ.

²² A kaa ma ile nɔ inɛ mmu gɔ ku na ku lɔ si ileu, a kaa nɔ a lɔ jĩi nɔ inɛ mmu gɔ ku na ku maa jɛ isoɛ. Ntɔ ntɔ ajɔi inɛm ŋau á kpɔi bɛi ti jĩi ŋa. Nɔ inɛm ŋa iyi ǹ cica ŋau aa jɛ aranfãanii icɛ iyi aa ce.

²³ A kaa gbɛɛji ara nŋa si ngbɛ, a kaa nɔ a nɛ amu ŋa nɔ zigi nŋa ku maa da na irii amu ŋau má, domi aŋai aa jɛ dimii inɛ ŋa iyi à ba kuweei Aɔ̃ Lafɛ̃ɛ, aŋa do ama nŋa ŋa.

²⁴ Hee a maa kpem, amu an jɛ nŋa. Hee a fɔ ide a maa tã, an gbɔ ide iyi à waa fɔu.

²⁵ Mbo do ama angudã fei, inya akãi aa maa jɛ. Muusu nla do kɛtɛ, aŋa fei fɔfɔi aa maa jɛ, nɔ njo mɔ, ilùlùi á jɛ sɔndaɛ. Si antaii iri kuta kumám nɔu bii fei, laalɔ ku ce do gbugbã ku taa njɛ kãma kaa wa si. Aɔ̃ Lafɛ̃ɛi í fɔ bɛɛbɛ.