Ezai 64 - Bibeli do fee

¹ Do yaase bɛi ina í ya jɔ̀ amaawɔi jĩi ŋa a maa jo nɔ ku jɔ̀ inyi ku maa gba, bɛɛbɛi mbɛɛɛ ŋa aa mà iriɛ nɔ inɛi ilɛ ŋa aa maa yaya si wajuɛ,

² waati iyi aa ce maamaake ŋa iyi inɛ ŋa a kù waa cɔ kpãaɛ. Ntɔ ntɔ aa kita wai nɔ iri kuta ŋa aa maa yayai si wajuɛ.

³ Mii iyi a kù fɔ ideɛ ajɔ kãma, nɔ a kù gbɔ baauɛ ajɔ kãma, nɔ a kù yɔɔ do iju ajɔ kãma, bii kù jɛ awɔ Ilaaɔ̃ sisi, iwɛ̃ kãma kù cea inɛ ŋa iyi à dasiɛ naanɛ bɛɛbɛ.

⁴ Ì waa bɔ ku ko inɛ iyi í nɛ inɔ didɔ̃ wa ceò mii iyi í jɛ dee dee, do inɛ ŋa iyi à waa ye gigii kpãaɛ ŋa. Kpãaɛ ŋaui à ya faaba wa waati kãma fei wo. Amma idɔɛ í kɔ̃ si na iyi í jɔ̀ à ce dulum,

⁵ nɔ awa fei à baa à jɛ ilu riisi ŋa, nɔ mii iyi à waa ce ku ba ka jɛ dee dee fei, í yɛi bɛi ibɔ riisi. Awa fei à baa à yɛi bɛi wua iyi í gbɛ nɔ í da í cuku, nɔ kurara nwa ŋau à ya maa nɛò wai bɛi fufu.

⁶ Inɛ kãma kù wɛɛ iyi wa kpe iriɛ, nɔ inɛ kãma kù wɛɛ iyi í teese í mu araɛ nɔ í dĩ do awɔ, domi ì sinda wajuɛ hai bi tu wa nɔ ì jɔ̀ à kua gbugbã na kurara nwa ŋau.

⁷ Do nŋu fei Aɔ̃ Lafɛ̃ɛ, awɔi ì jɛ baa nwa. Awa à yɛi bɛi amà, nɔ awɔi ì jɛ bɛi woo ma caka. Awa fei icɛi awɔɛ ŋai à jɛ.

⁸ Aɔ̃ Lafɛ̃ɛ, maà jɔ̀ idɔɛ ku kɔ̃ hee ku lɔ zaka. Maà jɔ̀ i maa ye gigii kurara nwa ŋa hee do ajɔ fei. Cɔ, awa fei inɛɛ ŋai.

⁹ Inɛ ŋa a kù wa si ilu kumáɛ ŋau má. Siɔ̃ɔ í baa í jɛ gbaa. À lɛgɛ Zeruzalɛmu í baa í kpɔò bomma.

¹⁰ Kpasɛ̃ ku nɛ bɛɛrɛ nwa iyi à nya ikã í jɛ titɛɛ, tengi bii bala nwa ŋa à ya koo a tɔɔɛ nɔ a kɔ̃ iri a maa cĩɛu, ina í joo. Nɔ mii ŋa iyi à bi ntɔ ntɔu fei, à ce nfe nŋa.

¹¹ Aɔ̃ Lafɛ̃ɛ, aa kɔ̀ i maa coko si wajui mii ŋau bɛ fei? Aɔ̃ Lafɛ̃ɛ, bii ì waa coko do yaase bɛɛbɛ, kukaye nwau kaa lɔ zaka?